ರೈತರ ಬದುಕಿಗೆ "ಎಥನಾಲ್​' ಭರವಸೆ

ಕಬ್ಬಿನಿಂದ ಉತ್ಪತ್ತಿಯಾಗುವ ಉತ್ಪನ್ನ ಹಾಗೂ ತ್ಯಾಜ್ಯವಿಗ ಕಾರುಗಳ ಚಕ್ರಗಳಿಗೆ ಚೈತನ್ಯ ತುಂಬುವ ಇಂಧನವಾಗಿ ರೂಪಾಂತರಗೊಳ್ಳುತ್ತಿದೆ. ಪೆಟ್ರೋಲ್​ ಮೇಲಿನ ಅವಲಂಬನೆ ಕಡಿಮೆ ಮಾಡುವುದರ ಜತೆಗೆ ರೈತರ ಆದಾಯ ಹೆಚ್ಚಿಸುವ ಗುರಿ ಹೊಂದಿರುವ ಎಥೆನಾಲ್​ ಇಂಧನ ಬಳಕೆಯ ಅಭಿಯಾನ ಇದೀಗ ಬೆಂಗಳೂರಿಗೂ ಕಾಲಿಟ್ಟಿದೆ.

ಮಾರುತಿ ಸುಜುಕಿ ಅಭಿವೃದ್ಧಿಪಡಿಸಿರುವ ವ್ಯಾಗನ್​ಆರ್​ ಫ್ಲೆಕ್ಸ್​ ಫ್ಯುಯೆಲ್​ ವಾಹನದ ಮೂಲಕ ಎಥೆನಾಲ್​ ಬಳಕೆಯ ಕುರಿತು ಜನಜಾಗೃತಿ ಮೂಡಿಸುವ ಕಾರ್ಯಕ್ರಮಕ್ಕೆ ಜೂ.14ರಂದು ಬೆಂಗಳೂರಿನಲ್ಲಿ ಚಾಲನೆ ದೊರೆತಿದೆ. ಪರಿಸರಸ್ನೇಹಿ ಇಂಧನ ಬಳಕೆ, ವಿದೇಶಿ ಕಚ್ಚಾತೈಲ ಆಮದು ವೆಚ್ಚ ಕಡಿತ ಮತ್ತು ಕೃಷಿ ಆಧಾರಿತ ಆರ್ಥಿಕತೆಗೆ ಬಲ ತುಂಬುವ ಉದ್ದೇಶದಿಂದ ಈ ಅಭಿಯಾನ ರೂಪುಗೊಂಡಿದೆ. 

ಎಥೆನಾಲ್​ ಎಂದರೆ ಕೇವಲ ಕಬ್ಬಿನ ರಸದಿಂದ ತಯಾರಾಗುವ ಇಂಧನವಲ್ಲ. ಸಕ್ಕರೆ ಉತ್ಪಾದನೆಯ ಉಪ ಉತ್ಪನ್ನವಾದ ಮೊಲಾಸಿಸ್​, ಕಬ್ಬಿನ ಅವಶೇಷಗಳು ಸೇರಿ ವಿವಿಧ ಕೃಷಿ ತ್ಯಾಜ್ಯಗಳಿಂದಲೂ ಇದನ್ನು ಉತ್ಪಾದಿಸಬಹುದಾಗಿದೆ. ಈ ಉಪಕ್ರಮದಿಂದ ಕೃಷಿ ತ್ಯಾಜ್ಯಕ್ಕೆ ಮೌಲ್ಯ ಸಿಗುವುದರ ಜತೆಗೆ ರೈತರಿಗೆ ಹೆಚ್ಚುವರಿ ಆದಾಯದ ಮಾರ್ಗವೂ ತೆರೆಯಲಿದೆ.

ಫ್ಲೆಕ್ಸ್​ ಫ್ಯುಯೆಲ್​ ತಂತ್ರಜ್ಞಾನಕ್ಕೆ ಉತ್ತೇಜನೆ:

ಪ್ರಸ್ತುತ ದೇಶದಲ್ಲಿ ಪೆಟ್ರೋಲ್​ಗೆ ಶೇ.20 ಎಥೆನಾಲ್​ ಮಿಶ್ರಣ ಮಾಡುವ ಗುರಿಯತ್ತ ಕೇಂದ್ರ ಸರ್ಕಾರ ಸಾಗುತ್ತಿದೆ. ಇದೇ ಹಿನ್ನೆಲೆಯಲ್ಲಿ ಫ್ಲೆಕ್ಸ್​ ಫ್ಯುಯೆಲ್​ ತಂತ್ರಜ್ಞಾನ ಹೊಂದಿರುವ ವಾಹನಗಳನ್ನು ಉತ್ತೇಜಿಸಲಾಗುತ್ತಿದೆ. ವ್ಯಾಗನ್​ಆರ್​ ಫ್ಲೆಕ್ಸ್​ ಫ್ಯುಯೆಲ್​ ಕಾರು ಇ&20ಯಿಂದ ಇ&85ವರೆಗೆ ಎಥೆನಾಲ್​ಮಿಶ್ರಿತ ಇಂಧನದಲ್ಲಿ ಕಾರ್ಯನಿರ್ವಹಿಸುವ ಸಾಮರ್ಥ್ಯ ಹೊಂದಿದ್ದು, ಇಂಧನದಲ್ಲಿನ ಎಥೆನಾಲ್​ ಪ್ರಮಾಣಕ್ಕೆ ಅನುಗುಣವಾಗಿ ಇಂಜಿನ್​ ಕಾರ್ಯವೈಖರಿಯನ್ನು ಸ್ವಯಂಚಾಲಿತವಾಗಿ ಹೊಂದಿಸಿಕೊಳ್ಳುತ್ತದೆ.

ಬೆಂಗಳೂರು ಸೇರಿದಂತೆ ನಗರ ಪ್ರದೇಶಗಳಲ್ಲಿ ಪರಿಸರ ಮಾಲಿನ್ಯ ಗಂಭೀರ ಸವಾಲಾಗಿ ಪರಿಣಮಿಸಿರುವ ಸಂದರ್ಭದಲ್ಲಿ ಎಥೆನಾಲ್​ ಬಳಕೆ ಕಾರ್ಬನ್​ ಹೊರಸೂಸುವಿಕೆಯನ್ನು ತಗ್ಗಿಸುವ ಪರ್ಯಾಯ ಪರಿಹಾರವಾಗಿ ಪರಿಣಮಿಸಬಹುದೆಂಬ ನಿರೀಕ್ಷೆ ಮೂಡಿದೆ. ಮತ್ತೊಂದೆಡೆ, ಕಬ್ಬು ಬೆಳೆಗಾರರ ಉತ್ಪನ್ನಗಳಿಗೆ ಸ್ಥಿರ ಬೇಡಿಕೆ ಸೃಷ್ಟಿಯಾಗುವುದರಿಂದ ಗ್ರಾಮೀಣ ಆರ್ಥಿಕತೆಗೂ ಇದು ಬಲ ತುಂಬಲಿದೆ. ಎಥೆನಾಲ್​ ಪೂರೈಕೆಗೆ ಅಗತ್ಯ ಮೂಲಸೌಕರ್ಯ ಮತ್ತು ಇಂಧನ ಕೇಂದ್ರಗಳ ಸಂಖ್ಯೆ ಇನ್ನಷ್ಟು ಹೆಚ್ಚಳವಾಗಬೇಕಿದೆ. ಗ್ರಾಹಕರಲ್ಲಿ ಜಾಗೃತಿ ಮೂಡಿಸಿ, ಸುಲಭ ಲಭ್ಯತೆ ಕಲ್ಪಿಸುವುದು ದೊಡ್ಡ ಸವಾಲಾಗಿದೆ.

* ಕಬ್ಬು ಬೆಳೆಗಾರರಿಗೆ ಹೆಚ್ಚುವರಿ ಆದಾಯದ ಮೂಲ

* ಕೃಷಿ ತ್ಯಾಜ್ಯಕ್ಕೆ ಮೌಲ್ಯವರ್ಧನೆ

* ಪೆಟ್ರೋಲ್​ ಆಮದು ವೆಚ್ಚದಲ್ಲಿ ಉಳಿತಾಯ

* ವಾಯುಮಾಲಿನ್ಯ ಮತ್ತು ಕಾರ್ಬನ್​ ಹೊರಸೂಸುವಿಕೆ ಕಡಿತ

* ಇಂಧನ ಸ್ವಾವಲಂಬನೆಯತ್ತ ಭಾರತದ ಹೆಜ್ಜೆ

* ರಾಜ್ಯದಲ್ಲಿ ಎಥೆನಾಲ್​ಮಿಶ್ರಿತ ಇಂಧನ ಲಭ್ಯವಿರುವ ಪೆಟ್ರೋಲ್​ ಬಂಕ್​ಗಳ ಸಂಖ್ಯೆ ಸೀಮಿತ

* ಫ್ಲೆಕ್ಸ್​ ಫ್ಯುಯೆಲ್​ ವಾಹನಗಳ ಮಾರಾಟ ಮತ್ತು ಉತ್ಪಾದನೆ ಆರಂಭಿಕ ಹಂತದಲ್ಲಿದೆ

* ಗ್ರಾಹಕರಲ್ಲಿ ಎಥೆನಾಲ್​ ಇಂಧನದ ಬಗ್ಗೆ ಸಾಕಷ್ಟು ಅರಿವು ಇಲ್ಲ

* ಕಬ್ಬು ಉತ್ಪಾದನೆ, ಎಥೆನಾಲ್​ ತಯಾರಿಕೆ ಮತ್ತು ಪೂರೈಕೆ ಸರಪಳಿಯನ್ನು ನಿರಂತರವಾಗಿ ನಿರ್ವಹಿಸುವುದು ಸವಾಲಾಗಿದೆ

* ವಾಹನದ ಎಕ್ಸ್​ ಶೋರೂಂ ಬೆಲೆ 7,23,900 ರೂಪಾಯಿ

* ಲೀಟರ್​ಗೆ 23.56 ಕಿ.ಮೀ. ಮೈಲೇಜ್​

* ಐದು ವಿವಿಧ ಬಣ್ಣಗಳಲ್ಲಿ ಲಭ್ಯ