ಜಯಂತಿ ಆಚರಿಸದ ಅಧಿಕಾರಿಗಳ ವಿರುದ್ಧ ಕ್ರಮಕ್ಕೆ ಆಗ್ರಹ

ಬೆಳಗಾವಿ: ಕಾಯಕಯೋಗಿ ಸಿದ್ಧರಾಮೇಶ್ವರ ಜಯಂತಿಯನ್ನು ಕಡ್ಡಾಯವಾಗಿ ಎಲ್ಲ ಸರ್ಕಾರಿ ಕಚೇರಿಗಳಲ್ಲಿ ಆಚರಿಸುವಂತೆ ಆದೇಶವಿದ್ದರೂ ಜಿಲ್ಲೆಯ ಅನೇಕ ಕಚೇರಿಗಳಲ್ಲಿ ಜ.14ರಂದು ಜಯಂತಿ ಆಚರಿಸಿಲ್ಲ. ಅಂತಹ ಅಧಿಕಾರಿಗಳ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಜಿಲ್ಲಾ ವಡ್ಡರ ಸಮುದಾಯದ ಮುಖಂಡರು ಆಗ್ರಹಿಸಿದ್ದಾರೆ.

ನಗರದಲ್ಲಿ ಸೋಮವಾರ ಈ ಸಂಬಂಧ ಅಪರ ಜಿಲ್ಲಾಧಿಕಾರಿಗೆ ಮನವಿ ಸಲ್ಲಿಸಿರುವ ಮುಖಂಡರು, ಕೆಲವು ಇಲಾಖೆಗಳ ಮುಖ್ಯಸ್ಥರೇ ಜಯಂತಿ ಆಚರಿಸದೆ ಆದೇಶ ಉಲ್ಲಂಘಿಸಿದ್ದಾರೆ. ಈ ಮೂಲಕ ಸಿದ್ಧರಾಮೇಶ್ವರರಿಗೆ ಅವಮಾನ ಮಾಡಿದ್ದು, ತಕ್ಷಣ ಅಂತಹ ಅಧಿಕಾರಿಗಳನ್ನು ಪತ್ತೆ ಹಚ್ಚಿ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದರು.

ರಾಜು ವಡ್ಡರ, ಮುತ್ತಪ್ಪ ವಡ್ಡರ, ಪರಶುರಾಮ ಗುಳೇದಗುಡ್ಡ, ಹನಮಂತ, ರಾಜು ಗಾಡಿವಡ್ಡರ, ಭೀಮ ವಡ್ಡರ, ಅಶೋಕ ಗಾಡಿವಡ್ಡರ, ಪರಶುರಾಮ ಗಾಡಿವಡ್ಡರ ಇತರರಿದ್ದರು.