ವಿಜಯವಾಣಿ ಸುದ್ದಿಜಾಲ ಬೆಂಗಳೂರು:
"ಬಡವ ರಾಸ್ಕಲ್', "ಲಕ್ಕಿಮ್ಯಾನ್', "ಕೌಸಲ್ಯಾ ಸುಪ್ರಜಾ ರಾಮ' ಸೇರಿ ಹಲವು ಚಿತ್ರಗಳಲ್ಲಿ ಹಾಸ್ಯನಟನಾಗಿ ಗುರುತಿಸಿಕೊಂಡಿದ್ದ ನಾಗಭೂಷಣ್, "ಇಕ್ಕಟ್' ಮೂಲಕ ಹೀರೋ ಆಗಿದ್ದು ಗೊತ್ತಿದೆ. ಆ ಬಳಿಕ "ಟಗರುಪಲ್ಯ' ಚಿತ್ರದಲ್ಲಿ ನಾಯಕನಾಗಿ ನಟಿಸಿದ್ದ ಅವರು ಇದೀಗ "ವಿದ್ಯಾಪತಿ' ಎಂಬ ಔಟ್ ಆ್ಯಂಡ್ ಔಟ್ ಕಾಮಿಡಿ ಸಿನಿಮಾದಲ್ಲಿ ಹೀರೋ ಆಗಿದ್ದಾರೆ. "ಇಕ್ಕಟ್' ಚಿತ್ರ ನಿರ್ದೇಶಿಸಿದ್ದ ಇಶಾಮ್ ಮತ್ತು ಹಸೀನ್ ಖಾನ್ "ವಿದ್ಯಾಪತಿ'ಗೂ ಆ್ಯಕ್ಷನ್&ಕಟ್ ಹೇಳುತ್ತಿದ್ದಾರೆ. ಜತೆಗೆ ಕಥೆ ಮತ್ತು ಸಂಕಲನದ ಜವಾಬ್ದಾರಿಯನ್ನೂ ಅವರೇ ಹೊತ್ತಿದ್ದಾರೆ.
ಇತ್ತೀಚೆಗಷ್ಟೇ ನಾಯಕ ನಾಗಭೂಷಣ ಹುಟ್ಟುಹಬ್ಬಕ್ಕೆ ಚಿತ್ರತಂಡ ವಿದ್ಯಾಪತಿಯ ಕಿತಾಪತಿಯ ಝಲಕ್ ಇರುವ ಪ್ರೋಮೊ ರಿಲೀಸ್ ಮಾಡಿದೆ. ಹಾಗೇ "ಜೇಬು ತುಂಬ ಕಾಸಿರೋನು ಕೋಟ್ಯಾಧಿಪತಿ… ನಿಮ್ಮನ್ನೆಲ್ಲ ಹೊಟ್ಟೆತುಂಬ ನಗಿಸೋನೇ ನಮ್ಮ ವಿದ್ಯಾಪತಿ' ಎಂದು ನಾಯಕನನ್ನು ಪರಿಚಯಿಸಲಾಗಿದೆ. "ಟಗರುಪಲ್ಯ' ಬಳಿಕ ಡಾಲಿ ಧನಂಜಯ ಡಾಲಿ ಪಿಕ್ಚರ್ಸ್ ಬ್ಯಾನರ್ನಲ್ಲಿ ಈ ಸಿನಿಮಾ ನಿರ್ಮಿಸುತ್ತಿದ್ದಾರೆ.
ನಾಗಭೂಷಣ "ವಿದ್ಯಾಪತಿ'ಯಲ್ಲಿ ಕರಾಟೆ ಪಟು ಪಾತ್ರದಲ್ಲಿ ವಿಭಿನ್ನ ಲುಕ್ನಲ್ಲಿ ಕಾಣಿಸಿಕೊಳ್ಳಲಿದ್ದು, ಅವರಿಗೆ "ಉಪಾಧ್ಯಕ್ಷ' ನಾಯಕಿ ಮಲೈಕಾ ವಸುಪಾಲ್ ಜೋಡಿಯಾಗಿದ್ದಾರೆ. ಜತೆಗೆ ರಂಗಾಯಣ ರಘು ಮುಖ್ಯ ಭೂಮಿಕೆಯಲ್ಲಿದ್ದಾರೆ.