ನವದೆಹಲಿ : ನಟ ಸಂಜಯ್ ಕಪೂರ್ ಮಗಳಾದ ಶನಾಯಾ ಕಪೂರ್ ಇನ್ನೂ ಬಾಲಿವುಡ್ ಪ್ರವೇಶಿಸಲು ಸಜ್ಜಾಗಿದ್ದಾರೆ ಅಷ್ಟೆ. ಆದರೆ ಅದಾಗಲೇ ಅವರು ಸಾವಿರಾರು ಅಭಿಮಾನಿಗಳನ್ನು ಸಂಪಾದಿಸಿದ್ದಾರೆ. ಅದಕ್ಕೆ ಒಂದು ಮುಖ್ಯ ಕಾರಣ, ಇನ್ಸ್ಟಾಗ್ರಾಂನಲ್ಲಿ ಅವರು ಪೋಸ್ಟ್ ಮಾಡುವ ಡ್ಯಾನ್ಸ್ ವಿಡಿಯೋಗಳು.
ಬೆಲ್ಲಿ ಡ್ಯಾನ್ಸ್ ಕಲಿಯುತ್ತಿರುವ ಶನಾಯಾ ಆಗಾಗ್ಗೆ ತಮ್ಮ ತರಗತಿಯಲ್ಲಿ ಕಲಿತ ಹೊಸ ಸೀಕ್ವೆನ್ಸ್ಗಳ ವಿಡಿಯೋ ಶೇರ್ ಮಾಡುತ್ತಿರುತ್ತಾರೆ. ಅವರ ಹೊಸ ವಿಡಿಯೋದಲ್ಲಿ ಅವರು ನೆಲದ ಮೇಲೆ ಕೂತು ಮಾಡುವ ಸ್ಟೆಪ್ಗಳು ನೆಟ್ಟಿಗರ ಮನ ಸೆಳೆದಿದೆ. ಈ ವಿಶಿಷ್ಟ ಮಾದರಿಯ ನೃತ್ಯವನ್ನು ತಮ್ಮ ಇನ್ಸ್ಟ್ರಕ್ಟರ್ ಸಂಜನಾ ಮುತ್ರೇಜಾರೊಂದಿಗೆ ಆಕರ್ಷಕವಾಗಿ ಪ್ರದರ್ಶಿಸಿದ್ದಾರೆ. ನಿನ್ನೆ ಬೆಳಿಗ್ಗೆ ಶೇರ್ ಮಾಡಿರುವ ವಿಡಿಯೋಗೆ ಅದಾಗಲೇ 3 ಲಕ್ಷಕ್ಕೂ ಹೆಚ್ಚು ವೀಕ್ಷಣೆ ಸಿಕ್ಕಿದ್ದು, ಲೈಕ್ಗಳ ಸುರಿಮಳೆಯಾಗುತ್ತಿದೆ. ನೀವೂ ನೋಡಿ -
ಹಿನ್ನೆಲೆಯಲ್ಲಿ ಶಕೀರಾ ಮತ್ತು ಬೆಯಾನ್ಸ್ನ ಬ್ಯೂಟಿಫುಲ್ ಲೈಯರ್ ಹಾಡಿನ ಸಂಗೀತ ಹಾಕಿದ್ದಾರೆ. ಬೆಲ್ಲಿ ಡ್ಯಾನ್ಸ್ನ ನಾಜೂಕು ಶೈಲಿಯನ್ನು ಕಲಿಯುವುದು ಸುಲಭವೇನಲ್ಲ. ಅದರಲ್ಲೂ "ನೆಲದ ಮೇಲೆ ಮಾಡುವ ಸ್ಟೆಪ್ಗಳನ್ನು ಕಲಿಯುವುದು ದೊಡ್ಡ ಸವಾಲು" ಎಂದಿರುವ ಶನಾಯಾ, ತಮ್ಮನ್ನು ಪ್ರೇರೇಪಿಸುವ ತಮ್ಮ ಶಿಕ್ಷಕಿ ಸಂಜನಾಗೆ ಧನ್ಯವಾದ ಸೂಚಿಸಿದ್ದಾರೆ. (ಏಜೆನ್ಸೀಸ್)