ಬೆಂಗಳೂರು: ಅರಿವಿಲ್ಲದ ವಿಷಯಗಳು ಸಮಸ್ಯೆಯ ಭಾಗವಾಗಿರುವುದರಿಂದ ನಮ್ಮ ಇತಿಹಾಸವನ್ನು ವಿದೇಶಿಯರು ತಿರುಚಿ ಸಾರಿದ್ದಾರೆ ಎಂದು ಲೇಖಕಿ ರಶ್ಮಿ ಸಮಂತ್ ಹೇಳಿದ್ದಾರೆ.
ಬಸವನಗುಡಿಯ ಡಾ.ಸಿ.ಅಶ್ವತ್ ಕಲಾ ಭವನದಲ್ಲಿ ಥಿಂಕರ್ಸ್ ಫೋರಂ ಆಯೋಜಿಸಿದ್ದ ಪುಸ್ತಕ ಬಿಡುಗಡೆ ಮತ್ತು ಸಂವಾದದಲ್ಲಿ ಮಾತನಾಡಿದರು.
ಇದನ್ನೂ ಓದಿ: ಮಕ್ಕಳಿಗೆ ಸಂಸ್ಕೃತಿ ಪರಿಚಯಿಸುವ ಕೆಲಸವಾಗಲಿ : ಭಾರತ್ ವಿಕಾಸ್ ಪರಿಷತ್ನ ಮಹಾ ಪೋಷಕ ಟಿ.ಪಿ.ಚೌಡಯ್ಯ ಸಲಹೆ
ಆಕ್ಸ್ಫರ್ಡ್ ವಿವಿ ವಿದ್ಯಾರ್ಥಿ ಸಂಘದ ಅಧ್ಯಕ್ಷೆಯಾಗಿ ಆಯ್ಕೆಯಾದಾಗ ಹಿಂದು ಎಂಬ ಕಾರಣಕ್ಕೆ ಮಾನಸಿಕ ಕಿರುಕುಳ ನೀಡಲಾಯಿತು. ಆ ವೇಳೆ ಅನುಭವಿಸಿದ ಕಷ್ಟ, ದುಃಖ ಮತ್ತು ಹೋರಾಡಿದ ರೀತಿಯನ್ನು ಪುಸ್ತಕದಲ್ಲಿ ದಾಖಲಿಸಲಾಗಿದೆ ಎಂದು ತಿಳಿಸಿದರು.
ನಿರ್ದಿಷ್ಟ ಧರ್ಮದೆಡೆಗೆ ತಿರಸ್ಕಾರವಿರುವ ಮಾತ್ರಕ್ಕೆ ಆ ಧರ್ಮದವರನ್ನು ಅವಕಾಶ ವಂಚಿತರನ್ನಾಗಿ ಮಾಡುವುದು ಅನ್ಯಾಯ. ಹಿಂದುಗಳು ಬದುಕಿ ಜಯಿಸುವ ಸಾಮರ್ಥ್ಯ ಉಳ್ಳವರು, ಬಲಿಪಶುಗಳಲ್ಲ ಎಂದರು.
ಮಣಿಪಾಲ್ ಗ್ಲೋಬಲ್ ಎಜುಕೇಶನ್ ಮುಖ್ಯಸ್ಥ ಟಿ.ವಿ. ಮೋಹನ್ದಾಸ್ ಪೈ ಮಾತನಾಡಿ, ಅನ್ಯಾಯದ ವಿರುದ್ಧ ಧ್ವನಿ ಎತ್ತುವ ಮೂಲಕ ನವ ಭಾರತವನ್ನು ಪ್ರತಿನಿಧಿಸಬೇಕು ಎಂದು ಹೇಳಿದರು.