ಬೆಂಗಳೂರು: ಬಿಡಿಎ ಬಡಾವಣೆಗಳಲ್ಲಿನ ಮೂಲೆ ನಿವೇಶನಗಳ ಐದನೇ ಹಂತದ ಇ-ಹರಾಜು ಪ್ರಕ್ರಿಯೆ ಮುಕ್ತಾಯಗೊಂಡಿದ್ದು, 451 ನಿವೇಶನಗಳ ಪೈಕಿ 317 ನಿವೇಶನಗಳು ಹರಾಜಾಗಿವೆ.
ಬಿಡಿಎ ಬಡಾವಣೆಗಳಲ್ಲಿನ ಖಾಲಿ ನಿವೇಶನಗಳನ್ನು ಇ ಹರಾಜಿನ ಮೂಲಕ ಮಾರಾಟ ಮಾಡಲಾಗುತ್ತಿದೆ. ಅದರಂತೆ ನ. 14ರಿಂದ ಆರಂಭವಾಗಿದ್ದ ಐದನೇ ಹಂತದ ಹರಾಜು ಪ್ರಕ್ರಿಯೆಯ ಬಿಡ್ಡಿಂಗ್ ಮುಕ್ತಾಯಗೊಂಡಿದ್ದು, ವಿವಿಧ ಬಡಾವಣೆಗಳಲ್ಲಿನ 451 ನಿವೇಶನಗಳನ್ನು ಹರಾಜಿಗಿಡಲಾಗಿತ್ತು. ಅದರಲ್ಲಿ 109 ನಿವೇಶನಗಳು ಪ್ರಕ್ರಿಯೆಗೆ ಒಳಪಡಲಿಲ್ಲ. ಉಳಿದಂತೆ 25 ನಿವೇಶನಗಳಿಗೆ ನಿರೀಕ್ಷಿತ ದರ ನಿಗದಿಯಾಗದ ಕಾರಣ, ಹರಾಜಿನಿಂದ ಹೊರಗಿಡಲಾಯಿತು. 317 ನಿವೇಶನಗಳಿಗೆ ನಿಗದಿಗಿಂತ ಹೆಚ್ಚಿನ ಮೊತ್ತದ ಬಿಡ್ ಸಲ್ಲಿಕೆಯಾಗಿ ಮಾರಾಟವಾಗಿವೆ.
5ನೇ ಹಂತದ ಇ ಹರಾಜು ಪ್ರಕ್ರಿಯೆಯಲ್ಲಿ 1,496 ಬಿಡ್ಡುದಾರರು ಭಾಗವಹಿಸಿದ್ದರು. ಮಾರಾಟವಾದ 317 ನಿವೇಶನಗಳ ಮೂಲಬೆಲೆಯನ್ನು 184.57 ಕೋಟಿ ರೂ.ಗೆ ನಿಗದಿ ಮಾಡಲಾಗಿತ್ತು. ಆದರೆ, ಬಿಡ್ಡುದಾರರು 278.58 ಕೋಟಿ ರೂ. ಬಿಡ್ ಸಲ್ಲಿಸಿ, ನಿವೇಶನಗಳನ್ನು ಪಡೆದಿದ್ದಾರೆ. ಒಟ್ಟಾರೆ 94.1 ಕೋಟಿ ರೂ. ಹೆಚ್ಚುವರಿ ಆದಾಯ ಬಂದಂತಾಗಿದೆ.