ನಗರಸಭೆ ಸದಸ್ಯನ ಮೇಲೆ ಹಲ್ಲೆಗೆ ಯತ್ನ

ರಾಮನಗರ

ನಗರಸಭೆ ಸದಸ್ಯರೂ ಆದ ರೌಡಿಶೀಟರ್​ ಅಜ್ಮತ್​ ಉಲ್ಲಾ ಖಾನ್​ ಮೇಲೆ ಮತ್ತೊಂದು ರೌಡಿ ಗುಂಪು ನಗರದಲ್ಲಿ ಹಲ್ಲೆಗೆ ಯತ್ನಿಸಿದೆ.

ನಗರದ 22ನೇ ವಾರ್ಡ್​ ಸದಸ್ಯ ಅಜ್ಮತ್​ ಉಲ್ಲಾ ಖಾನ್​ ಶುಕ್ರವಾರ ಸಂಜೆ 4.30ರ ಸುಮಾರಿಗೆ ಮನೆ ಕಡೆ ಬೈಕ್​ನಲ್ಲಿ ಹೋಗುತ್ತಿದ್ದಾಗ ರಾಮನಗರ ರೈಲ್ವೆ ಅಂಡರ್​ ಬ್ರಿಡ್ಜ್​ ಬಳಿ ಮತ್ತೊಬ್ಬ ರೌಡಿ ಶೀಟರ್​ ಕವೇಲಿ ಮತ್ತು ಸಹಚರರು ಹಿಂದಿನಿಂದ ಅಜ್ಮತ್​ ಬೈಕ್​ಗೆ ಡಿಕ್ಕಿ ಹೊಡೆದಿದ್ದಾರೆ. ಈ ವೇಳೆ ಅಜ್ಮತ್​ ಕೆಳೆಗೆ ಬಿದ್ದಾಗ ಮಾರಕಾಸ್ತ್ರಗಳಿಂದ ದಾಳಿ ನಡೆಸಲು ಮುಂದಾಗಿದ್ದಾರೆ.

ಇದೇ ರಸ್ತೆಯಲ್ಲಿ ಹೋಗುತ್ತಿದ್ದ ಮಫ್ತಿಯಲ್ಲಿದ್ದ ಪೊಲೀಸ್​ ಒಬ್ಬರು ಕೂಗಿಕೊಂಡ ಹಿನ್ನೆಲೆಯಲ್ಲಿ ಕೂದಲೆಳೆ ಅಂತರದಲ್ಲಿ ಅಜ್ಮತ್​ ದಾಳಿಯಿಂದ ತಪ್ಪಿಸಿಕೊಂಡು ಪಕ್ಕದಲ್ಲಿಯೇ ಇದ್ದ ಮಸೀದಿಗೆ ಕಡೆಗೆ ರಕ್ಷಣೆಗಾಗಿ ಓಡಿ ಹೋಗಿದ್ದಾರೆ. ನಂತರ ನಗರದ ಜನತಾ ಕಾಲನಿಯಲ್ಲಿರುವ ಅಜ್ಮತ್​ ಉಲ್ಲಾ ಖಾನ್​ ಮನೆಗೆ ಬಂದಿರಬಹುದು ಎನ್ನುವ ಅನುಮಾನದ ಮೇಲೆ ಬೈಕ್​ನಲ್ಲಿ ಮಾರಕಾಸ್ತ್ರಗಳೊಂದಿಗೆ ತೆರಳಿದ ಕವೇಲಿ ಮತ್ತು ಇತರ ಇಬ್ಬರು ಮನೆಗೆ ನುಗ್ಗಿದ್ದಾರೆ. ಈ ವೇಳೆ ಅಜ್ಮತ್​ ಮನೆಯಲ್ಲಿ ಇರಲಿಲ್ಲ. ನಂತರ ಮನೆ ಮುಂದೆ ನಿಲ್ಲಿಸಲಾಗಿದ್ದ ಕಾರು ಹಾಗೂ ಎರಡು ಬೈಕ್​ಗಳ ಮೇಲೆ ದಾಳಿ ನಡೆಸಿ ಅವುಗಳನ್ನು ಜಖಂಗೊಳಿಸಿದ್ದಾರೆ. ಮನೆಯ ಬಳಿ ನಡೆದ ಟನೆಯ ಈ ಎಲ್ಲ ದೃಶ್ಯಗಳು ಸಿಸಿಟಿವಿಯಲ್ಲಿ ದಾಖಲಾಗಿದೆ.

ಹಲ್ಲೆ ಯತ್ನದ ನಂತರ ಅಜ್ಮತ್​, ಪುರ ಠಾಣೆಗೆ ದೂರು ನೀಡಿದ್ದಾರೆ. ಈ ಹಿಂದೆಯೂ ಅಜ್ಮತ್​ ಮೇಲೆ ಹಲವಾರು ಬಾರಿ ದಾಳಿ ಯತ್ನ ನಡೆದಿತ್ತು. ಹಳೇ ದ್ವೇಷವೇ ಟನೆಗೆ ಕಾರಣ ಎನ್ನಲಾಗುತ್ತಿದೆಯಾರೂ, ಟನೆಗೆ ನಿಖರ ಕಾರಣ ತಿಳಿದು ಬಂದಿಲ್ಲ ಎನ್ನುವ ಉತ್ತರ ಪೊಲೀಸರದ್ದು. ಆದರೆ ಕವೇಲಿ ಸಹ ರೌಡಿ ಶೀಟರ್​ ಆಗಿದ್ದು, ರಾಮನಗರ ಐಜೂರು, ಪುರ ಪೊಲೀಸ್​ ಠಾಣೆಗಳು ಮತ್ತು ಬೆಂಗಳೂರಿನ ಎಚ್​ಎಸ್​ಆರ್​ ಲೇಔಟ್​ ಠಾಣೆಗಳಲ್ಲಿ ಕೊಲೆ, ಕೊಲೆ ಯತ್ನ ಸೇರಿ 15ಕ್ಕೂ ಹೆಚ್ಚು ಪ್ರಕರಣಗಳು ದಾಖಲಾಗಿವೆ ಎಂದು ಹೇಳಲಾಗಿದೆ. ಕವೇಲಿ ಈ ಹಿಂದೆ ಅಜ್ಮತ್​ನೊಂದಿಗೆ ಒಡನಾಟ ಹೊಂದಿದ್ದ ಎನ್ನಲಾಗಿದೆ. ಕವೇಲಿ ಜತೆಯಲ್ಲಿ ಇದ್ದ ಇತರರ ಬಗ್ಗೆ ಮಾಹಿತಿ ತಿಳಿದು ಬಂದಿಲ್ಲ.

ಹಿರಿಯ ಪೊಲೀಸ್​ ಅಧಿಕಾರಿಗಳು, ಪುರ ವೃತ್ತದ ಇನ್​ಸ್ಪೆಕ್ಟರ್​ ರಮೇಶ್​, ಪಿಎಸ್​ಐ ತನ್ವೀರ್​ ಅಹಮದ್​ ಮುಂತಾದವರು ಸ್ಥಳ ಪರಿಶೀಲನೆ ನಡೆಸಿದ್ದು, ಪ್ರಕರಣ ದಾಖಲಿಸಿಕೊಂಡು ಆರೋಪಿಗಳ ಪತ್ತೆ ಬಲೆ ಬೀಸಿದ್ದಾರೆ.