ಕಂಪ್ಲಿ: ರೈತರ ಅನುಕೂಲಕ್ಕಾಗಿ ಕೂಡಲೇ ಎಲ್ಎಲ್ ಮತ್ತು ಎಚ್ಎಲ್ ಕಾಲುವೆಗಳಿಗೆ ನೀರು ಹರಿಸುವಂತೆ ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆ ಜಿಲ್ಲಾಧ್ಯಕ್ಷ ಬಿ.ವಿ.ಗೌಡ ಒತ್ತಾಯಿಸಿದರು.
ವಿಜಯನಗರ ಜಿಲ್ಲೆಯ ನಾಗೇನಹಳ್ಳಿ ಎಲ್ಎಲ್ ಕಾಲುವೆಯ 9ನೇ ಕಿ.ಮೀ.ಬಳಿ ನಡೆಯುತ್ತಿರುವ ಸೇತುವೆ ಕಾಮಗಾರಿ ವೀಕ್ಷಿಸಿ ಭಾನುವಾರ ಮಾತನಾಡಿದರು.
ಜಲಾಶಯದಿಂದ ತುಂಗಭದ್ರಾ ನದಿಗೆ ಕಳೆದ ಮೂರು ದಿನಗಳಿಂದ 80ಸಾವಿರ ಕ್ಯೂಸೆಕ್ ನೀರು ವೃಥಾ ಹರಿಯುತ್ತಿದೆ. ಇದೇ ನೀರನ್ನು ಎಲ್ಎಲ್ ಮತ್ತು ಎಚ್ಎಲ್ ಕಾಲುವೆ ಮೂಲಕ ಹರಿಸಿದಲ್ಲಿ ಕೃಷಿ ಚಟುವಟಿಕೆಗಳಿಗೆ ಅನುಕೂಲವಾಗುತ್ತದೆ. ಎಲ್ಎಲ್ ಕಾಲುವೆಯ 70ಕಿ.ಮೀ.ನಂತರ ಕಾಮಗಾರಿ ಸದ್ಯ ನಡೆಯುತ್ತಿದೆ.
ಇದರ ಹಿಂದೆ 9ನೇ ಕಿ.ಮೀ ಮತ್ತು 15ನೇ ಕಿ.ಮೀ ಬಳಿ ಸೇತುವೆ ಕಾಮಗಾರಿ ಮುಗಿದಿದ್ದು ಸೇತುವೆಗೆ ಅಳವಡಿಸಿದ ಸೆಂಟ್ರಿಂಗ್ ತೆರವುಗೊಳಿಸಿ ನೀರು ಹರಿಸಬೇಕಿದೆ. ಕಾಲುವೆ ಕಾಮಗಾರಿಗಳನ್ನು ನೀರು ಬಿಡುವ ಸಮಯಕ್ಕೆ ಮುನ್ನ ಮುಕ್ತಾಯಗೊಳಿಸಬೇಕು ಎಂದು ತುಂಗಭದ್ರಾ ಜಲಾಶಯದ ಅಧಿಕಾರಿಗಳನ್ನು ಒತ್ತಾಯಿಸಿದರು.