ರಾಜ್ಯ ಕೈಮಗ್ಗ ಎಕ್ಸ್ಪೋಗೆ ಅದ್ದೂರಿ ಚಾಲನೆ
- ಜೆ.ಪಿ. ನಗರ 7ನೇ ಹಂತ ಶುಭ್ ಕನ್ವೆಕ್ಷನ್ ಹಾಲ್ನಲ್ಲ್ಲಿ ಆಯೋಜನೆ
- 31ರ ವರೆಗೆ ಮಾರಾಟ, ಪ್ರದರ್ಶನ
ವಿಜಯವಾಣಿ ಸುದ್ದಿಜಾಲ ಬೆಂಗಳೂರು
ಭಾರತೀಯ ಕೈಮಗ್ಗ ನಿಗಮ ವತಿಯಿಂದ ಜೆ.ಪಿ.ನಗರ 7ನೇ ಹಂತದ ಶುಭ್ ಕನ್ವೆಕ್ಷನ್ ಹಾಲ್ನಲ್ಲಿ ಆಯೋಜಿಸಲಾಗಿರುವ ರಾಜ್ಯ ಕೈಮಗ್ಗ ಎಕ್ಸ್ಪೋಗೆ "ವಿಜಯವಾಣಿ' ಸಂಪಾದಕ ಕೆ.ಎನ್. ಚನ್ನೇಗೌಡ ಮಂಗಳವಾರ ಚಾಲನೆ ನೀಡಿದರು. 31ರ ವರೆಗೆ ನಡೆಯಲಿರುವ ಎಕ್ಸ್ಪೋದಲ್ಲಿ ಅಸ್ಸಾಂ, ಬಿಹಾರ್, ಜಾರ್ಖಂಡ್, ಉತ್ತರ ಪ್ರದೇಶ ಮುಂತಾದ ರಾಜ್ಯಗಳಿಂದ ಮಾರಾಟಗಾರರು ಆಗಮಿಸಿದ್ದು, ಬಗೆಬಗೆಯ ಕೈಮಗ್ಗದ ವಸ್ತುಗಳ ಪ್ರದರ್ಶನ ಹಾಗೂ ಮಾರಾಟವಿರಲಿದೆ.
ಈ ವೇಳೆ ಮಾತನಾಡಿದ ಕೆ.ಎನ್. ಚನ್ನೇಗೌಡ, ಕೈಮಗ್ಗ ಕ್ಷೇತ್ರವು ನಮ್ಮದೇಶದ ಸಂಸತಿಯನ್ನು ಪ್ರತಿಬಿಂಬಿಸುತ್ತದೆ. ಈ ಕ್ಷೇತ್ರದ ಅಭಿವೃದ್ಧಿಗೆ ಮುಖ್ಯವಾಗಿ ಮಾರುಕಟ್ಟೆ ವಿಸ್ತರಣೆ ಆಗಬೇಕಿರುವುದು ಅನಿವಾರ್ಯವಾಗಿದೆ. ಇನ್ಸ್ಟಾಗ್ರಾಂ,ಫೇಸ್ಬುಕ್, ಯುಟ್ಯೂಬ್ಗಳನ್ನು ನೋಡಿ ಖರೀದಿ ಮಾಡುವ ಟ್ರೆಂಡ್ ಗ್ರಾಹಕರಲ್ಲಿ ಬೆಳೆಯುತ್ತಿದೆ. ಅದಕ್ಕೆ ತಕ್ಕಂತೆ ನಾವು ಸಹ ತಯಾರಾಗಬೇಕಾಗಿದೆ. ಎಐ (ಕೃತಕ ಬುದ್ಧಿಮತ್ತೆ) ಮುಂತಾದ ಅತ್ಯಾಧುನಿಕ ತಂತ್ರಜ್ಞಾನಗಳನ್ನು ಸಮರ್ಥವಾಗಿ ಬಳಸಿಕೊಳ್ಳುವ ಮೂಲಕ ಮಾರುಕಟ್ಟೆಯಲ್ಲಿ ಹೆಚ್ಚಿನ ಗ್ರಾಹಕರನ್ನು ತಲುಪಲು ಸಾಧ್ಯವಿದೆ ಎಂದರು.
ಕುಶಲಕರ್ಮಿಗಳು ಮತ್ತು ಕೈಮಗ್ಗ ಅಭಿವೃದ್ಧಿ ನಿಗಮದ ಅಧ್ಯಕ್ಷ ಡಾ.ಎಸ್. ಚಂದ್ರಶೇಖರ್ ಮಾತನಾಡಿ, ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಭಾರತೀಯ ಕೈಮಗ್ಗಕ್ಕೆ ಉತ್ತಮ ಬೇಡಿಕೆ ಇದೆ, ಎಲ್ಲ ಕಡೆಯಿಂದ ಗುಣಮಟ್ಟದ ವಿಚಾರದಲ್ಲಿ ಶ್ಲಾಘನೆಗಳು ಕೇಳಿಬರುತ್ತಿದೆ. 135 ವರ್ಷಗಳ ಹಳೇ ಸೀರೆಯನ್ನೂ ಎಕ್ಸ್ಪೋದಲ್ಲಿ ಪ್ರದರ್ಶನಕ್ಕೆ ಇರಿಸಲಾಗಿದೆ. ಕೈಮಗ್ಗ ಕ್ಷೇತ್ರಕ್ಕೆ ಅಸ್ಸಾಂ ನೇಕಾರರ ಕೊಡುಗೆ ಅಪಾರವಾಗಿದೆ. ಅಲ್ಲಿಯೇ ಅತ್ಯಂತ ಮೌಲ್ಯಯುತ ರೇಷ್ಮೆ ನೇಯ್ಗೆಗಳನ್ನು ಕಾಣಬಹುದು ಎಂದು ಹೇಳಿದರು.
ಹ್ಯಾಂಡ್ಲೂಮ್ಸ್ ಆ್ಯಂಡ್ ಡೈರೆಕ್ಟರ್ ಟೆಕ್ಸ್ಟೈಲ್ಸ್ನ ನಿವೃತ್ತ ಆಯುಕ್ತ ಡಾ.ಡಿ.ಎ. ವೆಂಕಟೇಶ್, ರಾಷ್ಟ್ರೀಯ ಕೈಮಗ್ಗ ಅಭಿವೃದ್ಧಿ ನಿಗಮದ ನಿವೃತ್ತ ವ್ಯವಸ್ಥಾಪಕ ಎಂ.ಆರ್.ಎಸ್. ರಾವನ್, ಶ್ರೀಹರಿ ಮತ್ತಿತರರಿದ್ದರು.
ಈಗಿನ ಮಾರುಕಟ್ಟೆಯಲ್ಲಿ ಕೈಮಗ್ಗದ ವಸ್ತುಗಳ ಮಾರಾಟ ಮಾಡುವುದು ತುಂಬ ಸವಾಲೆನಿಸಿದೆ. ಹೀಗಿರುವಾಗ ಕೈಮಗ್ಗವನ್ನೇ ನಂಬಿಕೊಂಡಿರುವ ಕುಟುಂಬಗಳಿಗೆ ಇಂತಹ ಎಕ್ಸ್ಪೋಗಳು ಅನುಕೂಲವಾಗಲಿವೆ. ದೇಶದಲ್ಲಿ ಕೈಮಗ್ಗದ ವಸ್ತುಗಳಿಗೆ ಪ್ರೋತ್ಸಾಹ ಸಿಗಬೇಕಿರುವುದು ಅಗತ್ಯವಾಗಿದೆ ಎಂದು ಸುಮಂಗಲಿ ಸೇವಾಶ್ರಮದ ಅಧ್ಯಕ್ಷೆ ಡಾ.ಎಸ್.ಜಿ. ಸುಶೀಲಮ್ಮ ಹೇಳಿದರು.
ಇತ್ತೀಚಿನ ದಿನಗಳಲ್ಲಿ ಅಂಗಡಿ, ಮಳಿಗೆ, ಸಿಬ್ಬಂದಿ ಹೀಗೆ ವಾಣಿಜ್ಯ ಕೇಂದ್ರಗಳ ಮೂಲಕವೇ ವ್ಯಾಪಾರ ಮಾಡಬೇಕೆಂದೇನಿಲ್ಲ. ಮನೆಯ ಕೊಠಡಿಯಲ್ಲಿ ಕುಳಿತು ವ್ಯಾಪಾರ ವಹಿವಾಟು ನಡೆಸುವ ಅವಕಾಶಗಳಿವೆ. ಸ್ವಉದ್ಯಮದಲ್ಲಿ ನೇಕಾರರು ಬೆಳೆಯುವಲ್ಲಿ ಡಾ.ಎಸ್. ಚಂದ್ರಶೇಖರ್ ಎಲ್ಲ ರೀತಿಯ ಸಹಕಾರ ನೀಡುತ್ತಿದ್ದಾರೆ. ಇಂತಹ ಅನೇಕ ಎಕ್ಸ್ಪೋಗಳನ್ನು ನಡೆಸುವ ಮೂಲಕವೂ ನೇಕಾರರಿಗೆ ಬೆಂಬಲವಾಗಿ ನಿಂತಿದ್ದಾರೆ.