1300 ಹೆಕ್ಟೇರ್ ಕೃಷಿಭೂಮಿ ನುಂಗಿದ ವರದೆ, ಭತ್ತ, ಅಡಕೆ, ಅನಾನಸ್ ಬೆಳೆ ಜಲಾವೃತ

ಶಿರಸಿ: ವರದಾ ನದಿಯಲ್ಲಿ ಪ್ರವಾಹ ಒಮ್ಮೆಲೇ ಏರಿದೆ. ಇದರಿಂದಾಗಿ ತಾಲೂಕಿನ ಬನವಾಸಿ ಭಾಗದ 1300 ಹೆಕ್ಟೇರ್ ಕೃಷಿ ಭೂಮಿ ಮುಳುಗಡೆಯಾಗಿದೆ. ಜತೆಗೆ ಕೆಲ ಗ್ರಾಮಗಳ ಸಂಪರ್ಕ ಕಡಿತ ಆತಂಕ ಎದುರಾಗಿದೆ.
ಬುಧವಾರ ಸಂಜೆಯ ವೇಳೆ ವರದಾ ನದಿಯಲ್ಲಿ ಪ್ರವಾಹ ಅಲ್ಪ ಪ್ರಮಾಣದಲ್ಲಿ ಕಾಣಿಸಿಕೊಂಡಿತ್ತು. ಇಲ್ಲಿಯ ಕೆಲ ಪ್ರದೇಶಗಳಲ್ಲಿ ನೀರು ಏರಿಕೆಯಾಗಿ ಬನವಾಸಿ ಸುತ್ತಮುತ್ತಲಿನ ಕೆಲ ಕೃಷಿ ಭೂಮಿ ಮುಳುಗಡೆಯಾಗಿತ್ತು. ಆದರೆ, ಬುಧವಾರ ತಡ ರಾತ್ರಿ ವರದೆಯ ಪ್ರವಾಹ ಸ್ಥಿತಿ ಒಮ್ಮೆಲೇ ಏರಿದೆ. ಗುರುವಾರ ಬೆಳಗಿನ ವೇಳೆ ನದಿ ನೀರು ಮತ್ತಷ್ಟು ಹೆಚ್ಚಳವಾಗಿದೆ.
ವರದಾ ನದಿ ಶಿರಸಿ ತಾಲೂಕಿನ ಬನವಾಸಿ ಭಾಗದಲ್ಲಿ 9 ಕಿ.ಮೀ. ಪ್ರದೇಶದಲ್ಲಿ ಮಾತ್ರ ಹರಿದಿದೆ. ಶಿವಮೊಗ್ಗ ಜಿಲ್ಲೆಯಲ್ಲಿ ಹುಟ್ಟಿ, ಜಿಲ್ಲೆಯ ಬನವಾಸಿ ಭಾಗದಲ್ಲಿ ಹರಿದು ಮುಂದೆ ಸಾಗುವ ಈ ನದಿ ಸಮಸ್ಯೆಗಳನ್ನು ಮಾತ್ರ ಇಲ್ಲಿ ಸೃಷ್ಟಿಸುತ್ತಿದೆ. ಬೇಸಿಗೆಯ ದಿನಗಳಲ್ಲಿ ಬರಿದಾದರೂ ಶಿವಮೊಗ್ಗ ಜಿಲ್ಲೆಯ ವಿವಿಧೆಡೆ ಮತ್ತು ಸಾಗರದಲ್ಲಿ ಮಳೆಯ ಪ್ರಮಾಣ ಹೆಚ್ಚಾಗುತ್ತಿದ್ದಂತೆಯೇ ವರದಾ ನದಿಯಲ್ಲಿ ನೀರು ಏರಿಕೆಯಾಗುತ್ತದೆ. ಪ್ರತಿ ವರ್ಷವೂ ವರದೆಯಲ್ಲಿ ಪ್ರವಾಹ ಏರಿ ಕೃಷಿ ಭೂಮಿ ಮುಳುಗಡೆಯಾಗುತ್ತದೆಯಾದರೂ ಈ ವರ್ಷ ನದಿ ನೀರು ಒಮ್ಮೆಲೇ ಏರಿಕೆಯಾಗಿದ್ದು ಇಲ್ಲಿಯ ನಿವಾಸಿಗಳನ್ನು ಬೆಚ್ಚಿ ಬೀಳಿಸಿದೆ. ಇಲ್ಲಿ ಭತ್ತದ ಗದ್ದೆ, ಅಡಕೆ ತೋಟ, ಅನಾನಸ್ ಬೆಳೆಯುವ ಪ್ರದೇಶಗಳು ಮುಳುಗಡೆಯಾಗಿವೆ.