ಬೆಳಗಾವಿ: ಹಣಕಾಸು ವ್ಯವಹಾರಕ್ಕೆ ಸಂಬಂಧಿಸಿದ ಗಲಾಟೆಯಲ್ಲಿ ಯುವಕನೋರ್ವನನ್ನು ತಲ್ವಾರದಿಂದ ಹೊಡೆದು ಕೊಲೆ ಮಾಡಿರುವ ಘಟನೆ ತಾಲೂಕಿನ ಹುಂಚ್ಯಾನಟ್ಟಿ ಹೊರವಲಯದ ನಿರ್ಜನ ಪ್ರದೇಶದಲ್ಲಿ ಬುಧವಾರ ತಡರಾತ್ರಿ ನಡೆದಿದೆ.
ಮಜಗಾವಿಯ ರಾಹುಲ ತಳವಾರ (22) ಕೊಲೆಯಾದ ಯುವಕ. ಈತನಿಂದ ಹಣ ಪಡೆದುಕೊಂಡಿದ್ದ ಸ್ನೇಹಿತರು ಹಣ ಕೊಡುತ್ತೇವೆ ಬಾ ಎಂದು ಕರೆಯಿಸಿಕೊಂಡಿದ್ದಾರೆ. ಎಲ್ಲರೂ ಪರಿಚಯಸ್ಥರೇ ಆಗಿದ್ದರಿಂದ ಯಾವುದೇ ಸಂಶಯವಿಲ್ಲದೇ ತೆರಳಿದ್ದ ರಾಹುಲ ಜತೆಗೆ ಮೊದಲಿಗೆ ಮಾತುಕತೆ ನಡೆದಿದೆ. ಈ ವೇಳೆ ವಾಗ್ವಾದ ನಡೆದು ತಲ್ವಾರನಿಂದ ರಾಹುಲ ತಲೆ ಮತ್ತು ಕೈಗೆ ಮಾರಣಾಂತಿಕ ಹಲ್ಲೆ ನಡೆಸಿದ ಆರೋಪಿಗಳು ಪರಾರಿಯಾಗಿದ್ದಾರೆ. ತೀವ್ರ ಗಾಯಗೊಂಡಿದ್ದ ರಾಹುಲನನ್ನು ಬಿಮ್ಸ್ ಆಸ್ಪತ್ರೆಗೆ ದಾಖಲಿಸಲಾಗಿತ್ತಾದರೂ ಚಿಕಿತ್ಸೆಗೆ ಸ್ಪಂದಿಸದೇ ಸಾವಿಗೀಡಾಗಿದ್ದಾನೆ.
ಹಣ ಕೊಡುವುದಾಗಿ ಕರೆಯಿಸಿಕೊಂಡು ಕೊಲೆ ಮಾಡಿದ್ದಾರೆ ಎಂದು 9 ಜನರ ವಿರುದ್ಧ ದೂರು ದಾಖಲಾಗಿದ್ದು, ಆರೋಪಿಗಳ ಪತ್ತೆ ಕಾರ್ಯ ನಡೆದಿದೆ ಎಂದು ಬೆಳಗಾವಿ ಗ್ರಾಮೀಣ ಠಾಣೆ ಪೊಲೀಸರು ತಿಳಿಸಿದ್ದಾರೆ.
ಹೆರಾಯಿನ್ ವಶ: ತಾಲೂಕಿನ ಮುತ್ಗಾ-ಶಿಂದೊಳ್ಳಿ ರಸ್ತೆ ಪಕ್ಕದ ಗಿಡಗಂಟಿಗಳ ಮಧ್ಯ ನಿಂತು ಹೆರಾಯಿನ್ ಮಾರಾಟ ಮಾಡಲು ಯತ್ನಿಸುತ್ತಿದ್ದ ಶಿಂದೊಳ್ಳಿಯ ಸಮೀರ್ ಮಹಮ್ಮದ್ ಮುಲ್ಲಾ (21) ಬಂಧಿಸಿ ಸಿಸಿಬಿ ಪೊಲೀಸರು 3.28 ಲಕ್ಷ ರೂ. ಮೌಲ್ಯದ 16.40 ಗ್ರಾಂ. ಹೆರಾಯಿನ್ ವಶಪಡಿಸಿಕೊಂಡಿದ್ದಾರೆ. ಮುಂಬೈನ ಸಾವಂತಿ ಎಂಬಾಕೆಯಿಂದ ತಂದಿರುವುದಾಗಿ ಸಮೀರ್ ಹೇಳಿದ್ದು, ಈಕೆ ವಿರುದ್ಧವೂ ಮಾರಿಹಾಳ ಠಾಣೆಯಲ್ಲಿ ಪ್ರಕರಣ ದಾಖಲಿಸಿ, ತನಿಖೆ ಮುಂದುವರಿಸಿದ್ದಾರೆ.
ಬೆಟ್ಟಿಂಗ್ ದಾಳಿ: ಹಳೇ ತರಕಾರಿ ಮಾರುಕಟ್ಟೆ ಬಳಿ ಸಾರ್ವಜನಿಕ ಸ್ಥಳದಲ್ಲಿ ಬೆಟ್ಟಿಂಗ್ ನಡೆಸುತ್ತಿದ್ದ ಕೋನವಾಳ ಗಲ್ಲಿಯ ವಿಶಾಲ ಆದಿನಾಥ ಗೌರಗೊಂಡ (43) ನನ್ನು ಮಾರ್ಕೆಟ್ ಠಾಣೆ ಪೊಲೀಸರು ಬಂಧಿಸಿದ್ದಾರೆ. ಈತನಿಗೆ ಸಹಕರಿಸಿದ ಉತ್ತಮ ರವಿ ಜಾಧವ ವಿರುದ್ಧವೂ ಪ್ರಕರಣ ದಾಖಲಿಸಿ, ಒಟ್ಟು 5,500 ರೂ. ಮೌಲ್ಯದ ವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ.