ಡಬಲ್​ ಡೆಕ್ಕರ್​ ಯೋಜನೆಯಲ್ಲಿ ಬದಲಾವಣೆ?

ಮೆಟ್ರೋ ಕಿತ್ತಳೆ ಮಾರ್ಗದ ಉದ್ದಕ್ಕೂ 37 ಕಿ.ಮೀ. ಡಬಲ್​ ಡೆಕ್ಕರ್​ ನಿರ್ಮಿಸುವ ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (ಬಿಎಂಆರ್​ಸಿಎಲ್​) ಯೋಜನೆ ಬದಲಾಗುವ ಸಾಧ್ಯತೆಯಿದ್ದು, ಪ್ರಮುಖ ಟ್ರಾಫಿಕ್​ ಜಂಕ್ಷನ್​ಗಳಲ್ಲಿ ಮಾತ್ರ ಮೆಟ್ರೋ ಮಾರ್ಗ&ರಸ್ತೆ ಸಂಯೋಜಿತ ಯೋಜನೆ ಅನುಷ್ಠಾನಗೊಳಿಸಲು ಚಿಂತನೆ ನಡೆದಿದೆ.

ಇಂಜಿನಿಯರಿಂಗ್​ ಸಲಹಾ ಸಂಸ್ಥೆ ಆರ್​ಐಟಿಇಎಸ್​ ನೀಡಿರುವ ಸಲಹೆಗಳ ಹಿನ್ನೆಲೆ ಈ ಬದಲಾವಣೆಗೆ ಬಿಎಂಆರ್​ಸಿಎಲ್​ ಮುಂದಾಗಿದೆ. ನಿರಂತರವಾಗಿ ಹೆಚ್ಚುವರಿ ರಸ್ತೆ ಸಾಮರ್ಥ್ಯ ಕಲ್ಪಿಸುವುದರಿಂದ ಖಾಸಗಿ ವಾಹನಗಳ ಬಳಕೆ ಮತ್ತಷ್ಟು ಏರಿಕೆಯಾಗುವ ಸಾಧ್ಯತೆ ಇದೆ. ಇದು ಸಾರ್ವಜನಿಕ ಸಾರಿಗೆ ಬಳಕೆಯನ್ನು ಉತ್ತೇಜಿಸುವ ಮೆಟ್ರೋ ಯೋಜನೆಯ ಮೂಲ ಉದ್ದೇಶಕ್ಕೆ ವಿರುದ್ಧವಾಗಬಹುದು ಎಂಬ ಆತಂಕವನ್ನು ಆರ್​ಐಟಿಇಎಸ್​ ವ್ಯಕ್ತಪಡಿಸಿದೆ.

35 ಮೀಟರ್​ ಎತ್ತರದ ಸವಾಲು:

ಡಬಲ್​ ಡೆಕ್ಕರ್​ ನಿಮಾರ್ಣಕ್ಕೆ ಹಲವು ತಾಂತ್ರಿಕ ಅಡಚಣೆಗಳಿವೆ. ಈಗಾಗಲೇ ಇರುವ ಮೇಲ್ಸೇತುವೆಗಳು ಹಾಗೂ ಮೆಟ್ರೋ ಮಾರ್ಗಗಳನ್ನು ದಾಟಬೇಕಾಗುತ್ತದೆ. ಅದಕ್ಕಾಗಿ ಸುಮಾರು 35 ಮೀಟರ್​ ಎತ್ತರಕ್ಕೆ ಮಾರ್ಗವನ್ನು ಏರಿಸಬೇಕಾಗಬಹುದು. ಇದರಿಂದ ನಿಮಾರ್ಣ, ನಿರ್ವಹಣೆ ಹಾಗೂ ಸಂಚಾರ ನಿರ್ವಹಣೆ ಮತ್ತಷ್ಟು ಸಂಕೀರ್ಣವಾಗಲಿದೆ. ಹೀಗಾಗಿ 37 ಕಿ.ಮೀ. ಯೋಜನೆಯನ್ನು ಸುಮಾರು 11 ಕಿ.ಮೀ.ಗೆ ಸೀಮಿತಗೊಳಿಸುವ ಸಾಧ್ಯತೆ ಇದೆ. ಹೆಬ್ಬಾಳ, ಬಿಇಎಲ್​ ಸರ್ಕಲ್​, ಗೊರಗುಂಟೆಪಾಳ್ಯ, ಸುಮನಹಳ್ಳಿ ಕ್ರಾಸ್​, ನಾಗರಬಾವಿ, ನಾಯಂಡಹಳ್ಳಿ, ಕಾಮಾಕ್ಯ ಜಂಕ್ಷನ್​, ಸರಕ್ಕಿ ಜಂಕ್ಷನ್​, ಡೆಲ್ಮಿಯಾ ಫ್ಲೈಓವರ್​ ಹಾಗೂ ವೆಗಾ ಸಿಟಿ ಮಾಲ್​ ಸುತ್ತಮುತ್ತಲಿನ ಸಂಚಾರದ ಒತ್ತಡದ ಆಧಾರದ ಮೇಲೆ ಅಂತಿಮವಾಗಿ ಮಾರ್ಗಗಳನ್ನು ಆಯ್ಕೆ ಮಾಡುವ ಸಾಧ್ಯತೆ ಇದೆ.

ಮೆಟ್ರೋ ಮಾತ್ರ ಇರುವ ಯೋಜನೆಗೆ ಆರ್ಥಿಕ ಆಂತರಿಕ ಪ್ರತಿಫಲ ದರ ಸುಮಾರು ಶೇ.17 ಇದೆ. ಆದರೆ ಡಬಲ್​ಡೆಕ್ಕರ್​ ರಸ್ತೆ ಭಾಗವನ್ನು ಸೇರಿಸಿದಾಗ ಈ ಪ್ರಮಾಣ ಶೇ.14ರ ಮಾನದಂಡಕ್ಕಿಂತ ಕೆಳಗೆ ಇಳಿಯುತ್ತದೆ ಎಂದು ಆರ್​ಐಟಿಇಎಸ್​ ವರದಿ ಸೂಚಿಸಿದೆ.

ನಗರದ ಪ್ರಥಮ ಡಬಲ್​ ಡೆಕ್ಕರ್​ ಮಾದರಿಯಾದ ಸಿಲ್ಕ್​ಬೋರ್ಡ್​& ರಾಗಿಗುಡ್ಡ ಮಾರ್ಗ 2026ರಲ್ಲಿ ಸಂಚಾರಕ್ಕೆ ಮುಕ್ತವಾಗಿದೆ. ಸುಮಾರು 3.5 ಕಿ.ಮೀ. ಉದ್ದದ ಈ ಮಾರ್ಗವು ಸಿಲ್ಕ್​ಬೋರ್ಡ್​ ಭಾಗದ ಸಂಚಾರವನ್ನು ಕೆಲ ಮಟ್ಟಿಗೆ ಸುಗಮಗೊಳಿಸಿದರೂ ನಿರ್ಗಮನ ಸ್ಥಳಗಳು ಹಾಗೂ ಸಮೀಪದ ರಸ್ತೆಗಳತ್ತ ಸಂಚಾರದ ಒತ್ತಡ ವರ್ಗಾವಣೆಯಾಗುತ್ತಿರುವುದು ಹೊಸ ಸವಾಲಾಗಿ ಪರಿಣಮಿಸಿದೆ. ಇನ್ನು ಅಂತಹ ಪ್ರದೇಶಗಳ ಸಮಸ್ಯೆ ಪರಿಹರಿಸಲು ಮತ್ತೆ ರಸ್ತೆ ವಿಸ್ತರಣೆ ಅಥವಾ ಅಂಡರ್​ಪಾಸ್​ ನಿರ್ಮಾಣದ ಅಗತ್ಯವಿದೆ ಎಂದು ಹೇಳಲಾಗುತಿದೆ. ಇದೇ ಅನುಭವ ಕಿತ್ತಳೆ ಮಾರ್ಗದ ಯೋಜನೆಗೂ ಪ್ರಮುಖ ಪಾಠವಾಗಬಹುದು.

ಹಂತ-&3 ಕಾಮಗಾರಿ ಶುರುವಾಗಿಲ್ಲ

ಮೆಟ್ರೋ ಹಂತ-&3ರಲ್ಲಿ ಕೆಂಪಾಪುರ& ಜೆ.ಪಿ. ನಗರ ಹಾಗೂ ಹೊಸಹಳ್ಳಿ& ಕಡಬಗೆರೆ ಎಂಬ ಎರಡು ಕಾರಿಡಾರ್​ಗಳಿದ್ದು, 45 ಕಿ.ಮೀ. ಉದ್ದ ಹೊಂದಿವೆ. 2025ರ ಆಗಸ್ಟ್​ನಲ್ಲಿ ಪ್ರಧಾನಿ ನರೇಂದ್ರ ಮೋದಿ ಶಂಕುಸ್ಥಾಪನೆ ನೆರವೇರಿಸಿದ್ದರೂ, ಕಾಮಗಾರಿ ಇನ್ನೂ ಆರಂಭವಾಗಿಲ್ಲ. ಹೊಸ ಡಬಲ್​ ಡೆಕ್ಕರ್​ ಪ್ರಸ್ತಾವನೆ ಸೇರಿ ಕಾರ್ಯಸಾಧ್ಯತೆ, ವಿನ್ಯಾಸ ಮತ್ತಿತರ ಅಧ್ಯಯನಗಳು ನಡೆಯುತ್ತಿವೆ.