ಬೆಂಗಳೂರು: ಭಾರತ-ಪಾಕ್ ನಡುವಿನ ಸಂಘರ್ಷದಲ್ಲಿ ಪಾಕಿಸ್ತಾನ ಪರವಾಗಿ ನಿಂತು, ಸೇನಾ ನೆರವು ನೀಡಿದ್ದ ಟರ್ಕಿ ರಾಷ್ಟ್ರ ವಿರುದ್ಧ ಕರ್ನಾಟಕದಲ್ಲಿಯೂ ಬಹಿಷ್ಕಾರ ಅಭಿಯಾನ ಶುರುವಾಗಿದೆ. ಜೊತೆಗೆ, ಭಾರತದ ಬೆನ್ನಿಗೆ ಚೂರಿ ಹಾಕಿದ್ದ ಅಜರ್ಬೈಜಾನ್ಗೂ "ಬಾಯ್ಕಾಟ್' ಬಿಸಿ ತಟ್ಟಿದೆ.
ಚೆರ್ರಿ, ಆಲಿವ್ ಆಯಿಲ್, ಮಾರ್ಬಲ್ಸ್, ಎಲೆಕ್ಟ್ರಾನಿಕ್ ವಸ್ತುಗಳು ಮತ್ತು ಫ್ಯಾಷನ್ ಸೇರಿ ಇತರೆ ಉತ್ಪನ್ನಗಳನ್ನು ಈಗಾಗಲೇ ದೇಶದಲ್ಲಿ ಬ್ಯಾನ್ ಮಾಡಲಾಗಿದೆ. ಟರ್ಕಿಯ ವಿಶೇಷ ಸೇಬು, ಒಣ ಹಣ್ಣು ಆಮದು ಮಾಡಿಕೊಳ್ಳುವುದಿಲ್ಲ ಎಂದು ಗುಜರಾತ್, ಮಹಾರಾಷ್ಟ್ರ, ದೆಹಲಿ ಸೇರಿ ದೇಶಾದ್ಯಂತ ಹಲವು ರಾಜ್ಯಗಳ ವ್ಯಾಪಾರಸ್ಥರು ಘೋಷಿಸಿದ್ದಾರೆ. ಇದೀಗ "ಬಾಯ್ಕಾಟ್' ಅಭಿಯಾನಕ್ಕೆ ಬೆಂಗಳೂರು ಸಗಟು ಬಟ್ಟೆ ವ್ಯಾಪಾರಿಗಳ ಸಂಘ ಕೈಜೋಡಿಸಿದೆ.
ಯಾವುದೇ ಕಾರಣಕ್ಕೂ ಜವಳಿ ಉತ್ಪನ್ನಗಳನ್ನು ಟರ್ಕಿ ದೇಶದಿಂದ ಆಮದು ಮಾಡಿಕೊಳ್ಳದಿರಲು ನಿರ್ಧರಿಸಿದೆ. ನಗರದಲ್ಲಿ 3 ಸಾವಿರಕ್ಕೂ ಅಧಿಕ ಸಗಟು ಬಟ್ಟೆ ವ್ಯಾಪಾರಿಗಳು ಇದ್ದಾರೆ. ಪ್ರತಿ ವರ್ಷ ಆ ದೇಶದಿಂದ ಫ್ಯಾಂಟ್, ಶರ್ಟ್, ಟವಲ್ ಸೇರಿ ಇತರೆ ಜವಳಿ ಉತ್ಪನ್ನಗಳ ಆಮದು ಮಾಡಿಕೊಳ್ಳಲಾಗುತ್ತಿತ್ತು. ಇಲ್ಲಿಂದ ಸಹ ಆ ದೇಶಕ್ಕೆ ಕೆಲ ಉತ್ಪನ್ನಗಳನ್ನು ಕಳುಹಿಸಲಾಗುತ್ತಿತ್ತು. ಇದರಿಂದ ಕೋಟ್ಯಂತರ ರೂ. ವಹಿವಾಟು ನಡೆಯುತ್ತಿತ್ತು. ಇದೀಗ ರಫ್ತು ಮತ್ತು ಆಮದು ಮಾಡಿಕೊಳ್ಳದಿರಲು ನಿರ್ಧರಿಸಿರುವ ವ್ಯಾಪಾರಿಗಳು, ಟರ್ಕಿಗೆ ಆರ್ಥಿಕ ಹೊಡೆತ ನೀಡಲು ಮುಂದಾಗಿದ್ದಾರೆ.
ಸಂಘದ ಅಧ್ಯಕ್ಷ ಪ್ರಕಾಶ್ ಪಿರ್ಗಲ್ ಮಾತನಾಡಿ, ಕಾಶ್ಮೀರದ ಪೆಹಲ್ಗಾಮ್ನಲ್ಲಿ ಉಗ್ರರು, 26 ಹಿಂದುಗಳನ್ನು ಅಮಾನುಷವಾಗಿ ಗುಂಡಿಕ್ಕಿ ಹತ್ಯೆ ಮಾಡಿದ್ದರು. ಈ ಘಟನೆ ಬಳಿಕ ನಮ್ಮ ದೇಶ, ಭಯೋತ್ಪಾದನೆ ವಿರುದ್ಧ ಕಾರ್ಯಾಚರಣೆ ನಡೆಸಲು ಮುಂದಾಗಿತ್ತು. ಈ ಸಂದರ್ಭದಲ್ಲಿ ಪಾಕಿಸ್ತಾನಕ್ಕೆ ಬೆಂಬಲವಾಗಿ ಟರ್ಕಿ ಮತ್ತು ಅಜರ್ಬೈಜಾನ್ ನಿಂತಿದ್ದವು. ಟರ್ಕಿಯಲ್ಲಿ ಭೀಕರ ಭೂಕಂಪವಾಗಿದ್ದಾಗ ಮಾನವೀಯತೆ ಆಧಾರದ ಮೇರೆಗೆ ಆ ದೇಶಕ್ಕೆ ಔಷಧ, ವೈದ್ಯರು, ವೈದ್ಯಕಿಯ ಸೇರಿ ಇತರೆ ಸಿಬ್ಬಂದಿ ಕಳುಹಿಸುವ ಮೂಲಕ ಭಾರತ ಸಹಾಯ ಮಾಡಿತ್ತು. ಈ ವಿಷಯ ಜಗತ್ತಿಗೂ ಗೊತ್ತಿತ್ತು. ಆದರೂ, ಭಾರತ ಮಾಡಿದ್ದ ಸಹಾಯವನ್ನು ಮೆರೆತ ಟರ್ಕಿ, ಪಾಕಿಸ್ತಾನಕ್ಕೆ ಬೆಂಬಲವಾಗಿ ನಿಂತಿತ್ತು. ಆದ್ದರಿಂದ, ದ್ರೋಹಿ ಟರ್ಕಿ ಉತ್ಪನ್ನಗಳನ್ನು ಆಮದು ಮಾಡಿಕೊಳ್ಳದಂತೆ ನಾವೆಲ್ಲರೂ ನಿರ್ಧರಿಸಿದ್ದೇವೆ ಎಂದು ಹೇಳಿದರು.