ಕೋತಿಯೊಂದಿಗಿರುವ ವಿಡಿಯೋ ಶೇರ್ ಮಾಡಿಕೊಂಡು ಸಂಕಷ್ಟಕ್ಕೆ ಸಿಲುಕಿದ ಚಿಯಾನ್ ವಿಕ್ರಮ್! ಏನಿದು ವಿವಾದ? Chiyaan Vikram
- ಅಪರೂಪದ ಕೋತಿಯೊಂದಿಗಿನ ವಿಡಿಯೋ ಶೇರ್ ಮಾಡಿ ವಿವಾದಕ್ಕೆ ಸಿಲುಕಿದ ನಟ ವಿಕ್ರಮ್
- ಟೀಕೆಗಳು ವ್ಯಕ್ತವಾದ ಬೆನ್ನಲ್ಲೇ ಇನ್ಸ್ಟಾಗ್ರಾಮ್ನಿಂದ ವಿಡಿಯೋವನ್ನು ಡಿಲೀಟ್ ಮಾಡಿದ ವಿಕ್ರಮ್
- ವೈರಲ್ ವಿಡಿಯೋ ಹಿನ್ನೆಲೆಯಲ್ಲಿ ವಿಕ್ರಮ್ ಅವರ ಮಗಳ ಮಾವನ ವಿರುದ್ಧ ತನಿಖೆ ಆರಂಭ
- ವೈರಲ್ ಆಗಿರುವ ಪ್ರಾಣಿ ಅಳಿವಿನಂಚಿನಲ್ಲಿರುವ ಲಾರ್ ಗಿಬ್ಬನ್ ಪ್ರಭೇದಕ್ಕೆ ಸೇರಿದೆ
- ಕೋತಿ ಹೊಂದಿರುವ ಕುರಿತು ವಿಕ್ರಮ್ ಇದುವರೆಗೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ
ಚೆನ್ನೈ: ದಕ್ಷಿಣ ಭಾರತದ ಖ್ಯಾತ ನಟ ಚಿಯಾನ್ ವಿಕ್ರಮ್ ( Chiyaan Vikram ) ಅವರು ಅಪರೂಪದ ಪ್ರಾಣಿಯ ಜತೆಗಿರುವ ವಿಡಿಯೋವನ್ನು ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳುವ ಮೂಲಕ ಹೊಸ ವಿವಾದವೊಂದನ್ನು ಮೈಮೇಲೆ ಎಳೆದುಕೊ0ಡಿದ್ದಾರೆ.
ಆಗಸ್ಟ್ 9ರಂದು ವಿಕ್ರಮ್ ಅವರು ತಮ್ಮ ಅಧಿಕೃತ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಕೋತಿಯೊಂದಿಗಿನ ವಿಡಿಯೋವನ್ನು ಶೇರ್ ಮಾಡಿಕೊಂಡಿದ್ದರು. ಈ ಸಂಬಂಧ ಮಾಧ್ಯಮ ವರದಿಗಳು ಹೊರಬಿದ್ದ ಬೆನ್ನಲ್ಲೇ ವಿಡಿಯೋವನ್ನು ಡಿಲೀಟ್ ಮಾಡಲಾಗಿದೆ. ಆದರೂ, ಮಾಧ್ಯಮಗಳಲ್ಲಿ ಸಾಕಷ್ಟು ವರದಿಯಾಗಿದ್ದು, ಇದು ಪ್ರಾಣಿ ಪ್ರಿಯಯ ಆಕ್ರೋಶಕ್ಕೆ ಗುರಿಯಾಗಿದೆ. ವೈರಲ್ ವಿಡಿಯೋ ಅರಣ್ಯ ಅಧಿಕಾರಿಗಳ ಗಮನಕ್ಕೆ ಬಂದಿದ್ದು, ವಿಕ್ರಮ್ ಅವರ ಮಗಳ ಮಾವನ ವಿರುದ್ಧ ತನಿಖೆ ಆರಂಭಿಸಿದೆ.
ಅಂದಹಾಗೆ, ವೈರಲ್ ವಿಡಿಯೋದಲ್ಲಿರುವ ಪ್ರಾಣಿಯನ್ನು ಅಳಿವಿನಂಚಿನಲ್ಲಿರುವ 'ಲಾರ್ ಗಿಬ್ಬನ್' (Lar Gibbon) ಎಂದು ಗುರುತಿಸಲಾಗಿದ್ದು, ಇದು ವನ್ಯಜೀವಿ ಸಂರಕ್ಷಣಾ ಕಾಯ್ದೆ ಮತ್ತು ಅಂತಾರಾಷ್ಟ್ರೀಯ ಒಪ್ಪಂದಗಳ ಅಡಿಯಲ್ಲಿ ಸಂರಕ್ಷಿಸಲ್ಪಟ್ಟ ಪ್ರಮುಖ ಪ್ರಾಣಿಯಾಗಿದೆ.
ಮಣಿಪುರದಿಂದ ತಮಿಳುನಾಡಿನ ಈರೋಡ್ಗೆ ಜೂನ್ ತಿಂಗಳಲ್ಲಿ ತರಲಾಗಿದ್ದ ಈ ಅಪರೂಪದ ಕೋತಿಯನ್ನು ಸಿ.ಕೆ. ರಂಗನಾಥನ್ ಅವರು ಅಧಿಕೃತವಾಗಿ ಖರೀದಿಸಿದ್ದಾರೆ ಎಂದು ವರದಿಯಾಗಿದ್ದರೂ, ಅದನ್ನು ಹೊಂದಲು ಅವರ ಬಳಿ ಸೂಕ್ತ ದಾಖಲೆಗಳಿಲ್ಲ ಎಂಬ ಆರೋಪ ಕೇಳಿಬಂದಿದ್ದು, ಇದು ಆಗ್ನೇಯ ಏಷ್ಯಾದಿಂದ ಕಳ್ಳಸಾಗಣೆಯಾಗಿರಬಹುದು ಎಂದೂ ಶಂಕಿಸಲಾಗಿದೆ.
ಕೆವಿನ್ ಕೇರ್ (Kavincare) ಸಂಸ್ಥೆಯ ಸಂಸ್ಥಾಪಕ ಹಾಗೂ ಸಿ.ಕೆ. ರಂಗನಾಥನ್ ಅವರ ಮಗ ಮನು ರಂಜಿತ್ ಅವರು ನಟ ವಿಕ್ರಮ್ ಅವರ ಮಗಳು ಅಕ್ಷಿತಾ ಅವರ ಪತಿ. ಸದ್ಯ ಕೋತಿ ವಿವಾದದ ಕುರಿತು ನಟ ವಿಕ್ರಮ್ ಇದುವರೆಗೆ ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ. ಈ ವಿವಾದದ ಬಗ್ಗೆ ವಿಕ್ರಮ್ ಯಾವ ರೀತಿ ಪ್ರತಿಕ್ರಿಯೆ ನೀಡುತ್ತಾರೆ ಎಂದು ಕಾದು ನೋಡಬೇಕಿದೆ, (ಏಜೆನ್ಸೀಸ್).