ವಿಜಯವಾಣಿ ಸುದ್ದಿಜಾಲ ಧಾರವಾಡ
ಕಲಾ ಕ್ಷೇತ್ರದಲ್ಲಿ ಅವಿಸ್ಮರಣೀಯ ಸೇವೆ ಸಲ್ಲಿಸಿರುವ ಎಂ.ಆರ್. ಬಾಳಿಕಾಯಿ ಅವರು ಇಂದಿನ ಯುವಕರಿಗೆ ಮಾದರಿಯಾಗಿದ್ದಾರೆ ಎಂದು ಕೇಂದ್ರೀಯ ಆಡಳಿತ ನ್ಯಾಯ ಮಂಡಳಿ ಸದಸ್ಯ ಡಾ. ಸಂಜೀಕುಮಾರ ಹೇಳಿದರು.
ನಗರದ ಆಲೂರು ವೆಂಕಟರಾವ್ ಭವನದಲ್ಲಿ ಶನಿವಾರ ಏರ್ಪಡಿಸಿದ್ದ ಎಂ.ಆರ್. ಬಾಳಿಕಾಯಿ ಅಭಿನಂದನಾ ಸಮಾರಂಭದಲ್ಲಿ ಮಾನಸ್ತಂಭ ಅಭಿನಂದನಾ ಗ್ರಂಥ ಬಿಡುಗಡೆಗೊಳಿಸಿ ಅವರು ಮಾತನಾಡಿದರು.
ಅಭಿನಂದನೆ ಗ್ರಂಥವಾಗಿ ಬಿಡುಗಡೆಯಾದ ಮಾನಸ್ತಂಭವು ಅಭಿನಂದನೆಗೆ ಸೀಮಿತವಾಗಿಲ್ಲ. ಆ ಗ್ರಂಥದಲ್ಲಿ ಎಂ.ಆರ್. ಬಾಳಿಕಾಯಿ ಅವರ ಜೀವನ ಚರಿತ್ರೆ ಸಿಗಲಿದೆ. ಅವರ ಕಲೆ, ಸಾಧನೆ, ಜೀವನದಲ್ಲಿ ಪಟ್ಟ ಕಷ್ಟ, ಪ್ರಶಸ್ತಿಗಳು, ಹೀಗೆ ಇಡೀ ಜೀವನದ ಚಿತ್ರಣ ಸಿಗಲಿದೆ. ಹೀಗಾಗಿ ಈ ಗ್ರಂಥ ಯುವಕರಿಗೆ ಸಹಕಾರಿಯಾಗಿದೆ ಎಂದರು.
ಜೆಎಸ್ಎಸ್ ಕಾರ್ಯದರ್ಶಿ ಡಾ. ಅಜಿತ ಪ್ರಸಾದ ಅವರು ವೈವಿಧ್ಯಮಯ ರೇಖಾ ಚಿತ್ರಗಳು ಪುಸ್ತಕ ಬಿಡುಗಡೆಗೊಳಿಸಿ ಮಾತನಾಡಿ, ಎಂ.ಆರ್. ಬಾಳಿಕಾಯಿ ಅವರು ಕಲೆಯಲ್ಲಿ ಸಾಕಷ್ಟು ಸಾಧನೆ ಮಾಡಿದ್ದರೂ, ಯಾವುದೇ ಅಹಂ ಇಲ್ಲದೆ ಅತ್ಯಂತ ಸರಳವಾಗಿಯೇ ಜೀವನ ಸಾಗಿಸುತ್ತಿದ್ದಾರೆ. ಈ ಮನೋಭಾವವೇ ಅವರು ಎತ್ತರಕ್ಕೆ ಬೆಳೆಯಲು ಕಾರಣವಾಗಿದೆ. ರೇಖಾ ಚಿತ್ರದ ಸಂರ್ಪೂಣ ಮಾಹಿತಿ ಈ ಪುಸ್ತಕದಲ್ಲಿ ಸಿಗಲಿದೆ. ಬಾಳಿಕಾಯಿ ಅವರಿಂದ ಇನ್ನೂ ಹೆಚ್ಚಿನ ಸೇವೆ ಸಿಗಲಿ ಎಂದರು.
ಅಭಿನಂದನಾ ಗ್ರಂಥ ಕುರಿತು ನರಸಿಂಹ ಪರಾಂಜಪೆ ಮಾತನಾಡಿದರು. ರಿತು ಕಕ್ಕರ್, ವಿ.ಟಿ. ಕಾಳೆ ಮಾತನಾಡಿದರು. ನಿಡಸೋಸಿಯ ಶ್ರೀ ಜಗದ್ಗುರು ದುರದುಂಡೀಶ್ವರ ಸಿದ್ದ ಸಂಸ್ಥಾನಮಠದ ಶ್ರೀ ಶಿವಲಿಂಗೇಶ್ವರ ಸ್ವಾಮೀಜಿ ಸಾನ್ನಿಧ್ಯ ವಹಿಸಿದ್ದರು. ಡಾ. ಜೆ.ಎಚ್. ಕುಲಕರ್ಣಿ ಅಧ್ಯಕ್ಷತೆ ವಹಿಸಿದ್ದರು.
ಎಂ.ಆರ್. ಬಾಳಿಕಾಯಿ, ಡಾ. ಆರ್.ಎ. ಬಾಳಿಕಾಯಿ, ದೇವಗೌಡ ಮಲಗೌಡನವರ, ಬಾಳಿಕಾಯಿ ಕುಟುಂಬಸ್ಥರು, ಶಿಷ್ಯಂದಿರುವ, ಇತರರು ಇದ್ದರು. ಎಸ್.ಕೆ. ಪತ್ತಾರ ಸ್ವಾಗತಿಸಿದರು. ಬಸವರಾಜ ಕುರಿಯವರ ಪ್ರಾಸ್ತಾವಿಕವಾಗಿ ಮಾತನಾಡಿದರು.