Shooting: ಚಿನ್ನ, ಕಂಚಿನ ಪದಕಕ್ಕೆ ಗುರಿಯಿಟ್ಟ 8 ತಿಂಗಳ ಗರ್ಭಿಣಿ ಮೇಘನಾ!
ನವದೆಹಲಿ: ಎಂಟು ತಿಂಗಳ ಗರ್ಭಿಣಿಯಾಗಿರುವ ಕರ್ನಾಟಕದ ಶೂಟರ್ ಮೇಘನಾ ಸಜ್ಜನರ್ (Meghana Sajjanar) ಏಷ್ಯನ್ ಶೂಟಿಂಗ್ ಚಾಂಪಿಯನ್ಷಿಪ್ನಲ್ಲಿ (Asian Championships) ಶನಿವಾರ ಚಿನ್ನ ಮತ್ತು ಕಂಚಿನ ಪದಕಕ್ಕೆ ಗುರಿಯಿಡುವ ಮೂಲಕ ಎಲ್ಲರ ಮನಗೆದ್ದಿದ್ದಾರೆ. ತುಂಬು ಗರ್ಭಿಣಿಯಾಗಿರುವ (pregnant) ನಡುವೆಯೂ ಶೂಟಿಂಗ್ ರೇಂಜ್ಗೆ ಕಾಲಿಟ್ಟು ದಿಟ್ಟತನ ಮೆರೆದಿದ್ದಲ್ಲದೆ, ಪದಕವನ್ನೂ ಬೇಟೆಯಾಡಿರುವ ಮೇಘನಾಗೆ ಅವರ ಗೆಳತಿ ಹಾಗೂ ಬ್ಯಾಡ್ಮಿಂಟನ್ ತಾರೆ ಪಿವಿ ಸಿಂಧು ಮೆಚ್ಚುಗೆ ಸೂಚಿಸಿದ್ದಾರೆ.
ಕರ್ಣಿ ಸಿಂಗ್ ರೇಂಜ್ನಲ್ಲಿ ನಡೆದ ಮಹಿಳೆಯರ 10 ಮೀ. ಏರ್ ರೈಫಲ್ ಸ್ಪರ್ಧೆಯ ತಂಡ ವಿಭಾಗದಲ್ಲಿ ಒಲಿಂಪಿಯನ್ ಇಲವೆನಿಲ್ ವಲರಿವನ್ ಮತ್ತು ಆರ್ಯ ಬೋಸ್ ಜತೆಗೂಡಿ ಚಿನ್ನ ಜಯಿಸಿದ 32 ವರ್ಷದ ಮೇಘನಾ, ವೈಯಕ್ತಿಕ ವಿಭಾಗದಲ್ಲಿ ಕಂಚಿನ ಸಾಧನೆ ಮೆರೆದರು. ಬೆಂಗಳೂರಿನ ಮೇನಾ ಅವರು ಕಳೆದ ವರ್ಷವಷ್ಟೇ ಮೋಹನ್ ಕುಮಾರ್ ಜತೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದರು.
ಇನ್ನೊಂದು ತಿಂಗಳೊಳಗೆ ತಾಯಿಯಾಗಲಿರುವ ಮೇಘನಾ, "ಇದೊಂದು ವಿಭಿನ್ನವಾದ ಅನುಭವ. ಈ ಸಮಯದಲ್ಲಿ ಶೂಟಿಂಗ್ನಲ್ಲಿ ಸ್ಪರ್ಧಿಸುವುದು ಕಠಿಣ. ಆದರೆ ನಾನು ಇದನ್ನು ನಿಭಾಯಿಸುತ್ತಿದ್ದೇನೆ' ಎಂದಿದ್ದಾರೆ.
ಈ ಹಿಂದೆ 2002ರ ಕಾಮನ್ವೆಲ್ತ್ ಗೇಮ್ಸ್ನಲ್ಲಿ ಮಹಿಳಾ ಶೂಟರ್ ಒಬ್ಬರು ಗರ್ಭಿಣಿಯಾಗಿದ್ದರೂ ಶೂಟಿಂಗ್ ಸ್ಪರ್ಧೆಯಲ್ಲಿ ಭಾಗವಹಿಸಿದ ಬಗ್ಗೆ ಕೇಳಿದ್ದೆ. ಆಕೆಗೆ ತರಬೇತಿ ನೀಡಿದ್ದ ಲಾಜ್ಲೋ ಸುಚಕ್ ನನಗೂ ಹಿಂದೆ ಕೋಚ್ ಆಗಿದ್ದರು. ಅದರನ್ವಯ ಅವರಿಂದ ಸಲಹೆಗಳನ್ನು ಪಡೆದು ಮೇಘನಾಗೆ ನೆರವಾದೆ ಎಂದು ಮೇಘನಾರ ಕೋಚ್ ರಾಕೇಶ್ ಮನ್ಪತ್ ತಿಳಿಸಿದ್ದಾರೆ.