ಟಾಟಾ ಮೋಟರ್ಸ್ ನ 17 ಟ್ರಕ್ ಬಿಡುಗಡೆ
- ನವದೆಹಲಿಯಲ್ಲಿ ಅನಾವರಣ
- ಅತ್ಯುತ್ತಮ ಕಾರ್ಯಕ್ಷಮತೆ, ಹೆಚ್ಚಿನ ಸೌಕರ್ಯ, ದೀರ್ಘಾ ಬಾಳಿಕೆ ಸಾಮರ್ಥ್ಯ
ಪವನ್ ಆಚಾರ್ಯ ನೀರ್ಚಾಲು ನವದೆಹಲಿ
ಸುರಕ್ಷತೆ, ಲಾಭದಾಯಕತೆ ಮತ್ತು ಪ್ರಗತಿಯಲ್ಲಿ ಹೊಸ ಮಾನದಂಡಗಳನ್ನು ಸ್ಥಾಪಿಸಿರುವ ಟಾಟಾ ಮೋಟಾರ್ಸ್, ಹೊಸ ಮಾದರಿಯ 17 ಟ್ರಕ್ಗಳನ್ನು ಮಾರುಕಟ್ಟೆಗೆ ಪರಿಚಯಿಸಿದೆ. ನವದೆಹಲಿಯ ಭಾರತ್ ಮಂಡಪಂನಲ್ಲಿ ಹಮ್ಮಿಕೊಂಡಿದ್ದ ಕಾರ್ಯಕ್ರಮದಲ್ಲಿ ಕಂಪನಿಯ ಕಾರ್ಯನಿರ್ವಾಹಕ ನಿರ್ದೇಶಕ ಗಿರೀಶ್ ವಾಘ್ ಹಾಗೂ ಬಿಜಿನೆಸ್ ಹೆಡ್ ರಾಜೇಶ್ ಕೌಲ್ ಅವರು ಹೊಸ ಮಾದರಿಯ ಟ್ರಕ್ಗಳನ್ನು ಅನಾವರಣ ಮಾಡಿದರು.
ಹೊಚ್ಚ ಹೊಸ "ಅಜುರಾ'ಸರಣಿ, ಅತ್ಯಾಧುನಿಕ 'ಟಾಟಾ ಟ್ರಕ್ಸ್.ಇವಿ' ಶ್ರೇಣಿ ಮತ್ತು ಈಗಾಗಲೆ ಜನಪ್ರಿಯವಾಗಿರುವ ಪೆಮಾ, ಸಿಗ್ಮಾ ಹಾಗೂ ಅಲ್ಟ್ರಾ ವಾಹನಗಳ ಸುಧಾರಿತ ಆವೃತ್ತಿಗಳನ್ನು ಪರಿಚಯಿಸಲಾಗಿದೆ.
ಅತ್ಯುತ್ತಮ ಕಾರ್ಯಕ್ಷಮತೆ, ಹೆಚ್ಚಿನ ಸೌಕರ್ಯ ಮತ್ತು ಹೆಚ್ಚಿನ ಅವಧಿ ಕೆಲಸ ಮಾಡುವ ಸಾಮರ್ಥ್ಯವಿರುವ "ಅಜುರಾ' ಶ್ರೇಣಿಯು ಮಧ್ಯಮ ಮತ್ತು ಹಗುರವಾದ ವಾಣಿಜ್ಯ ವಾಹನ (ಐಎಲ್ಎಂಸಿವಿ) ವಿಭಾಗದಲ್ಲಿ ವಿಶೇಷವಾಗಿ ವಿನ್ಯಾಸಗೊಳಿಸಲಾಗಿದೆ. ಸೌಂದರ್ಯ ಮತ್ತು ಉಪಯುಕ್ತತೆ ಎರಡೂ ಸಂಯೋಜನೆಗೊಂಡಿರುವ ಆಕರ್ಷಕ ಸರಣಿ ಇದಾಗಿದೆ.
ಟಾಟಾ ಮೋಟಾರ್ಸ್ನ ಲಿ. ಎಂಡಿ ಮತ್ತು ಸಿಇಒ ಗಿರೀಶ್ ವಾಘ್ ಅವರು, ಆತ್ಮನಿರ್ಭರ ಭಾರತ, ಆಧುನಿಕ ಮೂಲಸೌಕರ್ಯ ಮತ್ತು ಸುರಕ್ಷಿತ, ಸ್ವಚ್ಛ ಹಾಗೂ ಹೆಚ್ಚು ಪರಿಣಾಮಕಾರಿ ಲಾಜಿಸ್ಟಿಕ್ಸ್ ಮೇಲಿನ ಬೇಡಿಕೆ ಹೆಚ್ಚಳದಿಂದಾಗಿ ದೇಶದ ಟ್ರಕ್ ಕ್ಷೇತ್ರವು ಕ್ಷಿಪ್ರ ಬದಲಾವಣೆಯನ್ನು ಕಾಣುತ್ತಿದ್ದು, ಉದ್ಯಮದ ಭವಿಷ್ಯ ಮತ್ತಷ್ಟು ಎತ್ತರಕ್ಕೇರಿಸಲು ಟಾಟಾ ಮೋಟಾರ್ಸ್ ಯಾವಾಗಲೂ ಮುಂಚೂಣಿಯಲ್ಲಿದೆ ಎಂದರು.
ಅಜುರಾ ಸರಣಿ, ಎರಡು ಸುಧಾರಿತ ಉನ್ನತ- ದಕ್ಷತೆಯ ಪವರ್ಟ್ರೇನ್ಗಳು, ನಮ್ಮ ಹೊಸ ಐ-ಎಂಒ ಇವಿ ಆರ್ಕಿಟೆಕ್ಚರ್ ಅಡಿಯಲ್ಲಿ ಶೂನ್ಯ ಹೊಗೆಸೂಸುವ ಎಲೆಕ್ಟ್ರಿಕ್ ಟ್ರಕ್ಗಳು ಮತ್ತು ಟಿಪ್ಪರ್ಗಳು ಸೇರಿವೆ. ಜತೆಗೆ ಯುರೋಪಿಯನ್ ಗುಣಮಟ್ಟದ ಕ್ಯಾಬಿನ್ಗಳು, ಅತ್ಯುತ್ತಮ ಸುರಕ್ಷತಾ ವೈಶಿಷ್ಟ್ಯಗಳು, ಹೆಚ್ಚಿನ ಪೇಲೋಡ್ ಸಾಮರ್ಥ್ಯ ಮತ್ತು ಇಂಧನ ದಕ್ಷತೆಯನ್ನು ಹೊಂದಿದ್ದು, ಇವೆಲ್ಲವನ್ನೂ ಫ್ಲೀಟ್ ಎಡ್ಜ್ಡಿಜಿಟಲ್ ಸೇವೆಗಳೊಂದಿಗೆ ಸಂಯೋಜಿಸಲಾಗಿದೆ.