ನೆಲಮಂಗಲ : ರೈಲ್ವೆಗೊಲ್ಲಹಳ್ಳಿ ಬಳಿ ಪ್ರೀತಿಯ ವಿಚಾರಕ್ಕೆ ಜಗಳವಾಗಿದ್ದು, ಯುವತಿಯ ಹಳೇ ಪ್ರಿಯಕರ ಹೊಸ ಪ್ರಿಯಕರನಿಗೆ ಚಾಕುವಿನಿಂದ ಇರಿದು ಕೊಲೆ ಮಾಡಿದ್ದಾನೆ.
ಗ್ರಾಮದ ನಿವಾಸಿ ದರ್ಶನ್ (24) ಕೊಲೆಯಾದವನು, ಹಳೇ ಪ್ರಿಯಕರ ವೇಣುಗೋಪಾಲ್ (27) ಕೊಲೆ ಆರೋಪಿ.
ನಗರದ ಖಾಸಗಿ ಫೈನಾನ್ಸ್ನಲ್ಲಿ ಕೆಲಸ ಮಾಡುತ್ತಿದ್ದ ದರ್ಶನ್ ಶುಕ್ರವಾರ ಸಂಜೆ 6 ಗಂಟೆಗೆ ಕೆಲಸ ಮುಗಿಸಿಕೊಂಡು ಮನೆಗೆ ತೆರಳಿದ್ದು, ಬಳಿಕ ರಾತ್ರಿ 9ಗಂಟೆಗೆ ಅದೇ ಗ್ರಾಮದ ವೇಣುಗೋಪಾಲ್ ಪಾರ್ಟಿ ಮಾಡುವುದಾಗಿ ಹೇಳಿ ಗ್ರಾಮದ ಹೊರವಲಯದಲ್ಲಿರುವ ದರ್ಶನ್ ಜಮೀನಿನ ಬಳಿ ಕರೆಸಿಕೊಂಡಿದ್ದಾನೆ. ದರ್ಶನ್, ವೇಣುಗೋಪಾಲ್ ಸೇರಿ ಕೆಲ ಸ್ನೇಹಿತರು ಮದ್ಯ ಸೇವನೆ ಮಾಡಿದ್ದಾರೆ. ಬಳಿಕ ವೇಣುಗೋಪಾಲ್ ತಾನು ಪ್ರೀತಿಸಿದ್ದ ಹುಡುಗಿಯನ್ನು ನೀನು ಪ್ರೀತಿ ಮಾಡುತ್ತಿದ್ದೀಯಾ ಎಂದಾಗ ಇಬ್ಬರ ನಡುವೆ ಜಗಳ ಶುರುವಾಗಿದೆ. ಅದು ವಿಕೋಪಕ್ಕೆ ಹೋಗಿ ಪರಸ್ಪರ ಹೊಡೆದಾಡಿಕೊಂಡಿದ್ದಾರೆ. ಕೋಪಗೊಂಡ ವೇಣುಗೋಪಾಲ್ ದರ್ಶನ್ ಹೊಟ್ಟೆ ಭಾಗಕ್ಕೆ ಚಾಕುವಿನಿಂದ ಇರಿದು ಕೊಲೆ ಮಾಡಿ ಪರಾರಿಯಾಗಿದ್ದಾನೆ.
ದರ್ಶನ್ ಜಗಳದ ವಿಷಯವನ್ನು ಪ್ರೇಯಸಿಗೆ ರೋನ್ ಮಾಡಿ ತಿಳಿಸಿದ್ದು, ಆಕೆ ದರ್ಶನ್ ಸಹೋದರನಿಗೆ ಕರೆ ಮಾಡಿ ದರ್ಶನ್ ಮೇಲಿನ ಹಲ್ಲೆ ಬಗ್ಗೆ ವಿವರಿಸಿದ್ದಾಳೆ. ವಿಚಾರ ತಿಳಿದ ಸಹೋದರ ಸ್ಥಳಕ್ಕೆ ಹೋಗಿ ನೋಡುವಷ್ಟರಲ್ಲಿ ದರ್ಶನ್ ಮೃತಪಟ್ಟಿದ್ದ. ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಸಿ.ಕೆ.ಬಾಬಾ, ಅಪರ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ನಾಗೇಶ್ಕುಮಾರ್, ಡಿವೈಎಸ್ಪಿ ಜಗದೀಶ್, ಗ್ರಾಮಾಂತರ ಠಾಣೆ ಆರಕ್ಷಕ ನಿರೀಕ್ಷಕ ನರೇಂದ್ರ ಸ್ಥಳ ಪರಿಶೀಲನೆ ನಡೆಸಿದರು.
ಇಬ್ಬರನ್ನೂ ಪ್ರೀತಿಸಿದ್ದ ಯುವತಿ: ಕಳೆದ 6 ವರ್ಷದ ಹಿಂದೆ ವೇಣುಗೋಪಾಲ್ ಜತೆ ಅದೇ ಗ್ರಾಮದ ಯುವತಿಯ ಸ್ನೇಹ ಬೆಳೆದು ನಂತರ ಅದು ಪ್ರೇಮವಾಗಿತ್ತು. ಆದರೆ 6 ತಿಂಗಳ ಹಿಂದೆ ಇಬ್ಬರ ನಡುವೆ ವೈಮನಸ್ಸು ಉಂಟಾಗಿ ದೂರವಾಗಿದ್ದರು. ಬಳಿಕ ಯುವತಿ ಅದೇ ಗ್ರಾಮದ ದರ್ಶನ್ನನ್ನು ಪ್ರೀತಿಸುತ್ತಿದ್ದಳು. ಅಲ್ಲದೆ ಮದುವೆ ಮಾಡಿಕೊಳ್ಳುವ ನಿರ್ಧಾರಕ್ಕೂ ಬಂದಿದ್ದರು. ದರ್ಶನ್ ಸಹೋದರಿಯ ವಿವಾಹ ಬಳಿಕ ಇಬ್ಬರಿಗೂ ಮದುವೆ ಮಾಡಲು ಎರಡೂ ಕುಟುಂಬಸ್ಥರು ಒಪ್ಪಿಗೆ ಸೂಚಿಸಿದ್ದರು. ಇದೇ ವಿಚಾರವಾಗಿ ಮಾತನಾಡಲು ಹಳೇ ಪ್ರಿಯಕರ ವೇಣುಗೋಪಾಲ್, ದರ್ಶನ್ನನ್ನು ಕರೆಸಿ ಹತ್ಯೆ ಮಾಡಿದ್ದಾನೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.
ಯುವತಿಯ ಹಳೇ ಪ್ರೇಮಿ ವೇಣುಗೋಪಾಲ್ ಎಂಬಾತ ದರ್ಶನ್ ಎಂಬಾತನನ್ನು ಕೊಲೆ ಮಾಡಿದ್ದಾನೆ. ರಾತ್ರಿ ಅವರ ನಡುವೆ ಮಾತಿಗೆ ಮಾತು ಬೆಳೆದು ಗಲಾಟೆ ಆಗಿದೆ. ಗಲಾಟೆ ವಿಕೋಪಹೋಗಿ ಚಾಕುವಿನಿಂದ ಇರಿದು ಕೊಲೆ ಮಾಡಿದ್ದಾನೆ. ಕೊಲೆ ಆರೋಪಿಯ ಬಗ್ಗೆ ಮಾಹಿತಿ ಇದೆ. ತನಿಖೆಗೆ ತಂಡ ರಚನೆ ಮಾಡಿದ್ದು, ಶ್ರೀದಲ್ಲೇ ಬಂಧನ ಮಾಡಲಾಗುವುದು. | ಸಿ.ಕೆ.ಬಾಬಾ ಬೆಂಗಳೂರು ಗ್ರಾಮಾಂತರ ಎಸ್ಪಿ