ಸಾಲಪಡೆದು ತಲೆಮರೆಸಿಕೊಂಡಿದ್ದ ದಂಪತಿ ಸೆರೆ

ಮೂಲತಃ ತುಮಕೂರು ಜಿಲ್ಲೆಯ ನಾಗೇಂದ್ರ, ಕವಿತಾ ಬಂಧಿತರು. ಏನಿದು ಪ್ರಕರಣ? ತಾಲೂಕಿನ ಕೋಡಿಹಳ್ಳಿಯ ಬಸ್​ನಿಲ್ದಾಣದ ಬಳಿ ಹಲವು ವರ್ಷಗಳಿಂದ ತಳ್ಳುಗಾಡಿಯಲ್ಲಿ ಆಮ್ಲೆಟ್​ ಹಾಗೂ ಎಗ್​ರೈಸ್​ ಮಾರುತ್ತಿದ್ದ ದಂಪತಿ ವಿವಿಧ ಕಾರಣ ಹೇಳಿ ಗ್ರಾಮದ 15ಕ್ಕೂ ಹೆಚ್ಚು ಮಂದಿಯಿಂದ ಸುಮಾರು 72 ಲಕ್ಷ ರೂ. ಸಾಲ ಪಡೆದು ನ.20ರ ರಾತ್ರಿ ಪರಾರಿಯಾಗಿದ್ದರು.

ಕೆಬ್ಬಳ್ಳಿ ಗ್ರಾಮದ ಸುನಿತಾ ಅಲಿಯಾಸ್​ ಜ್ಯೋತಿ ಎಂಬುವವರು ಈ ಹಿಂದೆ ಬೆಂಗಳೂರಿನಲ್ಲಿ ಸಾಲ ಮಾಡಿಕೊಂಡು ತೊಂದರೆಗೊಳಗಾಗಿದ್ದ ನಾಗೇಂದ್ರ, ಕವಿತಾ ದಂಪತಿಯನ್ನು ಕೋಡಿಹಳ್ಳಿಗೆ ಕರೆತಂದು ಬಾಡಿಗೆ ಮನೆಯಲ್ಲಿ ಇರಿಸಿದ್ದರು. ನಂತರದ ದಿನಗಳಲ್ಲಿ ದಂಪತಿ ದುಡಿದು ಕೂಡಿಟ್ಟಿದ್ದ ಹಣವೂ ಅಲ್ಲದೇ ಬೇರೆಯವರಿಂದ ಸಾಲ ಕೊಡಿಸುವಂತೆ ನಾಗೇಂದ್ರ ಹಾಗೂ ಕವಿತಾಗೆ ಹೆದರಿಸುತ್ತಿದ್ದರು. ಇದೇಕಾರಣಕ್ಕೆ ಹಲವರಿಂದ 72 ಲಕ್ಷ ರೂ. ಸಾಲವಾಗಿ ಪಡೆದು, ಸುನಿತಾ ಅವರ ಬ್ಯಾಂಕ್​ ಖಾತೆಗೆ ಜಮೆ ಮಾಡಿರುವುದಾಗಿ ಪೊಲೀಸ್​ ವಿಚಾರಣೆ ವೇಳೆ ದಂಪತಿ ಬಾಯ್ಬಿಟ್ಟಿದ್ದು, ಹೇಳಿಕೆ ಆಧರಿಸಿ ಗುರುವಾರ ವಿಚಾರಣೆಗೆ ಹಾಜರಾಗುವಂತೆ ಕೆಬ್ಬಳ್ಳಿ ಸುನಿತಾಗೆ ಪೊಲೀಸರು ನೋಟಿಸ್​ ಜಾರಿಗೊಳಿಸಿದ್ದಾರೆ ಎನ್ನಲಾಗಿದೆ.