ಬೆಂಗಳೂರು: ಸುದೀಪ್ ಅಭಿನಯದ "ವಿಕ್ರಾಂತ್ ರೋಣ' ಚಿತ್ರವು ಜುಲೈ 28ರಂದು ಜಗತ್ತಿನಾದ್ಯಂತ ಬಿಡುಗಡೆಯಾಗುತ್ತಿದೆ. ಈ ಮಧ್ಯೆ, ಚಿತ್ರದ ಅಂತಾರಾಷ್ಟ್ರೀಯ ವಿತರಣೆಯ ಹಕ್ಕುಗಳು 10 ಕೋಟಿ ರೂ.ಗಳಿಗೆ ಮಾರಾಟವಾಗಿದೆ ಎಂಬ ಸುದ್ದಿಯೊಂದು ಬಂದಿದೆ.
"ವಿಕ್ರಾಂತ್ ರೋಣ' ಪ್ಯಾನ್ ಇಂಡಿಯಾ ಚಿತ್ರವಾಗಿದ್ದು, ಭಾರತವಲ್ಲದೆ ಬೇರೆ ದೇಶಗಳಲ್ಲೂ ಏಕಕಾಲಕ್ಕೆ ಬಿಡುಗಡೆಯಾಗುತ್ತಿದೆ. ಚಿತ್ರದ ಓವರ್ಸೀಸ್ (ಸಾಗರೋತ್ತರ) ಹಕ್ಕುಗಳನ್ನು ಒನ್ ಟ್ವೆಂಟಿ 8 ಮೀಡಿಯಾ ಎಂಬ ಸಂಸ್ಥೆಯು ಪಡೆದುಕೊಂಡಿದೆ. ಎಷ್ಟು ಮೊತ್ತಕ್ಕೆ ವ್ಯಾಪಾರ ನಡೆದಿದೆ ಎಂಬ ವಿಷಯವನ್ನು ನಿರ್ಮಾಪಕರಾಗಲೀ ಅಥವಾ ಒನ್ ಟ್ವೆಂಟಿ 8 ಮೀಡಿಯಾ ಮೀಡಿಯಾದವರು ಹೇಳದಿದ್ದರೂ, 1.3 ಮಿಲಿಯನ್ ಡಾಲರ್ಗೆ (10 ಕೋಟಿ ರೂ.) ಮಾರಾಟವಾಗಿದೆ ಎಂದು ಮೂಲಗಳು ತಿಳಿಸುತ್ತವೆ.
ಈ ವ್ಯವಹಾರವು ಕನ್ನಡ ಚಿತ್ರಕ್ಕೆ ಬಹಳ ದೊಡ್ಡದು ಮತ್ತು ದಕ್ಷಿಣ ಭಾರತದ ಇತರೆ ಭಾಷೆಗಳಿಗೆ ಸಮನಾಗಿದೆ ಎಂದು ನಿರ್ಮಾಪಕ ಜಾಕ್ ಮಂಜು ಹೇಳಿಕೊಂಡಿದ್ದಾರೆ. "ವಿಕ್ರಾಂತ್ ರೋಣ' ಚಿತ್ರದಲ್ಲಿ ಸುದೀಪ್ ಜತೆಗೆ ಜಾಕ್ಲೀನ್ ರ್ನಾಂಡಿಸ್, ನಿರೂಪ್ ಭಂಡಾರಿ, ನೀತಾ ಅಶೋಕ್, ರವಿಶಂಕರ್ ಗೌಡ ಮುಂತಾದವರು ನಟಿಸಿದ್ದು, ಅನೂಪ್ ಭಂಡಾರಿ ಕಥೆ&ಚಿತ್ರಕಥೆ ಬರೆದು ನಿರ್ದೇಶನ ಮಾಡಿದ್ದಾರೆ. ಅಜನೀಶ್ ಲೋಕನಾಥ್ ಸಂಗೀತ ಮತ್ತು ವಿಲಿಯಂ ಡೇವಿಡ್ ಛಾಯಾಗ್ರಹಣವಿರುವ "ವಿಕ್ರಾಂತ್ ರೋಣ'ದ ಪ್ರಚಾರ ಕೆಲಸಗಳು ಮುಂದಿನ ತಿಂಗಳಿನಿಂದ ಪ್ರಾರಂಭವಾಗಲಿದೆ.