ಲಕ್ಷ್ಮೇಶ್ವರ: ಮುಂಜಾಗ್ರತೆ ಕ್ರಮವಾಗಿ ಪಟ್ಟಣದಲ್ಲಿ ಶುಕ್ರವಾರದ ಸಂತೆಯನ್ನು ಪುರಸಭೆಯವರು ಸ್ಥಗಿತಗೊಳಿಸಿದರು.
ವಾರದ ಸಂತೆ ರದ್ದುಪಡಿಸಿರುವುದರ ಕುರಿತು ಪುರಸಭೆ ವತಿಯಿಂದ ಗುರುವಾರವೇ ಪಟ್ಟಣದಲ್ಲಿ ಧ್ವನಿವರ್ಧಕ ಮತ್ತು ಪತ್ರಿಕೆ ಮೂಲಕ ಪ್ರಚುರ ಪಡಿಸಲಾಗಿತ್ತು. ಆದರೂ ಶುಕ್ರವಾರ ಬೆಳಗ್ಗೆಯಿಂದ ಮಂದಗತಿಯಲ್ಲಿ ಸಂತೆ ನಡೆದಿತ್ತು. ಸಂಜೆ ವೇಳೆಗೆ ಜನಸಂದಣಿ ಹೆಚ್ಚಾಗಿ ವಹಿವಾಟು ಜೋರಾಗಿಯೇ ಸಾಗಿತ್ತು. ವಿಷಯ ತಿಳಿದ ಪುರಸಭೆಯರು ಟ್ರ್ಯಾಕ್ಟರ್, ಟಂಟಂಗಳೊಂದಿಗೆ ದಾಳಿ ಮಾಡಿ ತರಕಾರಿಗಳನ್ನು ವಾಹನದಲ್ಲಿ ಎತ್ತಿ ಹಾಕಿಕೊಳ್ಳಲಾರಂಭಿಸಿದರು. ಈ ಸಂದರ್ಭದಲ್ಲಿ ವ್ಯಾಪಾರಸ್ಥರು ಮತ್ತು ಪುರಸಭೆ ಸಿಬ್ಬಂದಿ ನಡುವೆ ಮಾತಿನ ಚಕಮಕಿ ನಡೆಯಿತು. ‘ಬೆಳಗ್ಗೆಯೇ ಹರಾಜು ಪ್ರಕ್ರಿಯೆ ಮತ್ತು ಮಾರುಕಟ್ಟೆಯಲ್ಲಿ ವ್ಯಾಪಾರ ಮಾಡುವುದನ್ನು ತಡೆಯಬೇಕಿತ್ತು. ಆದರೆ, ಸಂಜೆಯವರೆಗೂ ಸುಮ್ಮನಿದ್ದು, ಈಗ ಏಕಾಏಕಿ ಸಂತೆ ಬಂದ್ ಮಾಡಿಸುವುದು ಎಷ್ಟರ ಮಟ್ಟಿಗೆ ಸರಿ?’ ಎಂದು ಪ್ರಶ್ನಿಸಿದರು.
ಪ್ರತಿಕ್ರಿಯಿಸಿದ ಪುರಸಭೆ ಸಿಬ್ಬಂದಿ, ‘ಎರಡು ದಿನ ಮೊದಲೇ ತಿಳಿಸಲಾಗಿದೆ. ಕರೊನಾ ತಡೆಗಟ್ಟಲು ಸಂತೆ, ಸಭೆ, ಸಮಾರಂಭ ನಡೆಯದಂತೆ ನೋಡಿಕೊಳ್ಳಬೇಕು ಎಂಬುದು ಜಿಲ್ಲಾ ಮತ್ತು ತಾಲೂಕಾಡಳಿತದ ಸೂಚನೆಯಾಗಿದೆ. ಎಲ್ಲರೂ ಸಹಕಾರ ನೀಡಬೇಕು’ ಎಂದು ವ್ಯಾಪಾರಿಗಳ ಮನವೊಲಿಸಿದರು.
ಪೋಟೊ: 20-ಎಲ್ಎಕ್ಷ್ಆರ್-6:
ಲಕ್ಷ್ಮೇಶ್ವರದ ಶುಕ್ರವಾರ ಸಂತೆಯನ್ನು ಪುರಸಭೆಯರು ಬಂದ್ ಮಾಡಿಸಿದರು.
* ಮಕ್ಕಳ ಕಲಿಕಾ ಮಟ್ಟ ಹೆಚ್ಚಳ* ಎಸ್ಸೆಸ್ಸೆಲ್ಸಿ ಫಲಿತಾಂಶ ಸುಧಾರಣೆಗೆ ಪ್ರಯತ್ನ
‘ಓದಿನ ಮನೆ’ಯ ಫಲಿತಾಂಶದತ್ತ ಚಿತ್ತ
ವಿಜಯವಾಣಿ ಸುದ್ದಿಜಾಲ ಗದಗ
ಮಕ್ಕಳ ಕಲಿಕಾ ಮಟ್ಟ ಹೆಚ್ಚಿಸಿ ಎಸ್ಸೆಸ್ಸೆಲ್ಸಿ ಫಲಿತಾಂಶ ಸುಧಾರಣೆಗಾಗಿ ಆರಂಭಿಸಿರುವ ‘ಓದಿನ ಮನೆ‘ ವಿನೂತನ ಪ್ರಯೋಗಕ್ಕೆ ಜಿಲ್ಲೆಯಲ್ಲಿ ಉತ್ತಮ ಸ್ಪಂದನೆ ವ್ಯಕ್ತವಾಗಿದ್ದು, ಪ್ರಸಕ್ತ ಸಾಲಿನ ಫಲಿತಾಂಶದತ್ತ ಎಲ್ಲರ ಚಿತ್ತ ನೆಟ್ಟಿದೆ.
ಮಾ. 27ರಿಂದ ಎಸ್ಸೆಸ್ಸೆಲ್ಸಿ ಪರೀಕ್ಷೆ ಆರಂಭವಾಗಲಿದೆ. ಇನ್ನೊಂದೆಡೆ ಕರೊನಾ ಮಹಾಮಾರಿ ವಕ್ಕರಿಸಿದ್ದರಿಂದ ವಿದ್ಯಾರ್ಥಿಗಳು, ಪಾಲಕರು ಹಾಗೂ ಶಿಕ್ಷಣ ಇಲಾಖೆ ಚಿಂತೆಗೀಡಾಗುವಂತೆ ಮಾಡಿದೆ.
‘ಓದಿನ ಮನೆ’ ಪ್ರಯೋಗ ಜಿಪಂ ಅಧ್ಯಕ್ಷ ಸಿದ್ಧಲಿಂಗೇಶ್ವರ ಪಾಟೀಲ ಅವರ ಕನಸಿನ ಕೂಸು. ಮೂಲಸೌಕರ್ಯ ವಂಚಿತ ಮಕ್ಕಳಲ್ಲಿ (ಬಾಲಕರು) ಕಲಿಕೆಯ ಆಸಕ್ತಿ ಮತ್ತು ಕಲಿಕಾ ಮಟ್ಟವನ್ನು ಹೆಚ್ಚಿಸುವುದೇ ಓದಿನ ಮನೆಯ ಉದ್ದೇಶ. ಕಳೆದ ಡಿಸೆಂಬರ್ನಿಂದ ಮಾರ್ಚ್ ಮೊದಲ ವಾರದವರೆಗೂ ವ್ಯವಸ್ಥಿತವಾಗಿ ನಡೆಯಿತು. ಕರೊನಾ ಕಾಲಿಡುತ್ತಿದ್ದಂತೆ ಓದಿನ ಮನೆಗೆ ಬ್ರೇಕ್ ಬಿದ್ದಿದೆ. ಮಹತ್ವದ ಸಮಯದಲ್ಲಿ ಬಂದಿರುವ ಮಹಾಮಾರಿಯಿಂದಾಗಿ ಫಲಿತಾಂಶದ ಮೇಲೆ ಕೊಂಚ ಪರಿಣಾಮ ಬೀರಬಹುದು ಎನ್ನುತ್ತಿದ್ದಾರೆ ಶಿಕ್ಷಣ ಇಲಾಖೆ ಅಧಿಕಾರಿಗಳು.
172 ಶಾಲೆಯಲ್ಲಿ
ಜಿಲ್ಲೆಯಲ್ಲಿ ಸರ್ಕಾರಿ ಮತ್ತು ಖಾಸಗಿ ಸೇರಿ 286 ಪ್ರೌಢಶಾಲೆಗಳಿದ್ದು, 172 ಶಾಲೆಗಳಲ್ಲಿ ಓದಿನ ಮನೆ ನಡೆಸಲಾಯಿತು. ಓದಿನ ಮನೆಯಲ್ಲಿ (ಸರ್ಕಾರಿ ಶಾಲೆಯಲ್ಲಿ) ಎಸ್ಸೆಸ್ಸೆಲ್ಸಿ ವಿದ್ಯಾರ್ಥಿಗಳಿಗೆ ಸಂಜೆ 6ರಿಂದ ರಾತ್ರಿ 9ರವರೆಗೆ ತರಗತಿ ನಡೆಸಲಾಯಿತು. ಮನೆಯಲ್ಲಿ ಓದಲು ಆಗದವರು ಮತ್ತು ಶೈಕ್ಷಣಿಕವಾಗಿ ಹಿಂದುಳಿದಿರುವ ಮಕ್ಕಳನ್ನು ಗುರುತಿಸಿ ಅವರಿಗೆ ಹೆಚ್ಚುವರಿ ಪಾಠ ಬೋಧನೆ ಮಾಡಲಾಯಿತು. ಇದರಿಂದ ಅನೇಕ ಮಕ್ಕಳು ಕಲಿಕೆಗೆ ಆಸಕ್ತಿ ತೋರಿಸಿದರು. ಅನೇಕ ವಿದ್ಯಾರ್ಥಿಗಳ ಶೈಕ್ಷಣಿಕ ಮಟ್ಟ ವೃದ್ಧಿಸಿದ್ದು, ಈ ಸಲದ ಫಲಿತಾಂಶದಲ್ಲಿ ಗಮನಾರ್ಹ ಸುಧಾರಣೆ ಕಾಣಬಹುದು ಎಂಬ ನಂಬಿಕೆ ಮೂಡಿದೆ. ಜತೆಗೆ ಕರೊನಾ ಹೆಮ್ಮಾರಿಯ ನೆರಳು ಮಕ್ಕಳ ಮೇಲೆ ಬೀಳದಿರಲಿ ಎಂದು ಪಾಲಕರು ಬೇಡಿಕೊಳ್ಳುತ್ತಿದ್ದಾರೆ.
---------------
ಶಿಕ್ಷಕರಿಗೆ, ವಿದ್ಯಾರ್ಥಿಗಳಿಗೆ ಕಡ್ಡಾಯವಿಲ್ಲ
ಪ್ರತಿ ಓದಿನ ಮನೆಯಲ್ಲಿ ಕನಿಷ್ಠ 15ರಿಂದ 25 ಮಕ್ಕಳು ಅಭ್ಯಾಸ ಮಾಡಿದ್ದು, ಜಿಲ್ಲಾದ್ಯಂತ 5ರಿಂದ 6 ಸಾವಿರ ಮಕ್ಕಳು ಪ್ರಯೋಜನ ಪಡೆದುಕೊಂಡಿದ್ದಾರೆ. ಓದಿನ ಮನೆಗೆ ಆಗಮಿಸಿ ಶಿಕ್ಷಕರು ಪಾಠ ಮಾಡಲೇಬೇಕು. ಮಕ್ಕಳು ಹಾಜರಾಗಲೇಬೇಕು ಎಂಬ ಕಡ್ಡಾಯವಿಲ್ಲ. ಮಕ್ಕಳಿಗೆ ಪಾಠ ಮಾಡಬೇಕೆಂಬ ತುಡಿತವುಳ್ಳ ಶಿಕ್ಷಕರಿಗೆ ಅವಕಾಶ ಕಲ್ಪಿಸಲಾಗಿತ್ತು. ಆಯಾ ಗ್ರಾಮದಲ್ಲಿರುವ ಶಿಕ್ಷಕರು ಯಾವುದೇ ಫಲಾಪೇಕ್ಷೆ ಇಲ್ಲದೆ ಮಕ್ಕಳಿಗೆ ಉಚಿತವಾಗಿ ಪಾಠ ಮಾಡಿದ್ದು ಗಮನಾರ್ಹ ಸಂಗತಿ. ಮಕ್ಕಳು ಬೆಳಗ್ಗೆ 10ರಿಂದ ಮಧ್ಯಾಹ್ನ 4.30ರ ವರೆಗೆ ಶಾಲೆಯಲ್ಲಿ ಕಲಿತು 4.30ಯಿಂದ 6 ಗಂಟೆವರೆಗೆ ವಿಶ್ರಾಂತಿ ನಂತರ ಓದಿನ ಮನೆಗೆ ಬರುತ್ತಿದ್ದರು.
-- ಬಾಕ್ಸ್ ---------
ವಿದ್ಯಾರ್ಥಿಗಳಿಗೆ ಪ್ರೋತ್ಸಾಹ
ಎಸ್ಸೆಸ್ಸೆಲ್ಸಿ ಪರೀಕ್ಷೆ ಫಲಿತಾಂಶದಲ್ಲಿ ಪ್ರತಿವರ್ಷ ಜಿಲ್ಲೆಯು 25ರ ನಂತರದ ಸ್ಥಾನ ಪಡೆದಿದ್ದೇ ಹೆಚ್ಚು. ಈ ಹಿನ್ನೆಲೆಯಲ್ಲಿ ಶೈಕ್ಷಣಿಕ ವಾತಾವರಣಕ್ಕೆ ಪ್ರೋತ್ಸಾಹ ನೀಡಬೇಕು, ಮುಖ್ಯವಾಗಿ ಬಾಲಕರಿಗೆ ಹೆಚ್ಚುವರಿ ಶಿಕ್ಷಣ ನೀಡಿದರೆ ಫಲ ಸಿಗಬಹುದು ಎಂಬ ನಿರೀಕ್ಷೆ ಇದೆ. ಎಲ್ಲರೂ ಉತ್ತಮ ಅಂಕ ಗಳಿಸಿ ಪಾಸಾಗುತ್ತಾರೆ ಎಂಬ ಭ್ರಮೆ ಇಲ್ಲ. ಫೇಲಾಗುವವರು ಪಾಸ್ಗೆ ಅಗತ್ಯವಿರುವ ಅಂಕ, ಜಸ್ಟ್ ಪಾಸ್ ಆಗುವವರು ಪ್ರಥಮ, ದ್ವಿತೀಯ ದರ್ಜೆಯಲ್ಲಿ ಪಾಸಾದರೂ ನೂತನ ಪ್ರಯೋಗ ಯಶ ಕಂಡಂತೆ ಎಂದು ಅಧಿಕಾರಿಗಳು ವಿವರಿಸುತ್ತಾರೆ.
--
ಕೋಟ್
ಕರೊನಾ ವೈರಸ್ ಹಾವಳಿ ಇರುವುದರಿಂದ ವಿದ್ಯಾರ್ಥಿಗಳು ಆರೋಗ್ಯದ ಕಡೆಗೆ ಗಮನ ಹರಿಸಬೇಕು. ಯಾವುದೇ ಕಾರಣಕ್ಕೂ ಗಾಳಿ ಸುದ್ದಿಗೆ ತಲೆಕೆಡಿಸಿಕೊಳ್ಳಬೇಡಿ. ಕಾರಣವಿಲ್ಲದೆ ಮನೆಯಿಂದ ಹೊರಗೆ ಸಂಚರಿಸುವುದು ಬೇಡ. ಪಾಲಕರು ಸಹ ಮಕ್ಕಳ ಆರೋಗ್ಯದ ಕಡೆಗೆ ಗಮನ ಹರಿಸಬೇಕು. ಕರೊನಾ ಬಗ್ಗೆ ಭಯಪಡುವುದು ಬೇಡ. ಓದಿನ ಮನೆ ಪ್ರಯೋಗದ ಮೂಲಕ ಸಾಕಷ್ಟು ಶ್ರಮವಹಿಸಿ ಮಕ್ಕಳನ್ನು ಪರೀಕ್ಷೆಗೆ ಅಣಿಗೊಳಿಸಲಾಗಿದ್ದು, ಉತ್ತಮ ಫಲಿತಾಂಶ ನಿರೀಕ್ಷೆಯಲ್ಲಿದ್ದೇವೆ.
ಎನ್.ಎಚ್.ನಾಗೂರ, ಡಿಡಿಪಿಐ, ಗದಗ
---
ಕೋಟ್
ದೇಶದಲ್ಲಿಯೇ ಪ್ರಥಮವಾಗಿ ಎಸ್ಸೆಸ್ಸೆಲ್ಸಿ ವಿದ್ಯಾರ್ಥಿಗಳಿಗೆ ‘ಓದಿನಮನೆ‘ ಎಂಬ ವಿನೂತನ ಯೋಜನೆಯನ್ನು ಗದಗ ಜಿಲ್ಲಾ ಪಂಚಾಯಿತಿಯಿಂದ ಕಳೆದ ಡಿಸೆಂಬರ್ನಿಂದಲೇ ಆರಂಭಿಸಲಾಗಿದೆ. ಮನೆಯಲ್ಲಿ ಅನಾನುಕೂಲ ಇರುವಂತಹ ಮಕ್ಕಳಿಗೆ ಈ ಯೋಜನೆ ತುಂಬಾ ಪ್ರಯೋಜನವಾಗಿದೆ. ಫಲಿತಾಂಶ ಸುಧಾರಣೆಗೂ ಯೋಜನೆ ಪೂರಕವಾಗಲಿದೆ.
ಸಿದ್ಧಲಿಂಗೇಶ್ವರ ಪಾಟೀಲ, ಜಿಪಂ ಅಧ್ಯಕ್ಷ
ಕಪ್ಪತಗುಡ್ಡಕ್ಕೆ ಮತ್ತೆ ಬೆಂಕಿ
ಡೋಣಿ ಭಾಗದಲ್ಲಿ ಕಿಡಿಗೇಡಿಗಳ ದುಷ್ಕೃತ್ಯ | ಅಪಾರ ಪ್ರಮಾಣದ ಸಸ್ಯ ಸಂಪತ್ತು ಭಸ್ಮ
ವಿಜಯವಾಣಿ ಸುದ್ದಿಜಾಲ ಮುಂಡರಗಿ
ತಾಲೂಕಿನ ಡೋಣಿ ಭಾಗದ ಆಯುರ್ವೆದ ಸಸ್ಯಕಾಶಿ ಕಪ್ಪತಗುಡ್ಡ ಅರಣ್ಯ ಪ್ರದೇಶಕ್ಕೆ ಶುಕ್ರವಾರ ಕಿಡಿಗೇಡಿಗಳು ಬೆಂಕಿ ಹಚ್ಚಿದ ಪರಿಣಾಮ ಅಪಾರ ಪ್ರಮಾಣದ ಅರಣ್ಯ ಪ್ರದೇಶ ನಾಶವಾಗಿದೆ.
ಡೋಣಿ ಭಾಗದ ಗ್ವಾಲಗೇರಿ ಮಠದ ಬಳಿಯ ಮುಂಡರಗಿ ವಲಯದ ಕಪ್ಪತಗುಡ್ಡ ಅರಣ್ಯ ಪ್ರದೇಶದಲ್ಲಿ 15ರಿಂದ 20 ಎಕರೆ ಮತ್ತು ಶಿರಹಟ್ಟಿ ವಲಯದಲ್ಲಿ ಅಂದಾಜು 50 ಎಕರೆಗೂ ಹೆಚ್ಚು ಅರಣ್ಯ ಪ್ರದೇಶ ಬೆಂಕಿಗೆ ನಾಶವಾಗಿದೆ. ಘಟನೆ ಸ್ಥಳಕ್ಕೆ ಡಿಎಫ್ಒ ಸೂರ್ಯಸೇನ ಭೇಟಿ ನೀಡಿ ಪರಿಶೀಲಿಸಿದ್ದಾರೆ.
ಪ್ರತಿ ವರ್ಷವೂ ಬೇಸಿಗೆ ಸಮಯದಲ್ಲಿ ಕಪ್ಪತಗುಡ್ಡ ಅರಣ್ಯ ಪ್ರದೇಶಕ್ಕೆ ಬೆಂಕಿ ಬಿದ್ದು ಅಪಾರ ಹಾನಿಯಾಗುತ್ತಿದೆ. ಪ್ರಸಕ್ತ ಸಾಲಿನಲ್ಲಿ ಈಗಾಗಲೇ ಮೂರು ಬಾರಿ ಬೆಂಕಿ ಕಾಣಿಸಿಕೊಂಡಿದ್ದು, ಸಾಕಷ್ಟು ಪ್ರಮಾಣದ ಅರಣ್ಯ ಪ್ರದೇಶ ಬೆಂಕಿಗಾಹುತಿಯಾಗಿದೆ.
ಮುಂಡರಗಿ ಆರ್ಎಫ್ಒ ಎಸ್.ಎಂ. ಶಿವರಾತ್ರೇಶ್ವರಸ್ವಾಮಿ ಹಾಗೂ ಶಿರಹಟ್ಟಿ ಆರ್ಎಫ್ಒ ಸತೀಶ ಪೂಜಾರ ಪ್ರತಿಕ್ರಿಯಿಸಿ, ಯಾರೋ ಕಿಡಿಗೇಡಿಗಳು ದುರುದ್ದೇಶದಿಂದ ಕಪ್ಪತಗುಡ್ಡ ಅರಣ್ಯ ಪ್ರದೇಶಕ್ಕೆ ಬೆಂಕಿ ಹಚ್ಚಿದ್ದಾರೆ. ಅರಣ್ಯ ಇಲಾಖೆ ಸಿಬ್ಬಂದಿ ಬೆಂಕಿ ನಂದಿಸಿದ್ದಾರೆ ಎಂದರು.
20ಎಂಡಿಜಿ7 ಫೋಟೋ ಶೀರ್ಷಿಕೆ:
ಮುಂಡರಗಿ ತಾಲೂಕಿನ ಡೋಣಿ ಭಾಗದ ಕಪ್ಪತಗುಡ್ಡ ಅರಣ್ಯ ಪ್ರದೇಶದಲ್ಲಿ ಬೆಂಕಿ ಬಿದ್ದಿರುವುದನ್ನು ಅರಣ್ಯ ಇಲಾಖೆ ಸಿಬ್ಬಂದಿ ನಂದಿಸಿದರು.