ರಾಜಾಂಗಣದಲ್ಲಿ 'ಆಲೆಮನೆ' ದರ್ಬಾರ್​...!

ಶ್ರೀಕೃಷ್ಣನ ಸನ್ನಿಧಿಯಲ್ಲಿ ಕೋಣನ ಗಾಣ

ಜಮಾನಸಕ್ಕೆ ಸಂಪ್ರದಾಯ ತಿಳಿಸುವ ಯತ್ನ

ಪ್ರಶಾಂತ ಭಾಗ್ವತ, ಉಡುಪಿ

ಮಲೆನಾಡು ಭಾಗದ ಜನಪ್ರಿಯ ಹಾಗೂ ಸಂಪ್ರದಾಯವಾದ ಆಲೆಮನೆಯು ಕಡಲ ನಗರಿ ಉಡುಪಿಯ ಶ್ರೀಕೃಷ್ಣ ಮಠದ ರಾಜಾಂಗಣದ ಬಳಿ ದರ್ಬಾರ್​ ನಡೆಸುತ್ತಿದೆ. ಯಾಂತ್ರಿಕ ಯುಗದಲ್ಲಿ ತನ್ನ ಛಾಪು ಕಳೆದುಕೊಳ್ಳುತ್ತಿದ್ದರೂ ಸಹ ಆಲೆಮನೆ ತನ್ನ ಅಸ್ತಿತ್ವ ಹಾಗೂ ಮಹತ್ವವನ್ನು ಪ್ರವಾಸಿಗರಿಗೆ, ಭಕ್ತರಿಗೆ ಅರುಹುತ್ತಿದೆ.

ಮರೆಯಾಗುತ್ತಿರುವ ಆಲೆಮನೆ ಸಂಸ್ಕೃತಿಯನ್ನು ಮತ್ತೆ ಜನಮಾನಸಕ್ಕೆ ತಲುಪಿಸಲು ಪರ್ಯಾಯ ಪುತ್ತಿಗೆ ಮಠ ಮುಂದಾಗಿದೆ. ಭಗವದ್ಗೀತೆಯ ಪ್ರಸಾರಕ್ಕೆ ಮೀಸಲಾಗಿದ್ದ ಗೀತಾಮಂದಿರದಲ್ಲಿ ದೇಸೀಯ ಆಚಾರ-ವಿಚಾರಗಳಿಗೆ ಮರುಜೀವ ನೀಡುವಂತಾಗಲು ಭಾರತ ಮೇಳ ಆಯೋಜಿಸಿದ್ದು, ಅದರಲ್ಲಿ ಆಲೆಮನೆ ಗಮನ ಸೆಳೆಯುತ್ತಿದೆ.

ಶಿವಮೊಗ್ಗ ಜಿಲ್ಲೆಯ ಆಲೆಮನೆ

ದುಡಿಯುವ ಕೋಣಗಳಿಗೆ ಹಾಡಿನ ರಂಜನೆ

ಉಡುಪಿಯಲ್ಲಿ ಆಲೆಮನೆ ತೆರೆದಿರುವ ಚಂದ್ರಶೇಖರ ಅವರು ಜತೆಯಲ್ಲಿ ನಾಲ್ಕು ಬಲಿಷ್ಠವಾದ ಕೋಣಗಳನ್ನು ತಂದಿದ್ದಾರೆ. ಅವುಗಳಲ್ಲಿ ಎರಡು ಕೋಣಗಳಿಗೆ ಬೆಳ್ಳು, ಇನ್ನೆರಡು ಕೋಣಗಳಿಗೆ ಕಾಳು ಎಂದು ಹೆಸರಿಟ್ಟಿದ್ದಾರೆ. ಒಂದು ಜೋಡಿಗೆ ಬೆಳಗಿನ ಅವಧಿಯಲ್ಲಿ ಹಾಗೂ ಇನ್ನೊಂದು ಜೋಡಿಗೆ ಸಂಜೆಯ ಅವಧಿಯಲ್ಲಿ ಆಲೆಮನೆಯ ಗಾಣ ತಿರುಗಿಸುವ ಕೆಲಸಕ್ಕೆ ನೇಮಿಸುತ್ತಾರೆ. ಗಾಣ ತಿರುಗಿಸುವಾಗ ಕೋಣಗಳಿಗೆ ಹರುಷವಾಗಲೆಂದು ಚಂದ್ರಶೇಖರ ಅವರೇ ವಿಶಿಷ್ಟ ಸ್ವರದಲ್ಲಿ ಮೂಡು ದಿಕ್ಕಿನ ಮನೆಯೋ ನಡೆಯೋ ಬೆಳ್ಳು, ಹಾದಿಯಲಿ ಕಲ್ಲು-ಮುಳ್ಳು ನಡೆಯೋ ಕಾಳು ಎಂದು ಹಾಡುತ್ತಾರೆ. ಕಬ್ಬಿನ ಹಾಲು ಕುಡಿಯಲು ಬರುವ ಗ್ರಾಹಕರೂ ಈ ಹಾಡನ್ನು ಕೇಳಿ ಸಂತಸಗೊಳ್ಳುತ್ತಿದ್ದಾರೆ.