ದರ್ಶನ್​ಗೆ ಹೊಸ ತಲೆನೋವು; ರೇಣುಕಾಸ್ವಾಮಿ ಕೊಲೆ ಕೇಸ್​​ನ ಪ್ರಮುಖ​ ಸಾಕ್ಷಿದಾರನಿಗೆ ಬೆದರಿಕೆ; ಮೂವರು ಅರೆಸ್ಟ್.. Renukaswamy

ಬೆಂಗಳೂರು: ಚಿತ್ರದುರ್ಗದ ರೇಣುಕಾಸ್ವಾಮಿ ಕೊಲೆ ಪ್ರಕರಣದ ಪ್ರಮುಖ ಆರೋಪಿ, ನಟ ದರ್ಶನ್​​ ಸದ್ಯ ಜೈಲಿನಲ್ಲಿದ್ದಾರೆ. ಆದರೆ, ಅವರ ಫ್ಯಾನ್ಸ್​ ಎಂದು ಕರೆಸಿಕೊಂಡ ಮೂವರು ಸಾಕ್ಷಿದಾರ ಸಂದೀಪ್ ಎಂಬುವವರಿಗೆ ಬೆದರಿಕೆ ಹಾಕಿದ ಆರೋಪದ ಮೇಲೆ ಅವರನ್ನು ಬಂಧಿಸಲಾಗಿದೆ.

ಪುನೀತ್​, ವೇಣು ಹಾಗೂ ಸುಹಾಸ್​​ ಬಂಧಿತರು ಎಂದು ಗುರುತಿಸಲಾಗಿದ್ದು, ಅವರು ದರ್ಶನ್​ ಅಭಿಮಾನಿಗಳು ಎನ್ನಲಾಗಿದೆ. ಸದ್ಯ ಮೂವರನ್ನು ವೈದ್ಯಕೀಯ ಪರೀಕ್ಷೆಗೆ ಒಳಪಡಿಸಲು ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ. ಆನಂತರ ಅವರನ್ನು ಕೋರ್ಟ್​ ಮಂದೆ ಹಾಜರು ಪಡಿಸಲಾಗುತ್ತದೆ ಎಂದು ಹೇಳಲಾಗಿದೆ.

ರೇಣುಕಾಸ್ವಾಮಿ ಕೊಲೆ ಕೇಸ್​​ನ ಸಾಕ್ಷಿದಾರನಾದ ಸಂದೀಪ್ ಅವರಿಗೆ ಮೂವರು ವಾಟ್ಸಾಪ್ ಕರೆಗಳ ಮೂಲಕ ಬೆದರಿಕೆ ಹಾಕಿದ್ದರು ಎಂದು ದೂರು ನೀಡಿದ್ದರು. ದೂರಿನ ಆಧಾರದ ಮೇಲೆ ತನಿಖೆ ನಡೆಸಿದ ಪೊಲೀಸರು ಮೂವರನ್ನು ಬಂಧಿಸಿದ್ದಾರೆ. ಇನ್ನು ಬಂಧಿತ ಪುನೀತ್​ ದರ್ಶನ್​ ಅವರ ಫ್ಯಾನ್​ ಪೇಜ್​ ಡಿ ಕಂಪನಿಯ ಅಡ್ಮಿನ್​ ಆಗಿದ್ದ ಎನ್ನಲಾಗಿದೆ

ರೇಣುಕಾಸ್ವಾಮಿ ಮೃತದೇಹವನ್ನು ಬಿಸಾಡಲು ಬಳಸಿದ ಸ್ಕಾರ್ಪಿಯೋ ಕಾರು ಮಾಲೀಕನೇ ಈ ಎಂ ಆರ್​ ಪುನೀತ್. ಆ ಬಳಿಕ ಕಾರನ್ನು ತೊಳಿದದ್ದ ಎನ್ನಲಾಗಿತ್ತು. ಪುನೀತ್​ ಸದ್ಯ ಪ್ರಮುಖ ಸಾಕ್ಷಿಯಾಗಿದ್ದ. ಆದರೆ, ಚಿತ್ರದುರ್ಗದಿಂದ ರೇಣುಕಾಸ್ವಾಮಿಯನ್ನ ಬೆಂಗಳೂರಿಗೆ ಕರೆತಂದಿಲ್ಲ ಎಂದು ಹೇಳುವಂತೆ ಮತ್ತೊಬ್ಬ ಸಾಕ್ಷಿದಾರ ಸಂದೀಪ್​ಗೆ ಒತ್ತಡ ಹೇರಿದ್ದ ಕಾರಣ ಪುನೀತ್​ನನ್ನು ಬಂಧಿಸಲಾಗಿದೆ. ಸದ್ಯ ಮೂವರ ವಿರುದ್ಧ ಎಫ್​ಐಆರ್​ ದಾಖಲಾಗಿದೆ.

2024 ಜೂನ್​8 ರಂದು ಚಿತ್ರದುರ್ಗದ ನಿವಾಸಿ ರೇಣುಕಾಸ್ವಾಮಿ (33)ನನ್ನು ಬೆಂಗಳೂರಿನ ಆರ್​ಆರ್​ನಗರಕ್ಕೆ ಕರೆತಂದಿದ್ದರು. ನಟಿ ಪವಿತ್ರಾ ಗೌಡಗೆ ಅಶ್ಲೀಲ ಸಂದೇಶ ಕಳುಹಿಸಿದ ಹಿನ್ನೆಲೆ, ಈತನ ಅಪಹರಣ ನಡೆಸಿ, ಬರ್ಬರವಾಗಿ ಕೊಲೆ ಮಾಡಲಾಗಿತ್ತು. ನಂತರ ನಟ ದರ್ಶನನ್ನು ಮೈಸೂರಿನಲ್ಲಿ ಸೆರೆ ಹಿಡಿಯಲಾಗಿತ್ತು.. ಸದ್ಯ ಪ್ರಕರಣದ ವಿಚಾರಣೆ ಮುಂದುವರೆದಿದೆ, (ಏಜೆನ್ಸೀಸ್).