ಮುಳಬಾಗಿಲು: ಸಂಜೆಯಾಗುತ್ತಲೇ ಸೇವೆಯನ್ನು ಸ್ಥಬ್ಧಗೊಳಿಸುವ ಸಾರಿಗೆ ಸಂಸ್ಥೆ ಮುಳಬಾಗಿಲು ಜನರನ್ನು ಮರೆತಿರುವುದರಿಂದ ಪ್ರಯಾಣಿಕರ ಪರದಾಟ ಸಾಮಾನ್ಯವಾಗಿದೆ.
ಕರೊನಾ ಕಾಲಘಟ್ಟದಲ್ಲಿ ಮುಚ್ಚಿದ್ದ ಸಾರಿಗೆ ಸೇವೆ ನಂತರ ಹಂತ ಹಂತವಾಗಿ ಚೇತರಿಕೆ ಕಂಡು ಸುಧಾರಿಸುವ ವೇಳೆಗೆ ರಾಜ್ಯದಲ್ಲಿ ಅಧಿಕಾರಕ್ಕೆ ಬಂದ ಕಾಂಗ್ರೆಸ್ ಸರ್ಕಾರ ಶಕ್ತಿ ಯೋಜನೆ ಜಾರಿಗೆ ತಂದ ಪರಿಣಾಮ ಜನ ಕೆಎಸ್ಆರ್ಟಿಸಿ ಬಸ್ನತ್ತ ಮುಖ ಮಾಡಿದ್ದು, ಜತೆಗೆ ಹೆಚ್ಚುವರಿ ಪ್ರಯಾಣಿಕರ ಸಂಚಾರದಿಂದ ಸಾರಿಗೆ ಸಂಸ್ಥೆಗೆ ಮತ್ತಷ್ಟು ಶಕ್ತಿ ದೊರಕಿದೆ.
ಶಕ್ತಿ ಯೋಜನೆ ಜಾರಿ ನಂತರ ಖಾಸಗಿ ಬಸ್ಗಳ ಆದಾಯಕ್ಕೆ ಹೊಡೆತ ಬಿದ್ದು, ಈಗ ಖಾಸಗಿಯೂ ಇಲ್ಲ&ಸರ್ಕಾರಿ ಸಾರಿಗೆಯು ಇಲ್ಲದೇ ಅಡಕತ್ತರಿಯಲ್ಲಿ ಸಿಕ್ಕಾಕಿಕೊಂಡಂತಾಗಿದೆ ಮೂಡಲಬಾಗಿಲು ಪ್ರಯಾಣಿಕರ ದುಸ್ಥಿತಿ.
ರಾತ್ರಿ 7.30ಕ್ಕೆ ಕೋಲಾರಕ್ಕೆ ಮುಳಬಾಗಿಲು ಘಟಕದ ಸಾರಿಗೆ ಬಸ್ ಕೊನೇ ಟ್ರಿಪ್ ಆಗಿದ್ದು, ಅನಂತರ ಕೋಲಾರ ಮತ್ತು ಬೆಂಗಳೂರಿಗೆ ಪ್ರಯಾಣ ಮಾಡಲು ಸಾಧ್ಯವಿಲ್ಲದ ಪರಿಸ್ಥಿತಿ ಉದ್ಭವವಾಗಿದೆ. ಅದರಲ್ಲೂ ಭಾನುವಾರ ರಾತ್ರಿ ಬೆಂಗಳೂರು, ಕೋಲಾರ ಪ್ರಯಾಣ ಮಾಡುವುದೇ ಹರಸಾಹಸವಾಗಿದೆ.
ನೇರ ಬಸ್ಗೂ ಕೊಕ್ಕೆ: ಈ ಮೊದಲು ಬೆಳಗ್ಗೆ 9 ಗಂಟೆವರೆಗೂ ಮತ್ತು ಸಂಜೆ 4 ರಿಂದ 6 ಗಂಟೆವರೆಗೂ ಮುಳಬಾಗಿಲಿನಿಂದ ಬೆಂಗಳೂರಿಗೆ ನೇರ ಬಸ್ ವ್ಯವಸ್ಥೆ ಇದ್ದು, ವಿದ್ಯಾರ್ಥಿಗಳಿಗೆ ಮತ್ತು ಸಾರ್ವಜನಿಕರಿಗೆ ಅನುಕೂಲವಾಗಿತ್ತು. ಈಗ ಈ ಬಸ್ಗಳಿಗೆ ಕೊಕ್ಕೆ ಹಾಕಿ ಕೋಲಾರ, ನರಸಾಪುರಕ್ಕೆ ಹೋಗಬೇಕೆಂಬ ಷರತ್ತು ವಿಧಿಸಿದ್ದರಿಂದ ಬೆಂಗಳೂರಿಗೆ ಹೋಗಲು 1 ಗಂಟೆ ಹೆಚ್ಚುವರಿ ಸಮಯ ತೆಗೆದುಕೊಳ್ಳುತ್ತದೆ. ನೇರ ಬಸ್ನಲ್ಲಿ 2.30 ರಿಂದ 3 ಗಂಟೆ ಪ್ರಯಾಣ ಇದ್ದರೆ. ಕೋಲಾರ&ನರಸಾಪುರಕ್ಕೆ ಸುತ್ತಿಬಳಸಿ ಹೋಗುವ ಬಸ್ಗಳು ಬೆಂಗಳೂರು ತಲುಪಲು 4 ಗಂಟೆ ಬೇಕಿದೆ. ವೇಗದೂತ ಬಸ್ಗಳು ಕೋಲಾರ, ನರಸಾಪುರ, ತಾವರೆಕೆರೆ, ಹೊಸಕೋಟೆ ಮಾರ್ಗವಾಗಿ ಬೆಂಗಳೂರಿಗೆ ಹೋಗಿ ಬರುತ್ತಿದ್ದು, ಈ ಬಸ್ ಹೊರತುಪಡಿಸಿ ನೇರ ಬಸ್ ವ್ಯವಸ್ಥೆ ಈ ಹಿಂದೆ ಇದ್ದಂತೆ ನಿಗದಿಪಡಿಸಿದರೆ ಸಂಚಾರಕ್ಕೆ ಅನುಕೂಲವಾಗಲಿದೆ ಎನ್ನುತ್ತಾರೆ ಸ್ಥಳಿಯರು.
ಗ್ರಾಮೀಣ ಪ್ರದೇಶಕ್ಕೂ ಸೇವೆ ಕಡಿತ
ಮುಳಬಾಗಿಲು ಘಟಕದಲ್ಲಿ 101 ಬಸ್ಗಳಿದ್ದು, 92 ಮಾರ್ಗಗಳಲ್ಲಿ ಸಂಚರಿಸುತ್ತಿದ್ದು, ಇದರಲ್ಲಿ ಬಹುತೇಕ ಹೊರಜಿಲ್ಲೆ ಅಂತಾರಾಜ್ಯಕ್ಕೆ ಸೀಮಿತವಾಗಿವೆ. ತಾಲೂಕಿನಲ್ಲಿ ಕೇವಲ ಹೆಬ್ಬಣಿ, ಬ್ಯಾಡರಹಳ್ಳಿ, ಸಾತನೂರು ಗ್ರಾಮಗಳಲ್ಲಿ ಮೂರು ಬಸ್ಗಳು ರಾತ್ರಿ ವೇಳೆ ತಂಗುತ್ತಿದ್ದು, ಪಕ್ಕದ ಕೆಜಿಎಫ್ನಲ್ಲಿ ಒಂದು, ಆಂಧ್ರದ ಕುಪ್ಪಂನಲ್ಲಿ ಒಂದು ಬಸ್ ರಾತ್ರಿ ಉಳಿದುಕೊಳ್ಳುತ್ತಿದ್ದು, ಉಳಿದ ಎಲ್ಲ ಬಸ್ಗಳು ಮುಳಬಾಗಿಲು ಘಟಕ ಅಥವಾ ಹೊರ ರಾಜ್ಯ, ಹೊರ ಜಿಲ್ಲೆಗಳ ದೂರದ ಊರುಗಳಲ್ಲಿರುತ್ತವೆ. ಕೇಂದ್ರ ಸರ್ಕಾರ ನಮ್ರ್ ಯೋಜನೆಯಲ್ಲಿ ಗ್ರಾಮೀಣ ಸಾರಿಗೆ ಸಂಸ್ಥೆಗೆ ಆರ್ಥಿಕ ನೆರವು ನೀಡುತ್ತಿದ್ದರೂ ಗ್ರಾಮೀಣ ಸಾರಿಗೆ ಸೇವೆ ಸಮರ್ಪಕವಾಗಿಲ್ಲ.
ಆಮೆಗತಿ ಕಾಮಗಾರಿ ಕಾರಣ
ನರಸಿಂಹ ತೀರ್ಥ ಬಳಿ ರಾಷ್ಟ್ರೀಯ ಹೆದ್ದಾರಿ&-75ರ ಕೆಳ ಸೇತುವೆ ಕಾಮಗಾರಿ ಆರಂಭಗೊಂಡು 2 ವರ್ಷವಾದರೂ ಪ್ರಗತಿ ಕಂಡಿಲ್ಲ. ನೆಪಮಾತ್ರಕ್ಕೆ ಕಾಮಗಾರಿ ನಡೆಯುತ್ತಿದ್ದು ಚಿತ್ತೂರು, ತಿರುಪತಿ ಚೆನ್ನೆ$ ಕಡೆಗಳಿಂದ ಬರುವ ಎಪಿಎಸ್ಆರ್ಸಿ, ಕೆಎಸ್ಆರ್ಟಿಸಿ ಸೇರಿ ಖಾಸಗಿ ಬಸ್ಗಳು ಮುಳಬಾಗಿಲಿಗೆ ಬರದೆ ಬೈಪಾಸ್ ಮೂಲಕ ಬೆಂಗಳೂರಿಗೆ ಸಂಚರಿಸುತ್ತಿವೆ. ಚಿತ್ತೂರು ಮಾರ್ಗವಾಗಿ ಬೆಂಗಳೂರಿಗೆ ಬರುವ ಬಸ್ಗಳು ಮುಳಬಾಗಿಲು ಪ್ರವೇಶ ಮಾಡದಿರುವುದೇ ಬಸ್ಗಳ ಕೊರತೆ ಉಂಟಾಗಲು ಪ್ರಮುಖ ಕಾರಣವಾಗಿದೆ.
ಮುಳಬಾಗಿಲಿಂದ ರಾತ್ರಿ 8 ಗಂಟೆ ಮೇಲೆ ಬೆಂಗಳೂರು ಮತ್ತು ಕೋಲಾರಕ್ಕೆ ಬಸ್ ವ್ಯವಸ್ಥೆ ಮಾಡಲು ಕ್ರಮ ಕೈಗೊಳ್ಳಲಾಗುವುದು. ಈ ಬಗ್ಗೆ ಅಧೀನ ಅಧಿಕಾರಿಗಳಿಗೆ ಸೂಚನೆ ನೀಡಲಾಗುವುದು.
- ಶ್ರೀನಾಥ್, ವಿಭಾಗಿಯ ನಿಯಂತ್ರಣ ಅಧಿಕಾರಿ, ಕೆಎಸ್ಆರ್ಟಿಸಿ, ಕೋಲಾರ ವಿಭಾಗ
ತಿರುಪತಿ ಚಿತ್ತೂರು ಕಡೆಗಳಿಂದ ಬೆಂಗಳೂರು ಕಡೆಗೆ ಬರುವ ಎಲ್ಲ ಸಾರಿಗೆ ಬಸುಗಳು ಮುಳಬಾಗಿಲಿಗೆ ಹೋಗಿ ಬರುವಂತೆ ಕಡ್ಡಾಯ ಸೂಚನೆ ನೀಡಿ ಸಮಸ್ಯೆ ಬಗೆಹರಿಸಲಾಗುವುದು.
- ಮಂಜುನಾಥ್, ಡಿಟಿಒ, ಕೆಎಸ್ಆರ್ಟಿಸಿ, ಕೋಲಾರ ವಿಭಾಗ, ಕೋಲಾರ.
ಭಾನುವಾರ ರಾತ್ರಿ ಬೆಂಗಳೂರಿಗೆ ಪ್ರಯಾಣ ಮಾಡಲು ಬಸ್ ವ್ಯವಸ್ಥೆಯೇ ಇರುವುದಿಲ್ಲ. ಜನ ಹೆಚ್ಚಾಗಿರುವುದು ನೋಡಿ ಟೂರಿಸ್ಟ್ ಬಸ್ಸುಗಳು ಟಿಕೆಟ್ ದರ ದುಪ್ಪಟ್ಟು ಪಡೆದು ಪ್ರಯಾಣಿಕರನ್ನು ತುಂಬಿಕೊಂಡು ಹೋಗುತ್ತಾರೆ. ಸೋಮವಾರ ಬೆಳಗ್ಗೆ ಶಾಲಾ&ಕಾಲೇಜುಗಳಿಗೆ ಹೋಗಲು ಬೆಂಗಳೂರಿಗೆ ರಾತ್ರಿಯೇ ಹೋಗಿ ತಂಗಲು ಸಾಧ್ಯವಾಗುತ್ತಿಲ್ಲ. ಬೆಳಗ್ಗೆಯೂ ಬಸ್ ವ್ಯವಸ್ಥೆ ಅಷ್ಟಕ್ಕಷ್ಟೇ.
- ಜಿ.ಮಂಜುನಾಥ್, ಗುಣಿಗಂಟಿಪಾಳ್ಯ, ಮುಳಬಾಗಿಲು ಪ್ರಯಾಣಿಕ
ಮುಳಬಾಗಿಲು ಘಟಕದ ಬಸ್ ರಾತ್ರಿ 7.30ಕ್ಕೆ ಕೊನೆಗೊಂಡರೂ ಕೋಲಾರ ಘಟಕದ ಬಸ್ಗಳು ಬಂದು ಹೋಗುತ್ತವೆ. ಕೋಲಾರ ವಿಭಾಗದ ಎಲ್ಲ ಘಟಕಗಳಿಂದ ತಿರುಪತಿಗೆ ಹೋಗಿ ಬರುವ ಬಸ್ಸುಗಳು ಮುಳಬಾಗಿಲಿಗೆ ಬಂದು ಹೋಗಲು ಅಧಿಕಾರಿಗಳು ಸೂಚನೆ ನೀಡಿದ್ದಾರೆ.
- ಅನ್ಸಸರ್ ಪಾಷಾ, ಪ್ರಭಾರ ಘಟಕ ವ್ಯವಸ್ಥಾಪಕ, ಮುಳಬಾಗಿಲು
ಸೋಮವಾರ ಬೆಳಗ್ಗೆ ಸಾರಿಗೆ ಬಸ್ಗಳು ಪ್ರಯಾಣಿಕರ ಸಂಖ್ಯೆಗೆ ಅನುಗುಣವಾಗಿ ಇರುವುದಿಲ್ಲ. ನೂಕು ನುಗ್ಗಲುನಲ್ಲೇ ಮತ್ತು ನಿಂತುಕೊಂಡೆ ಪ್ರಯಾಣ ಮಾಡಬೇಕಾದ ಸ್ಥಿತಿ ಉಂಟಾಗಿದೆ. ಆದುದರಿಂದ ಹೆಚ್ಚಿನ ನೇರ ಬಸ್ ವ್ಯವಸ್ಥೆ ಮಾಡಬೇಕು.
- ಕೆ.ವಿ.ಚಾಮೇಗೌಡ, ಕೊಲದೇವಿ, ಮುಳಬಾಗಿಲು ತಾಲೂಕು
ರಾತ್ರಿ ಮುಳಬಾಗಿಲಿಂದ ಬೆಂಗಳೂರಿಗೆ ಕೆಎಸ್ಆರ್ಟಿಸಿ ಬಸ್ಗಳು ಇಲ್ಲದಿರುವ ಬಗ್ಗೆ ಗಮನಕ್ಕೆ ತಂದಿದ್ದು, ಈ ಬಗ್ಗೆ ತಕ್ಷಣ ಕ್ರಮ ಕೈಗೊಂಡು ತಿರುಪತಿಯಿಂದ ಬರೋ ಬಸ್ಗಳು ಸೇರಿ ಸ್ಥಳಿಯವಾಗಿ ಬಸ್ಗಳನ್ನು ವ್ಯವಸ್ಥೆ ಮಾಡಲು ಅಧಿಕಾರಿಗಳಿಗೆ ಸೂಚನೆ ನೀಡಲಾಗುವುದು. ನೇರ ಬಸ್ ವ್ಯವಸ್ಥೆ ಮಾಡಲಾಗುವುದು.
- ಸಮೃದ್ಧಿ ವಿ.ಮಂಜುನಾಥ್, ಶಾಸಕ ಮುಳಬಾಗಿಲು ಕ್ಷೇತ್ರ