ತ್ರಿಷಾ ಕೃಷ್ಣನ್ ಅವರು ಕೊಯಮತ್ತೂರಿಗೆ ಆಗಮಿಸಿದ್ದು ಕೇವಲ ಒಂದು ಮೊಬೈಲ್ ಶೋರೂಮ್ ಉದ್ಘಾಟನಾ ಕಾರ್ಯಕ್ರಮಕ್ಕಾಗಿ. ಆದರೆ, ನೆಚ್ಚಿನ ನಟಿಯನ್ನು ಕಣ್ಣಾರೆ ಕಾಣಲು ಸಾವಿರಾರು ಸಂಖ್ಯೆಯಲ್ಲಿ ಅಭಿಮಾನಿಗಳು ಮುಗಿಬಿದ್ದಿದ್ದರಿಂದ ಕಾರ್ಯಕ್ರಮವು ಬೃಹತ್ ಸಭಾಂಗಣ ಅಥವಾ ರಾಜಕೀಯ ಸಮಾವೇಶದ ರೂಪ ಪಡೆಯಿತು.
ಬೃಹತ್ ಸಂಖ್ಯೆಯಲ್ಲಿ ನೆರೆದಿದ್ದ ಅಭಿಮಾನಿಗಳನ್ನು ಕಂಡು ನಟಿ ತ್ರಿಷಾ ತೆರೆದ ವಾಹನದಲ್ಲಿ ನಿಂತು ಎಲ್ಲರಿಗೂ ಕೈಬೀಸುತ್ತಾ ಸಂಚರಿಸಿದರು. ಈ ದೃಶ್ಯಗಳು ರಾಜಕೀಯ ನಾಯಕರ ಬೃಹತ್ ರೋಡ್ ಶೋ ಮಾದರಿಯಲ್ಲೇ ಇದ್ದು, ಸಾರ್ವಜನಿಕರ ಹಾಗೂ ಮಾಧ್ಯಮಗಳ ಗಮನವನ್ನು ತೀವ್ರವಾಗಿ ಸೆಳೆದವು.
ಕಳೆದ ಕೆಲವು ಸಮಯದಿಂದ ತಮಿಳುನಾಡು ರಾಜಕೀಯದಲ್ಲಿ ತ್ರಿಷಾ ಅವರ ಹೆಸರು ಕೇಳಿಬರುತ್ತಿದೆ. ಕೊಯಮತ್ತೂರಿನಲ್ಲಿ ನಡೆದ ಈ ಬೃಹತ್ ರೋಡ್ ಶೋ, ಸಿನಿಮಾ ರಂಗವನ್ನು ಮೀರಿ ಅವರ ಮುಂದಿನ ರಾಜಕೀಯ ಭವಿಷ್ಯ ಮತ್ತು ಹೆಜ್ಜೆಗಳ ಕುರಿತು ಸೋಶಿಯಲ್ ಮೀಡಿಯಾದಲ್ಲಿ ಬಿಸಿಬಿಸಿ ಚರ್ಚೆಗೆ ಕಾರಣವಾಗಿದೆ.
ತಮಿಳುನಾಡು ವೆಟ್ರಿ ಕಳಗಂ (TVK) ಪಕ್ಷದ ಬೆಂಬಲಿಗರು ಹಾಗೂ ಅಭಿಮಾನಿಗಳು ತ್ರಿಷಾ ಅವರ ರಾಜಕೀಯ ಪ್ರವೇಶದ ಬಗ್ಗೆ ತೀವ್ರ ಆಸಕ್ತಿ ತೋರುತ್ತಿದ್ದಾರೆ. ದಳಪತಿ ವಿಜಯ್ ಅವರೊಂದಿಗೆ ತ್ರಿಷಾ ರಾಜಕೀಯವಾಗಿ ಕೈಜೋಡಿಸಲಿದ್ದಾರೆ ಎಂಬ ಚರ್ಚೆಗಳು ಟಿವಿಕೆ ಕಾರ್ಯಕರ್ತರ ನಡುವೆ ಹೊಸ ತರಂಗವನ್ನು ಸೃಷ್ಟಿಸಿವೆ.
ಕೊಯಮತ್ತೂರಿನಲ್ಲಿ ಸುದ್ಧಿಗಾರರು ರಾಜಕೀಯ ಪ್ರವೇಶದ ಬಗ್ಗೆ ನೇರವಾಗಿ ಪ್ರಶ್ನಿಸಿದಾಗ, ತ್ರಿಷಾ ಯಾವುದೇ ಸ್ಪಷ್ಟ ಅಥವಾ ನೇರ ಉತ್ತರ ನೀಡಲಿಲ್ಲ. ಬದಲಿಗೆ ಕೇವಲ ಮಂದಹಾಸ ಬೀರುವ ಮೂಲಕ ಕುತೂಹಲವನ್ನು ಹಾಗೆಯೇ ಕಾಯ್ದುಕೊಂಡಿದ್ದಾರೆ.
ಕೊಯಮತ್ತೂರಿನಲ್ಲಿ ನಡೆದ ಈ ಘಟನೆಯು ಯಾವುದೇ ಅಧಿಕೃತ ರಾಜಕೀಯ ಕಾರ್ಯಕ್ರಮವಾಗಿರಲಿಲ್ಲ. ಜೊತೆಗೆ ತ್ರಿಷಾ ಅವರ ಕಡೆಯಿಂದಾಗಲಿ ಅಥವಾ ಯಾವುದೇ ರಾಜಕೀಯ ಪಕ್ಷದ ಕಡೆಯಿಂದಾಗಲಿ ಅವರ ರಾಜಕೀಯ ಸೇರ್ಪಡೆ ಕುರಿತು ಅಧಿಕೃತ ಪ್ರಕಟಣೆ ಹೊರಬಿದ್ದಿಲ್ಲ.
ಅಧಿಕೃತ ಕಾರ್ಯಕ್ರಮವಲ್ಲದಿದ್ದರೂ ಹರಿದುಬಂದ ಜನಸಾಗರ ಮತ್ತು ಜನರಲ್ಲಿದ್ದ ಕಾತುರವು ಪ್ರಮುಖ ಪ್ರಶ್ನೆಯೊಂದನ್ನು ಹುಟ್ಟುಹಾಕಿದೆ| ತ್ರಿಷಾ ಕೇವಲ ಸಿನಿಮಾಗಳಿಗೆ ಸೀಮಿತವಾಗದೆ, ರಾಜಕೀಯದಲ್ಲಿಯೂ ದೊಡ್ಡ ಪಾತ್ರ ವಹಿಸಲು ಸಿದ್ಧತೆ ನಡೆಸುತ್ತಿದ್ದಾರೆಯೇ? ಎಂಬ ಅನುಮಾನ ಹುಟ್ಟಿಸಿದೆ.
ಪ್ರಸ್ತುತ ರಾಜಕೀಯ ಪ್ರವೇಶದ ಬಗ್ಗೆ ಯಾವುದೇ ಖಚಿತ ಮಾಹಿತಿ ಇಲ್ಲದಿದ್ದರೂ, ಟಿವಿಕೆ ಬೆಂಬಲಿಗರ ಉತ್ಸಾಹ ಮತ್ತು ಕೊಯಮತ್ತೂರು ರೋಡ್ ಶೋ ನೀಡಿದ ಮೈಲೇಜ್ ತಮಿಳುನಾಡು ರಾಜಕೀಯದಲ್ಲಿ ತ್ರಿಷಾ ಅವರ ಸುತ್ತಲಿನ ಕುತೂಹಲವನ್ನು ಜೀವಂತವಾಗಿರಿಸಿದೆ.