- ಕಾನೂನುಬಾಹಿರ ಬಂಧನ ಹೆಚ್ಚಳ ಎಂದ ಹೈಕೋರ್ಟ್
- ವೈಟ್ಫೀಲ್ಡ್ ಡಿಸಿಪಿ, ಎಸಿಪಿ, ಪಿಎಸ್ಐಗೆ 3 ಲಕ್ಷ ರೂ. ದಂಡ
ಬೆಂಗಳೂರು:
ರಾಜ್ಯದಲ್ಲಿ ನಿಯಮ ಮೀರಿ ನಾಗರಿಕರನ್ನು ಬಂಧಿಸುತ್ತಿರುವ ಪ್ರಕರಣಗಳ ಸಂಖ್ಯೆ ಹೆಚ್ಚಾಗುತ್ತಿದೆ. ನ್ಯಾಯಾಲಯದ ಆದೇಶಗಳು ಮತ್ತು ಸಂವಿಧಾನಾತ್ಮಕ ನಿಯಮಗಳನ್ನು ಉಲ್ಲಂಘಿಸಿ ಪೊಲೀಸ್ ಅಧಿಕಾರಿಗಳು ಮನಬಂದಂತೆ ನಡೆದುಕೊಳ್ಳುತ್ತಿದ್ದಾರೆ ಎಂದು ಹೈಕೋರ್ಟ್ ತೀವ್ರ ಆಕ್ರೋಶ ವ್ಯಕ್ತಪಡಿಸಿದೆ.
ನಕಲಿ ವಿಲ್ ಆರೋಪಕ್ಕೆ ಸಂಬಂಧಿಸಿ ದಾಖಲಾಗಿರುವ ಪ್ರಕರಣದಲ್ಲಿ ವಿಲ್ಗೆ ಸಾ ಸಹಿ ಹಾಕಿರುವ ಕೆ.ಎಮ್. ಮೋಹನ್ ರೆಡ್ಡಿ ಎಂಬುವರನ್ನು ವೈಟ್ಫೀಲ್ಡ್ ಪೋಲೀಸರು ಅಕ್ರಮವಾಗಿ ಬಂಧಿಸಿದ್ದಾರೆ ಎಂದು ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರಿದ್ದ ಏಕಸದಸ್ಯ ನ್ಯಾಯಪೀಠ ಘೋಷಿಸಿದೆ. ಈ ಬಗ್ಗೆ ಮಂಗಳವಾರವೇ ಆದೇಶಿಸಿದ್ದ ನ್ಯಾಯಪೀಠ, ಅರ್ಜಿದಾರರನ್ನು ನ್ಯಾಯಾಂಗ ಬಂಧನದಿಂದ ಬಿಡುಗಡೆಗೊಳಿಸಿತ್ತು. ಈ ಪ್ರಕರಣದ ತನಿಖಾಧಿಕಾರಿಯನ್ನು ವಿಚಾರಣೆಗೆ ಹಾಜರಾಗುವಂತೆ ಸೂಚಿಸಲಾಗಿತ್ತು.
ವಿಚಾರಣೆಯನ್ನು ಗುರುವಾರ ಮುಂದುವರಿಸಿದ ನ್ಯಾಯಪೀಠ, ಪೊಲೀಸರ ವರ್ತನೆಯನ್ನು ಕಠಿಣ ಶಬ್ದಗಳಲ್ಲಿ ಖಂಡಿಸಿದೆ. ಅರ್ಜಿದಾರರಿಗೆ ಆ.27ರೊಳಗೆ ವಿಚಾರಣೆಗೆ ಹಾಜರಾಗುವಂತೆ ತನಿಖಾಧಿಕಾರಿ ನೋಟಿಸ್ ನೀಡಿದ್ದರು. ಆದರೆ, ಅವರನ್ನು ಆ.25ರಂದೇ ಬಂಧಿಸಲಾಗಿತ್ತು. ಇದು ಪೊಲೀಸ್ರಾಜ್ ಆಗಿದೆ. ಎಷ್ಟು ಬಾರಿ ಹೇಳಿದರೂ ಕಾನೂನು ಪಾಲನೆಯಾಗುತ್ತಿಲ್ಲ. ಈ ಪ್ರಕರಣದ ಮೆರಿಟ್ ಬಗ್ಗೆ ಹೇಳುತ್ತಿಲ್ಲ. ಆದರೆ, ಬಂಧನ ಮಾಡುವಾಗ ಕಾನೂನು ಪಾಲಿಸಿಲ್ಲ ಎಂದಿತು. ಪ್ರಕರಣದ ಮೊದಲ ಆರೋಪಿ ಸಿಕ್ಕಿಲ್ಲ ಎಂದು ಎರಡನೇ ಆರೋಪಿಯಾಗಿರುವ ಅರ್ಜಿದಾರರನ್ನು ಬಂಧಿಸಲಾಗಿದೆ. ಇದಕ್ಕೆ ಕಾನೂನಿನಲ್ಲಿ ಅವಕಾಶವಿಲ್ಲ ಎಂದು ಅವಲೋಕನ ಮಾಡಿದೆ.
ದಂಡದ ಮೊತ್ತ ಸ್ವತಃ ಪಾವತಿಸಿ:
ಪೊಲೀಸರಿಗೆ ಎಚ್ಚರಿಕೆ ನೀಡಿದರೆ ಸಾಕಾಗುವುದಿಲ್ಲ. ಇಂತಹ ಟನೆಗಳು ಮುಂದುವರಿಯಬಾರದಾದರೆ ದಂಡ ವಿಧಿಸಬೇಕು ಎಂದ ನ್ಯಾಯಪೀಠ, 3 ಲಕ್ಷ ರೂಪಾಯಿ ದಂಡ ವಿಧಿಸಿ ಆದೇಶಿಸಿದೆ. ಪಿಎಸ್ಐ ಸುನೀಲ್ ಕುಮಾರ್, ಡಿಸಿಪಿ ಸೈದುಲ್ ಅದಾವತ್ ಮತ್ತು ಎಸಿಪಿ ರೀನಾ ಸುವರ್ಣ ಅವರು ಈ ದಂಡದ ಮೊತ್ತವನ್ನು ತಮ್ಮ ವೈಯಕ್ತಿಕ ಹಣದಿಂದ ಪಾವತಿಸಬೇಕು ಎಂದು ಹೇಳಿದೆ.
ವಿಚಾರಣೆ ವೇಳೆ ಹಾಜರಿದ್ದ ತನಿಖಾಧಿಕಾರಿ ಸುನೀಲ್ ಕುಮಾರ್ ಅವರನ್ನು ನ್ಯಾಯಪೀಠ ತರಾಟೆಗೆ ತೆಗೆದುಕೊಂಡಿತು. ಸರ್ಕಾರಿ ವಕೀಲರನ್ನು ಉದ್ದೇಶಿಸಿದ ನ್ಯಾಯಪೀಠ, ಇಂತಹ ಟನೆಗಳಿಗೆ ತನಿಖಾಧಿಕಾರಿ ಮಾತ್ರ ಕಾರಣವಲ್ಲ. ಮೇಲಾಧಿಕಾರಿಗಳ ಆದೇಶದಂತೆ ಇವರು ವರ್ತಿಸುತ್ತಾರೆ. ಕೊನೆಗೆ ಹರಕೆಯ ಕುರಿಯಾಗುತ್ತಾರೆ. ಆದ್ದರಿಂದ ತನಿಖಾಧಿಕಾರಿ ಮಾತ್ರವಲ್ಲ, ಇಡೀ ಪೊಲೀಸ್ ಠಾಣೆ ಮತ್ತು ಮೇಲಾಧಿಕಾರಿಗಳು ದಂಡ ಪಾವತಿಸಲು ಸಮಾನ ಹೊಣೆಗಾರರಾಗುತ್ತಾರೆ ಎಂದಿತು.
⚠️
ಸಿವಿಲ್ ಕೇಸ್ನಲ್ಲಿ ನಿಮಗೇನು ಕೆಲಸ?
ಸಿವಿಲ್ ವ್ಯಾಜ್ಯದಲ್ಲಿ ಪೊಲೀಸರ ಹಸ್ತಕ್ಷೇಪ ಇರಬಾರದು ಎಂದು ಸುಪ್ರೀಂ ಕೋರ್ಟ್, ಹೈಕೋರ್ಟ್ಗಳು ಹಲವು ಬಾರಿ ಹೇಳಿದೆ. ಆದರೆ, ಪ್ರತಿ ಬಾರಿಯೂ ನಿಯಮ ಉಲ್ಲಂನೆಯಾಗುತ್ತಿದೆ. ಕೊಲೆ ಪ್ರಕರಣಗಳ ಆರೋಪಿಗಳನ್ನು ಹುಡುಕುವ ಬದಲು ಸಿವಿಲ್ ಪ್ರಕರಣದಲ್ಲಿ ತಕ್ಷಣ ಹಾಜರಾಗುತ್ತಾರೆ. ಮದುವೆ ಭರವಸೆ ನೀಡಿ ಅತ್ಯಾಚಾರ ಪ್ರಕರಣದಲ್ಲಂತೂ ಕೇಳುವುದೇ ಬೇಡ, ಹುಡುಗಿ ದೂರು ನೀಡಿದ ತಕ್ಷಣವೇ ಹುಡುಗನನ್ನು ಬಂಧಿಸುತ್ತಾರೆ. ನ್ಯಾಯಾಲಯ ಇಲ್ಲವಾಗಿದ್ದರೆ ಪೊಲೀಸರ ಅಕ್ರಮ ಎಲ್ಲೆ ಮೀರುತ್ತಿತ್ತು ಎಂದು ಖಟುವಾಗಿ ನುಡಿಯಿತು.
ಮ್ಯಾಜಿಸ್ಟ್ರೆಟ್ ಮೇಲೂ ಅಸಮಾಧಾನ:
ಪೊಲೀಸರು ಬಂಧಿಸಿದ ತಕ್ಷಣವೇ ವಿವೇಚನೆ ಬಳಸದೆ ಒಪ್ಪಿಗೆ ನೀಡುವ ಮ್ಯಾಜಿಸ್ಟ್ರೆಟ್ ನ್ಯಾಯಾಲಯಗಳ ಬಗ್ಗೆಯೂ ನ್ಯಾಯಪೀಠ ತೀವ್ರ ಅಸಮಾಧಾನ ವ್ಯಕ್ತಪಡಿಸಿತು. ಪೊಲೀಸರು ಡಿಮಾಂಡ್ ಮಾಡಿದ ತಕ್ಷಣ ರಿಮಾಂಡ್ ನೀಡಲಾಗುತ್ತಿದೆ. ಇದು ಸರಿಯಲ್ಲ. ಬಂಧನದ ಅವಶ್ಯಕತೆಯಿದ್ದರೆ ಮಾತ್ರ ಒಪ್ಪಿಗೆ ನೀಡಬೇಕು. ಆದರೆ, ಮ್ಯಾಜಿಸ್ಟ್ರೆಟ್ ನ್ಯಾಯಾಲಯಗಳು ಈ ಪ್ರಕ್ರಿಯೆಯನ್ನು ಸರಿಯಾಗಿ ಪಾಲಿಸುತ್ತಿಲ್ಲ ಎಂದು ಅವಲೋಕನ ಮಾಡಿತು.