ಉಡುಪಿ: ನಗರಸಭೆಯ ಒಳಚರಂಡಿ ವ್ಯವಸ್ಥೆ ಆಧುನೀಕರಣಕ್ಕೆ ಕೇಂದ್ರ ಸರ್ಕಾರ 30 ಕೋಟಿ ರೂ. ಅನುದಾನ ಬಿಡುಗಡೆ ಮಾಡಿದ್ದು, ಈಗಾಗಲೇ ತಯಾರಿಸಿರುವ ಡಿಪಿಆರ್ನಲ್ಲಿ ಕೆಲವು ಬದಲಾವಣೆಯೊಂದಿಗೆ ಪ್ರಸ್ತುತ ಇರುವ ವೆಟ್ ವೆಲ್ಗಳು ಹಾಗೂ ಎಸ್ಟಿಪಿ ಉನ್ನತಿಕರಣಕ್ಕೆ ಆದ್ಯತೆ ನೀಡಿ ಪರಿಷ್ಕೃತ ವರದಿ ತಯಾರಿಸುವಂತೆ ಶಾಸಕ ಯಶ್ಪಾಲ್ ಸುವರ್ಣ ಅಧಿಕಾರಿಗಳಿಗೆ ಸೂಚಿಸಿದರು.
ಶುಕ್ರವಾರ ಉಡುಪಿ ನಗರಸಭೆಯಿಂದ ಒಳಚರಂಡಿ ಯೋಜನೆ ಬಗ್ಗೆ ಕುಡ್ಸೆಂಪ್ ತಯಾರಿಸಿರುವ ಯೋಜನಾ ವರದಿ ಮಾಹಿತಿ ಸಭೆಯಲ್ಲಿ ಅವರು ಮಾತನಾಡಿದರು. ನಿಟ್ಟೂರಿನಲ್ಲಿರುವ ಎಸ್ಟಿಪಿಯನ್ನು ಮೇಲ್ದರ್ಜೆಗೇರಿಸಬೇಕು. 4 ವೆಟ್ವೆಲ್ಗಳಲ್ಲಿರುವ ಪಂಪ್ಗಳನ್ನು ಬದಲಾಯಿಸಬೇಕು. ಶುದ್ಧೀಕರಣ ಟಕಗಳಿಗೆ ಹೊಸ ಅತ್ಯಾಧುನಿಕ ತಂತ್ರಜ್ಞಾನವನ್ನು ಅಳವಡಿಸಬೇಕು. 2055ರವರೆಗೆ ನಗರದ ಜನಸಂಖ್ಯೆಯನ್ನು ಗಮನದಲ್ಲಿಟ್ಟುಕೊಂಡು ಕಾಮಗಾರಿ ಅನುಷ್ಠಾನಗೊಳಿಸಬೇಕು. ಈ ಬಗ್ಗೆ ನಗರಸಭಾ ಅಧಿಕಾರಿಗಳೊಂದಿಗೆ ಹಾಗೂ ಸದಸ್ಯರೊಂದಿಗೆ ವಿಸತ ಚರ್ಚೆ ನಡೆಸಿ ಡಿಪಿಆರ್ ಅಂತಿಮಗೊಳಿಸಬೇಕು ಎಂದು ಶಾಸಕರು ಸೂಚಿಸಿದರು.
ಖಾಸಗಿ ಸಂಸ್ಥೆಯ ಇಂಜಿನಿಯರ್ ಚೇತನ್ ಕುಮಾರ್ ಮಾತನಾಡಿ, ಪ್ರಸ್ತುತ 12 ವಾರ್ಡ್ಗಳ ಚರಂಡಿ ನೀರು 19 ಎಂಎಲ್ಡಿ ಸಾಮಾರ್ಥ್ಯದ ನಿಟ್ಟೂರು ಎಸ್ಟಿಪಿಗೆ ಸರಬರಾಜಾಗುತ್ತಿದ್ದು, ಇದನ್ನು ಉನ್ನತಿಕರಿಸುವ ಜೊತೆಗೆ ಹೊಸದಾಗಿ 8 ಎಂಎಲ್ಡಿ ಸಾಮಾರ್ಥ್ಯದ ಎಸ್ ಟಿ ಪಿ ನಿರ್ಮಿಸಲಾಗುವುದು. ಕೇಂದ್ರ ಹಸಿರು ನ್ಯಾಯಾಧೀಕರಣದ ನಿರ್ದೇಶನದಂತೆ ತ್ಯಾಜ್ಯ ನೀರು ಶುದ್ಧೀಕರಿಸಲಾಗುತ್ತಿದ್ದು, ಈ ನೀರನ್ನು ಕಾರ್ಖಾನೆಗಳಿಗೆ, ತೋಟಗಳಿಗೆ ಬಳಸಬಹುದಾಗಿದೆ. 8 ತಿಂಗಳಲ್ಲಿ ಕಾಮಗಾರಿ ಪೂರ್ಣಗೊಳ್ಳಲಿದೆ ಎಂದು ಮಾಹಿತಿ ನೀಡಿದರು. ಸುಮಿತ್ರಾ ನಾಯಕ್, ಪೌರಾಯುಕ್ತ ರಾಯಪ್ಪ, ಇಂಜಿನಿಯರ್ ದುರ್ಗಾಪ್ರಸಾದ್, ಪರಿಸರ ಇಂಜಿನಿಯರ್ ಸ್ನೇಹಾ ಮೊದಲಾದವರು ಉಪಸ್ಥಿತರಿದ್ದರು.