ಕೋರ್ಟ್​ ರಸ್ತೆಯಲ್ಲಿವೆ ಮೃತ್ಯುಕೂಪ

ನಿತ್ಯ ಸಾವಿರಾರು ಜನರ ಸಂಚಾರ: ಈ ರಸ್ತೆಯಲ್ಲೆ ಶಿರಡಿ ಸಾಯಿ ಮಂದಿರ, ಲೋಕೋಪಯೋಗಿ ಇಲಾಖೆ ಕಚೇರಿ, ತಾಲೂಕು ಆಡಳಿತ ಸೌಧ, ಪ್ರಮುಖ ಮಾಲ್​ಗಳು, ಆಸ್ಪತ್ರೆ ಹಾಗೂ ಹತ್ತಾರು ಸರ್ಕಾರಿ ಕಚೇರಿಗಳಿದ್ದು, ನಿತ್ಯ ಸಾವಿರಾರು ಸಂಖ್ಯೆಯಲ್ಲಿ ಸಾರ್ವಜನಿಕರು ಓಡಾಡುತ್ತಾರೆ. ರಸ್ತೆಯ ಮಧ್ಯಭಾಗದಲ್ಲೆ ಬಿದ್ದಿರುವ ಗುಂಡಿಗಳನ್ನು ಸಕಾಲದಲ್ಲಿ ಮುಚ್ಚದ ಕಾರಣ, ವಾಹನಗಳ ನಿರಂತರ ಸಂಚಾರದಿಂದಾಗಿ ದಿನೇ ದಿನೆ ಇವು ಮತ್ತಷ್ಟು ದೊಡ್ಡದಾಗುತ್ತಿವೆ. ಕನಿಷ್ಠ ಡಾಂಬರು ಹಾಕಿಯಾದರೂ ತಾತ್ಕಾಲಿಕವಾಗಿ ಗುಂಡಿ ಮುಚ್ಚುವ ಸೌಜನ್ಯವನ್ನು ನಗರಸಭೆ ತೋರಿಲ್ಲ.

ಅಪಘಾತದ ಭೀತಿ: ಇಲ್ಲಿನ ಎಪಿಎಂಸಿ ಮಾರುಕಟ್ಟೆಗೆ ತೆರಳುವ ವರ್ತಕರು ಮಧ್ಯರಾತ್ರಿಯಿಂದಲೇ ಈ ರಸ್ತೆಯಲ್ಲಿ ಸಂಚರಿಸುತ್ತಾರೆ. ಕತ್ತಲಲ್ಲಿ ಗುಂಡಿಗಳು ಕಾಣದೆ ವಾಹನಗಳು ಪಲ್ಟಿಯಾಗಿ ಹಲವರು ಗಾಯಗೊಂಡಿದ್ದಾರೆ. ಇನ್ನು ಹಗಲಿನಲ್ಲಿ ದ್ವಿಚಕ್ರ ವಾಹನ ಸವಾರರು ಗುಂಡಿಗಳನ್ನು ತಪ್ಪಿಸಲು ಹೋಗಿ ಹಠಾತ್ತನೆ ಬ್ರೇಕ್​ ಹಾಕುವುದರಿಂದ, ನಿಯಂತ್ರಣ ತಪ್ಪಿ ಬೀಳುತ್ತಿದ್ದಾರೆ. ಇದರಿಂದಾಗಿ ಸರಣಿ ಅಪಘಾತಗಳೂ ಸಂಭವಿಸುತ್ತಿವೆ.

ಮಳೆಗಾಲ ಆರಂಭವಾಗಿದ್ದು, ರಸ್ತೆಯ ಗುಂಡಿಗಳಲ್ಲಿ ನೀರು ತುಂಬಿ ಕೆರೆಯಂತಾಗುತ್ತಿವೆ. ಇದರಿಂದಾಗಿ ಗುಂಡಿಯ ಆಳ ತಿಳಿಯದೆ ಬೈಕ್​ ಸವಾರರು ಬೀಳುತ್ತಾರೆ. ಇದರೊಂದಿಗೆ, ಇದೇ ರಸ್ತೆಯಲ್ಲಿ ಇತ್ತೀಚೆಗೆ ಕುಡಿಯುವ ನೀರಿನ ಪೈಪ್​ಲೈನ್​ ಅಳವಡಿಸಲಾಗಿತ್ತು. ಆದರೆ ಪೈಪ್​ ಹಾಕಿದ ನಂತರ ರಸ್ತೆಯನ್ನು ವೈಾನಿಕವಾಗಿ ಸಮತಟ್ಟು ಮಾಡದೆ ಹಾಗೇ ಬಿಟ್ಟಿರುವುದರಿಂದ ಇಡೀ ರಸ್ತೆ ಹಳ್ಳದಿಣ್ಣೆಯಾಗಿ ಮಾರ್ಪಟ್ಟಿದೆ. ಇನ್ನಾದರೂ ನಗರಸಭೆ ಅಧಿಕಾರಿಗಳು ಎಚ್ಚೆತ್ತುಕೊಂಡು, ಮಳೆಗಾಲದಲ್ಲಿ ಸಂಭವಿಸಬಹುದಾದ ದೊಡ್ಡ ಅನಾಹುತಗಳನ್ನು ತಪ್ಪಿಸಲು ತಣವೇ ಕೋರ್ಟ್​ ರಸ್ತೆಯ ಗುಂಡಿಗಳನ್ನು ಮುಚ್ಚಿ, ಸುಗಮ ಸಂಚಾರಕ್ಕೆ ಅನುಕೂಲ ಮಾಡಿಕೊಡಬೇಕು ಎಂದು ಸಾರ್ವಜನಿಕರು ಹಾಗೂ ವಾಹನ ಸವಾರರು ತೀವ್ರವಾಗಿ ಆಗ್ರಹಿಸಿದ್ದಾರೆ.