ಕೋಚಿಮುಲ್​ ವಿಭಜನೆಗೆ ಸಮ್ಮತಿ

ಚಿಕ್ಕಬಳ್ಳಾಪುರಕ್ಕೆ ಪ್ರತ್ಯೇಕ ಒಕ್ಕೂಟ - ಆಡಳಿತಾಧಿಕಾರಿಗಳ ನೇಮಕ ಶೀಘ್ರ

ಕೋಲಾರ: ಕೋಲಾರ-ಚಿಕ್ಕಬಳ್ಳಾಪುರ ಹಾಲು ಒಕ್ಕೂಟ (ಕೋಚಿಮುಲ್​) ವಿಭಜನೆ ಕನಸು ನನಸಾಗಿದೆ. ಒಕ್ಕೂಟವನ್ನು ವಿಭಜನೆ ಮಾಡಿ ಪ್ರತ್ಯೇಕ ಒಕ್ಕೂಟ ಸ್ಥಾಪನೆ ಮಾಡಬೇಕು ಎಂಬ ಚಿಕ್ಕಬಳ್ಳಾಪುರ ಹಾಲು ಉತ್ಪಾದಕರ ಬೇಡಿಕೆ ಈಡೇರಿದೆ.
ಕೋಲಾರ&ಚಿಕ್ಕಬಳ್ಳಾಪುರ ಒಕ್ಕೂಟವನ್ನು ವಿಭಜನೆ ಮಾಡಿ ಚಿಕ್ಕಬಳ್ಳಾಪುರ ಜಿಲ್ಲೆಗೆ ಪ್ರತ್ಯೇಕ ಹೊಸ ಒಕ್ಕೂಟ ಸ್ಥಾಪಿಸಲು ರಾಜ್ಯ ಸರ್ಕಾರ ಸೂಚನೆ ಮೇರೆಗೆ ಸಹಕಾರ ಸಂಘಗಳ ಜಂಟಿ ನಿಬಂಧಕರು ಸೆ.25ರಂದು ಆದೇಶ ಹೊರಡಿಸಿದ್ದಾರೆ.
ಕೋಲಾರ ಹಾಲು ಒಕ್ಕೂಟವನ್ನು ವಿಭಜನೆ ಮಾಡಬೇಕು ಎಂದು ಒಕ್ಕೂಟದ ಚಿಕ್ಕಬಳ್ಳಾಪುರ ಜಿಲ್ಲೆಯ ಮಾಜಿ ನಿರ್ದೇಶಕರು, ಹಾಲು ಉತ್ಪಾದಕರ ಬಹುವರ್ಷಗಳ ಬೇಡಿಕೆಯಾಗಿತ್ತು. ಈ ಸಂಬಂಧ ರಾಜಕೀಯವಾಗಿ ಅಡೆ- ತಡೆಗಳಿದ್ದವು.
ಕೋಲಾರ ಜಿಲ್ಲೆಯಿಂದ ಪ್ರತ್ಯೇಕ ಮಾಡಲು ಚಿಕ್ಕಬಳ್ಳಾಪುರ ಜಿಲ್ಲೆಯ ಜನಪ್ರತಿನಿಧಿಗಳು ಆಸಕ್ತಿ ತೋರಿ ಕಳೆದ ಬಿಜೆಪಿ ಸರ್ಕಾರದ ಅವಧಿಯಲ್ಲಿ ವಿಭಜನೆ ಮಾಡಿ ಆದೇಶಿಸಿ, ಆಡಳಿತಾಧಿಕಾರಿಯನ್ನೂ ನೇಮಕ ಮಾಡಲಾಗಿತ್ತು, ಇದರಿಂದಾಗಿ ಪ್ರತ್ಯೇಕ ಒಕ್ಕೂಟಗಳಲ್ಲಿ ಚಟುವಟಿಕೆಗಳು ಸಹ ಮುಂದುವರಿದಿದ್ದವು.
ಆದರೆ ಚಿಕ್ಕಬಳ್ಳಾಪುರ ನಿರ್ದೇಶಕರು ಅಧಿಕಾರದಲ್ಲಿ ಮುಂದುವರಿಯಲು ಅವಕಾಶವಿಲ್ಲ ಎಂಬ ಷರತ್ತು ವಿಧಿಸಿದ್ದರಿಂದ ಕೋರ್ಟ್​ ಮೋರೆ ಹೋದರು. ಅಷ್ಟರೊಳಗೆ ಸರ್ಕಾರ ಬದಲಾದ ಕಾರಣ ಪ್ರಾಬಲ್ಯ ಬಳಸಿ ಆದೇಶ ರದ್ದುಗೊಳಿಸಿ ಕೋಚಿಮುಲ್​ ಆಡಳಿತ ಮಂಡಳಿಯಲ್ಲಿ ನಿರ್ದೇಶಕರಾಗಿ ಮುಂದುವರಿಯುವಂತೆ ಅವಕಾಶ ಪಡೆದುಕೊಂಡಿದ್ದರು.
ನಂತರ ಅಧಿಕಾರಕ್ಕೆ ಬಂದ ಕಾಂಗ್ರೆಸ್​ ಸರ್ಕಾರವು ಬಿಜೆಪಿ ಸರ್ಕಾರದ ಆದೇಶ ರದ್ದುಗೊಳಿಸಿ, ಯಥಾವತ್ತಾಗಿ ಕೋಮುಲ್​ ಒಕ್ಕೂಟವು ಮುಂದುವರಿಯಲು ನಿರ್ದೇಶಿಸಿತು. ಇದು ಬಿಜೆಪಿ ಮತ್ತು ಕಾಂಗ್ರೆಸ್​ ಮುಖಂಡರ ನಡುವೆ ರಾಜಕೀಯ ತಿಕ್ಕಾಟಕ್ಕೆ ಕಾರಣವಾಗಿತ್ತು. ಈಗ ಹೊಸ ಆದೇಶ ಹೊರ ಬೀಳುತ್ತಿದ್ದಂತೆ ಎಲ್ಲದಕ್ಕೂ ತೆರೆ ಬಿದ್ದಂತಾಗಿದೆ.
ಸರ್ಕಾರವು ಶ್ರೀದಲ್ಲೇ ಎರಡು ಒಕ್ಕೂಟಗಳಿಗೆ ಪ್ರತ್ಯೇಕ ಆಡಳಿತಾಧಿಕಾರಿಗಳನ್ನು ನೇಮಿಸಲಾಗುವುದು ಎಂದು ಸಹಕಾರ ಇಲಾಖೆ ಆದೇಶದಲ್ಲಿ ಸ್ಪಷ್ಪಪಡಿಸಿದೆ. ಇನ್ನಾದರೂ ಚುನಾವಣೆ ಸಕಾಲಕ್ಕೆ ನಡೆಯುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ.
2024ರ ಸೆ.23ರಂದು ನಡೆದ ಒಕ್ಕೂಟದ ವಿಶೇಷ ಸಾಮಾನ್ಯ ಸಭೆಯಲ್ಲಿ ಕಾನೂನು ಅಭಿಪ್ರಾಯ ಪರಿಗಣಿಸಿ, ಸರ್ವಾನುಮತದಿಂದ ತೀರ್ಮಾನಿಸಿ ವಿಭಜನೆ ಮಾಡಿ ರ್ನಿಣಯ ಕೈಗೊಳ್ಳಲಾಗಿದೆ. ಇದಕ್ಕೆ ಯಾರೂ ಆಕ್ಷೇಪ ವ್ಯಕ್ತಪಡಿಸಲಿಲ್ಲ. ಇದರಿಂದಾಗಿ ಸರ್ಕಾರವು ಒಕ್ಕೂಟ ವಿಭಜನೆಗೆ ಆದೇಶ ನೀಡಲಾಗಿದೆ ಎಂದು ನಮೂದು ಮಾಡಲಾಗಿದೆ.

• 1,928 ಸಂಗಳು ಸಕ್ರಿಯ
  ಕೋಲಾರ&ಚಿಕ್ಕಬಳ್ಳಾಪುರ ಜಿಲ್ಲೆಗಳಲ್ಲಿ ಒಟ್ಟು 1,928 ಪ್ರಾಥಮಿಕ ಹಾಲು ಸಹಕಾರ ಸಂಗಳು ಸಕ್ರಿಯವಾಗಿದ್ದು, ಕೋಲಾರ ಜಿಲ್ಲೆಯಲ್ಲಿ 952 ಹಾಗೂ ಚಿಕ್ಕಬಳ್ಳಾಪುರ 976 ಸಂಗಳು ಕಾರ್ಯನಿರ್ವಹಿಸುತ್ತಿವೆ. ಎರಡೂ ಜಿಲ್ಲೆಗಳಿಂದ ಪ್ರತಿ ದಿನ 11 ಲಕ್ಷಕ್ಕೂ ಹೆಚ್ಚು ಲೀಟರ್​ ಹಾಲು ಪೂರೈಕೆಯಾಗುತ್ತಿದೆ. ಎರಡೂ ಜಿಲ್ಲೆಗಳಿಂದ 13 ಮಂದಿ ನಿರ್ದೇಶಕರು ಆಯ್ಕೆಯಾಗಿದ್ದು, ಈಗ 2 ಒಕ್ಕೂಟಗಳಿಗೆ ಪ್ರತ್ಯೇಕವಾಗಿ ಚುನಾವಣೆ ನಡೆಯಲಿದೆ.
  
• ಮುಸುಕಿನ ಗುದ್ದಾಟಕ್ಕೆ ಕಾರಣ
  ಕೋಲಾರ&ಚಿಕ್ಕಬಳ್ಳಾಪುರ ಒಕ್ಕೂಟದ ವಿಭಜನೆಯ ವಿಚಾರವು ಮಾಜಿ ಹಾಗೂ ಹಾಲಿ ನಿರ್ದೇಶಕರಿಗೆ ಪ್ರತಿಷ್ಠೆಯ ಪ್ರಶ್ನೆಯಾಗಿತ್ತು. ಜತೆಗೆ ಬಿಜೆಪಿ ಹಾಗೂ ಕಾಂಗ್ರೆಸ್​ ಮುಖಂಡರ ಮುಸುಕಿನ ಗುದ್ದಾಟಕ್ಕೆ ಕಾರಣವಾಗಿತ್ತು. ಹಿಂದೆ ಬಿಜೆಪಿ ಸರ್ಕಾರದ ಮಾಡಿದ್ದ ಆದೇಶವನ್ನು ಕಾಂಗ್ರೆಸ್​ ಸರ್ಕಾರ ರದ್ದುಗೊಳಿಸಿತು. ವಿಭಜನೆಯ ಕೀರ್ತಿ ಬಿಜೆಪಿ ಮುಖಂಡರಿಗೆ ಸಲ್ಲುತ್ತದೆ ಎಂದು ಕಾಂಗ್ರೆಸ್​ನವರು ಪ್ರತಿಷ್ಠೆಯಾಗಿ ತೆಗೆದುಕೊಂಡಿದ್ದರು. ಈಗ ರದ್ದುಗೊಳಿಸಿದ್ದ ಆದೇಶವನ್ನೇ ಸಹಕಾರ ಇಲಾಖೆಯು ಯಥಾವತ್ತಾಗಿ ಮುಂದುವರಿಸುವಂತೆ ಮಾಡಿದೆ.
  

• ಹೋರಾಟಕ್ಕೆ ಜಯ
  ಒಂದೂವರೆ ವರ್ಷದ ಹೋರಾಟಕ್ಕೆ ಜಯ ಸಿಕ್ಕಿದೆ. ಆಗ ವಿಭಜನೆ ಮಾಡಿ ಆದೇಶಿಸಿದಾಗ ಪ್ಯಾಕಿಂಗ್​ ಟಕ ಇಲ್ಲ ಎಂದು ಸರ್ಕಾರದ ಮೇಲೆ ಒತ್ತಡ ತಂದು ರದ್ದುಗೊಳಿಸಿದರು. ಈಗ ಮತ್ತೆ ವಿಭಜನೆ ಮಾಡಿ ಪ್ರತ್ಯೇಕ ಒಕ್ಕೂಟ ರಚನೆಗೆ ಸರ್ಕಾರ ಆದೇಶಿಸಿದೆ. ಒಕ್ಕೂಟವು ಆರಂಭದಲ್ಲಿ ನಡೆಯಬೇಕಾದರೆ ಕೆಲ ಅನುಕೂಲ ಮಾಡಿಕೊಡಬೇಕಾಗಿದ್ದು, ಈಗಿನ ಆಡಳಿತ ಮಂಡಳಿ ಗಮನ ಹರಿಸಬೇಕು ಎಂದು ಚಿಕ್ಕಬಳ್ಳಾಪುರ ಹಾಲು ಉತ್ಪಾದಕರು ಒತ್ತಾಯಿಸಿದ್ದಾರೆ. ಹಿಂದೆ ಆಗಿದ್ದ ಆದೇಶವನ್ನೇ ಯಥಾವತ್ತಾಗಿ ಮುಂದುವರಿಸಲು ಸಹಕಾರ ಇಲಾಖೆ ಆದೇಶಿಸಿದ್ದು, ಆದೇಶದಲ್ಲಿ ಯಾವುದೇ ರೀತಿ ಬದಲಾವಣೆಗಳು ಆಗಿಲ್ಲ. ಕಾರ್ಯಚಟುವಟಿಕೆ ನಡೆಸಲು ಕೋಮುಲ್​ ಆಡಳಿತ ಮಂಡಳಿ ಸಂಪನ್ಮೂಲ ಕಲ್ಪಿಸಬೇಕು ಎಂದು ಒತ್ತಾಯಿಸಿದ್ದಾರೆ.

ಒಕ್ಕೂಟದ ವಿಭಜನೆಗೆ ಸರ್ವ ಸದಸ್ಯರ ರ್ನಿಣಯ ಸಿಕ್ಕಿದೆ. ಇದಕ್ಕೆ ಸರ್ಕಾರವು ಆದೇಶ ಮಾಡಿದ್ದು, ಮುಂದಿನ ಚಟುವಟಿಕೆಗಳಲ್ಲಿ ಕೈಗೊಳ್ಳಲು ಸಮಿತಿ ರಚನೆಯಾದ ನಂತರ ಅಂತಿಮಗೊಳ್ಳಲಿದೆ.

ಬರಿಗೈಯಲ್ಲಿ ವಿಭಜನೆ ಮಾಡಲುವ ಬದಲು ಒಕ್ಕೂಟ ನಡೆಯಲು ಅಗತ್ಯ ಬೇಕಿರುವ ಪ್ಯಾಕಿಂಗ್​ ಘಟಕಕ್ಕೆ ಅನುದಾನ ಕೊಟ್ಟು ಈಗಿನ ಅಧ್ಯಕ್ಷರು ಪುಣ್ಯ ಕಟ್ಟಿಕೊಳ್ಳಲ್ಲಿ, ಅಧ್ಯಕ್ಷರನ್ನು ಚಿಕ್ಕಬಳ್ಳಾಪುರಕ್ಕೆ ಕರೆಸಿ ಸನ್ಮಾನ ಮಾಡುತ್ತೇವೆ.