ಬೆಂಗಳೂರು:ಭಾರತೀಯ ಮಾನಕ್ ಬ್ಯುರೋ (ಬಿಐಎಸ್) ಬೆಂಗಳೂರು ಶಾಖೆ, ಮಂಗಳವಾರ ನಗರದಲ್ಲಿ ಆಯೋಜಿಸಲಾಗಿದ್ದ "ಮನಕ್ ಮಂಥನ್' ಮತ್ತು "ಮನಕ್ ಸಂವಾದ' ಕಾರ್ಯಕ್ರಮಗಳು ಯಶಸ್ವಿಯಾಗಿ ಸಂಪನ್ನಗೊಂಡಿತ್ತು. ಮಾನದಂಡಗಳ ಸೂತ್ರೀಕರಣ, ಪರಿಷ್ಕರಣೆ ಮತ್ತು ಅನುಷ್ಠಾನದಲ್ಲಿ ಉದ್ಯಮ ಒಳಗೊಳ್ಳುವಿಕೆ ಬಲಪಡಿಸುವ ಗುರಿಯನ್ನು ಈ ಉಪಕ್ರಮ ಹೊಂದಿತ್ತು.
ಬಿಐಎಸ್ ಬೆಂಗಳೂರು ಶಾಖಾ ಕಚೇರಿ ನಿರ್ದೇಶಕಿ ಎಂ.ಸುಷ್ಮಾರಾವ್ ಮಾತನಾಡಿ, ಗುಣಮಟ್ಟ ಚಾಲಿತ ಪರಿಸರ ವ್ಯವಸ್ಥೆ ರೂಪಿಸುವಲ್ಲಿ ಮಾನದಂಡಗಳ ಪಾತ್ರ ನಿರ್ಣಾಯಕವಾಗಿದೆ ಎಂದರು. ಪ್ರಮಾಣೀಕರಣ ಪ್ರಕ್ರಿಯೆಯಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಳ್ಳಲು ಪ್ರೋತ್ಸಾಹಿಸಿದರು.
ಬಿಐಎಸ್ ಬೆಂಗಳೂರು ಶಾಖಾ ಕಚೇರಿಯ ಜಂಟಿ ನಿರ್ದೇಶಕ ಕೆ.ರಾಜಶೇಖರ್ ಮಾತನಾಡಿ, ನಮ್ಮ ಸಂಸ್ಥೆ, ಪ್ಯಾಕಿಂಗ್ ಮೇಲೆ ಐಎಸ್ಐ ಗುರುತು, ಸಂಸ್ಕರಣೆ, ವಿತರಣೆ, ಸಾಗಣೆ ಹಾಗೂ ಗುಣಮಟ್ಟ ಮಾನದಂಡಗಳ ಸುರಕ್ಷತೆ ಕುರಿತು ಅರಿವು ಮೂಡಿಸುತ್ತಿದೆ.ತಯಾರಿಕಾ ಕಂಪನಿಗಳು ಕಡ್ಡಾಯವಾಗಿ ಬಿಐಎಸ್ ಪರವಾನಗಿ ಪಡೆದು ಉತ್ಪನ್ನ ತಯಾರಿಸಬೇಕು. ಗ್ರಾಹಕರ ರಕ್ಷಣೆಯೇ ನಮ್ಮ ಗುರಿ ಎಂದು ಹೇಳಿದರು.
ಪರವಾನಗಿ ನಿಯಮ, ಪ್ರಮಾಣಿತ ಗುರುತುಗಳ ಕಾನೂನುಬದ್ಧ ಬಳಕೆ, ಕಾರ್ಯಾಚರಣೆಯ ಮಾರ್ಗಸೂಚಿಗಳಲ್ಲಿನ ಇತ್ತೀಚಿನ ನವೀಕರಣ, ಪರೀಕ್ಷಾ ವರದಿಗಳು ಸಕಾಲಿಕ ಸಲ್ಲಿಕೆ, ತಪಾಸಣೆಗಳಿಗೆ ತಯಾರಿ, ಆನ್ಲೈನ್ ಬಳಕೆ ಸೇರಿ ಬಿಐಎಸ್ ಕಾರ್ಯಾಚರಣೆಗಳ ಅವಲೋಕವನ್ನು ಪ್ರಸ್ತುತಪಡಿಸಲಾಯಿತು.
ಈ ವೇಳೆ ಪರಸ್ಪರ ಸಹಯೋಗ ಬಲಪಡಿಸಲು ಪಾಲುದಾರರಿಂದ ಅಭಿಪ್ರಾಯಗಳನ್ನು ಸಂಗ್ರಹಿಸಲಾಯಿತು. ಬಿಐಎಸ್ ವಿಜ್ಞಾನಿ ನರೇಂದರ್ ರೆಡ್ಡಿ ಬೀಸು ಸೇರಿ ವಿವಿಧ ವಲಯಗಳ ಪಾಲುದಾರರು ಭಾಗಿಯಾಗಿದ್ದರು.