ತುಮಕೂರು : ಕರೊನಾ ಸೋಂಕು ದೃಢಪಡಿಸಿಕೊಳ್ಳಲು ಜಿಲ್ಲಾ ಆಸ್ಪತ್ರೆಯಲ್ಲೇ ಆರಂಭಿಸಿರುವ ಆರ್ಟಿಪಿಸಿಆರ್ ಲ್ಯಾಬ್ಗೆ ವರ್ಷ ತುಂಬಿದೆ. 24/7 ಕಾರ್ಯನಿರ್ವಹಿಸಲಿರುವ ಈ ಪ್ರಯೋಗಾಲಯದಲ್ಲಿ ಕಳೆದೊಂದು ವರ್ಷದಿಂದ ಕೈಗೊಂಡಿರುವ ಟೆಸ್ಟ್ಗಳ ಸಂಖ್ಯೆ 4,19,216.
ಕಳೆದ ವರ್ಷ ಮಾರ್ಚ್ನಲ್ಲಿ ಕರೊನಾ ಮೊದಲನೇ ಅಲೆ ಜಿಲ್ಲೆಗೆ ಅಪ್ಪಳಿಸಿದ ಸಂದರ್ಭದಲ್ಲಿ ಕರೊನಾ ಪರೀಕ್ಷೆಗಳಿಗಾಗಿ ಬೆಂಗಳೂರು, ಹಾಸನವನ್ನು ಆಶ್ರಯಿಸಲಾಗಿತ್ತು. ಈ ವೇಳೆ ಕರೊನಾ ಟೆಸ್ಟ್ ಮಾಡಲು ಅತ್ಯಾಧುನಿಕ ಆರ್ಟಿಪಿಸಿಆರ್ ಪ್ರಯೋಗಾಲಯವನ್ನು 1 ಕೋಟಿ ರೂ., ವೆಚ್ಚದಲ್ಲಿ ಜಿಲ್ಲಾ ಆಸ್ಪತ್ರೆ ಆವರಣದಲ್ಲಿ ಮೇ 29 ರಂದು ಪ್ರಾರಂಭಿಸಲಾಯಿತು.
ಪ್ರತಿನಿತ್ಯ 2500 ಟೆಸ್ಟ್ !: ಲ್ಯಾಬ್ ಆರಂಭದಲ್ಲಿ ಪ್ರತಿದಿನ 280 ಟೆಸ್ಟ್ಗಳನ್ನು ಮಾಡಲಾಗುತ್ತಿತ್ತು. ಈಗ ಈ ಸಂಖ್ಯೆ 2500ಕ್ಕೇರಿದೆ. ಗಂಟಲು ದ್ರವ ಸಂಗ್ರಹಿಸಿದ 33 ಗಂಟೆಗಳಲ್ಲೇ ಕರೊನಾ ಪರೀಕ್ಷಾ ವರದಿ ಕೈಗೆ ಸಿಗಲಿದೆ. 24/7 ಈ ಲ್ಯಾಬ್ ಕಾರ್ಯನಿರ್ವಹಿಸಲಿದ್ದು ಮೂವರು ಮೈಕ್ರೋಬಯೋಲಜಿಸ್ಟ್ ಸೇರಿ 23 ಮಂದಿ ಸಿಬ್ಬಂದಿ ಕಳೆದೊಂದು ವರ್ಷದಿಂದ ಹಗಲಿರುಳು ಸಮರ್ಪಣಾಭಾವದಿಂದ ಸೇವೆ ಸಲ್ಲಿಸುತ್ತಿದ್ದಾರೆ.
4 ಲಕ್ಷಕ್ಕೂ ಹೆಚ್ಚು ಟೆಸ್ಟ್ !: ಆರ್ಟಿಪಿಸಿಆರ್ ಪ್ರಯೋಗಾಲಯದಲ್ಲಿ 1 ವರ್ಷದಲ್ಲಿ 4,19,216 ಮಾದರಿಗಳನ್ನು ಪರೀಕ್ಷೆ ಮಾಡಲಾಗಿದೆ. 44724 ಮಂದಿಯಲ್ಲಿ ಸೋಂಕು ದೃಢಪಟ್ಟಿದ್ದರೆ, 3,74,492 ಜನರ ವರದಿ ನೆಗೆಟಿವ್ ಬಂದಿದೆ. ಕರೊನಾ ಪರೀಕ್ಷೆ ವೇಳೆ ಸುರಕ್ಷಿತ ಕ್ರಮದ ಹೊರತಾಗಿಯೂ ಪ್ರಯೋಗಾಲಯದ 8 ಮಂದಿ ಸಿಬ್ಬಂದಿಗೂ ಕೂಡ ಸೋಂಕು ತಗುಲಿತ್ತು. ಜಿಲ್ಲಾ ಆಸ್ಪತ್ರೆಯ ಆರ್ಟಿಪಿಸಿಆರ್ ಕೇಂದ್ರದ ಒತ್ತಡದ ಪರಿಣಾಮ ವಾರವಾದರೂ ಕೋವಿಡ್ ಪರೀಕ್ಷಾ ವರದಿ ಕೊಡಲು ಸಾಧ್ಯವಾಗುತ್ತಿರಲಿಲ್ಲ. ಹಾಗಾಗಿ, ತಿಪಟೂರಿನಲ್ಲಿ ನವೆಂಬರ್ನಲ್ಲಿ ಎರಡನೇ ಪ್ರಯೋಗಾಲಯವನ್ನು ಪ್ರಾರಂಭಿಸಲಾಯಿತು. ಇಷ್ಟಾದರೂ 2ನೇ ಅಲೆ ಆರ್ಭಟದ ವೇಳೆ ಲ್ಯಾಬ್ ಸಿಬ್ಬಂದಿ ರಜೆಯೂ ಇಲ್ಲದೆ ಎರಡು ತಿಂಗಳಿನಿಂದ ಹಗಲಿರುಳು ಕಾರ್ಯನಿರ್ವಹಿಸಿ ಹೈರಾಣಾಗಿ ಹೋಗಿದ್ದಾರೆ.
ಮಕ್ಕಳು, ಮನೆಯವರೊಂದಿಗೆ ಅಂತರ ಕಾಯ್ದುಕೊಂಡು ಜೀವಭಯದಲ್ಲೇ ಪ್ರಯೋಗಾಲಯದಲ್ಲಿ 3 ಶಿಫ್ಟ್ಗಳಲ್ಲಿ ದಿನದ 24 ಗಂಟೆ ಕಾರ್ಯನಿರ್ವಹಿಸುವ ಸಿಬ್ಬಂದಿಯ ಕಾರ್ಯ ಶ್ಲಾಘನೀಯವೆನಿಸಿದೆ. ಮಂಚೂಣಿ ಆರೋಗ್ಯ ಕಾರ್ಯಕರ್ತರೆನಿಸಿರುವ ಲ್ಯಾಬ್ ಟೆಕ್ನಿಷಿಯನ್ಗಳಿಗೆ ರಾಜ್ಯ ಸರ್ಕಾರ ಕಳೆದ ವರ್ಷ ಘೊಷಿಸಿದ್ದ ವಿಶೇಷ ಭತೆ್ಯ ಕೂಡ ಇನ್ನೂ ತಲುಪದೇ ಇರುವುದು ವಿಪರ್ಯಾಸವೆನಿಸಿದೆ.
ಆರ್ಟಿಪಿಸಿಆರ್ 23 ಸಿಬ್ಬಂದಿ : ಜಿಲ್ಲಾ ಆಸ್ಪತ್ರೆಯ ಆರ್ಟಿಪಿಸಿಆರ್ ಲ್ಯಾಬ್ನಲ್ಲಿ ಮೂವರು ಮೈಕ್ರೋಬಯಲಾಜಿಸ್ಟ್, ಓರ್ವ ಹಿರಿಯ ಲ್ಯಾಬ್ ಟೆಕ್ನಿಷಿಯನ್, 15 ಲ್ಯಾಬ್ ಟೆಕ್ನಿಷಿಯನ್ಗಳು, ಇಬ್ಬರು ಡೇಟಾ ಎಂಟ್ರಿ ಆಪರೇಟರ್, ಇಬ್ಬರು ಡಿ-ಗ್ರೂಪ್ ನೌಕರರು ಕಾರ್ಯನಿರ್ವಹಿಸುತ್ತಿದ್ದಾರೆ. ಕಳೆದೊಂದು ವರ್ಷದಲ್ಲಿ ಇಲ್ಲಿ ಕಾರ್ಯನಿರ್ವಹಿಸುತ್ತಿರುವ ಸಿಬ್ಬಂದಿ ಪೈಕಿ ಮೈಕ್ರೋ ಬಯಾಲಜಿಸ್ಟ್ ಸೇರಿ 8 ಮಂದಿಗೆ ಕರೊನಾ ಸೋಂಕು ತಗುಲಿತ್ತು.
ತಿಪಟೂರಲ್ಲಿ ಆರ್ಟಿಪಿಸಿಆರ್ ಲ್ಯಾಬ್ : ಜಿಲ್ಲಾ ಆಸ್ಪತ್ರೆಯಲ್ಲಿ ಮೊದಲ ಆರ್ಟಿಪಿಸಿಆರ್ ಲ್ಯಾಬ್ ಆರಂಭಗೊಂಡ ಬಳಿಕ ನವೆಂಬರ್ನಲ್ಲಿ ತಿಪಟೂರಲ್ಲಿ ಲ್ಯಾಬ್ ಪ್ರಾರಂಭಿಸಲಾಯಿತು. ಈವರೆಗೆ 69797 ಕೋವಿಡ್ ಟೆಸ್ಟ್ಗಳನ್ನು ಮಾಡಲಾಗಿದ್ದು 10691 ಜನರಲ್ಲಿ ಸೋಂಕು ದೃಢಪಟ್ಟಿತ್ತು. 58871 ವರದಿ ನೆಗಟಿವ್ ಇದೆ. ಈ ಲ್ಯಾಬ್ನಲ್ಲಿ ಒಬ್ಬರು ಮೈಕ್ರೋಬಯಲಾಜಿಸ್ಟ್, 12 ಲ್ಯಾಬ್ ಟೆಕ್ನಿಷಿಯನ್, ಇಬ್ಬರು ಡೇಟಾ ಎಂಟ್ರಿ ಆಪರೇಟರ್, 1 ಡಿ-ಗ್ರೂಪ್ ಸಿಬ್ಬಂದಿ ಇದ್ದಾರೆ. ಶಿರಾದಲ್ಲೂ ಆರ್ಟಿಪಿಸಿಆರ್ ಲ್ಯಾಬ್ ಅನ್ನು ಶೀಘ್ರ ಪ್ರಾರಂಭಿಸಲು ಸಿದ್ಧತೆ ನಡೆದಿದೆ.
ಜಿಲ್ಲಾ ಆಸ್ಪತ್ರೆಯಲ್ಲಿನ ಆರ್ಟಿಪಿಸಿಆರ್ ಕೇಂದ್ರಕ್ಕೆ 1 ವರ್ಷ ತುಂಬಿದೆ. ಕೋವಿಡ್ ಟೆಸ್ಟ್ ಒತ್ತಡವನ್ನು ಕಡಿಮೆ ಮಾಡಲು ತಿಪಟೂರಿನಲ್ಲಿ 2ನೇ ಲ್ಯಾಬ್ ತೆರೆಯಲಾಯಿತು. ನಂತರ ಈಗ ಶಿರಾದಲ್ಲಿ ಮತ್ತೊಂದು ಲ್ಯಾಬ್ ಆರಂಭಿಸಲಾಗುತ್ತಿದೆ. | ಡಾ.ನಾಗೇಂದ್ರಪ್ಪ ಜಿಲ್ಲಾ ಆರೋಗ್ಯಾಧಿಕಾರಿ