ಏನಿದು ನಿರ್ದೇಶಕ ಸಂದೀಪ್​​ ಮೈಂಡ್​ ಗೇಮ್ಸ್? ತ್ರಿಪ್ತಿ ದಿಮ್ರಿ ಪಾತ್ರಕ್ಕೆ ಹೆಚ್ಚು 'ಸ್ಪಿರಿಟ್'​, 2 ಚಿತ್ರಗಳಲ್ಲಿದ್ದ ವಿಷಯವೇ ರಿಪೀಟ್​!

ಆಂಧ್ರಪ್ರದೇಶ: ಟಾಲಿವುಡ್​ ರೆಬೆಲ್​ ಸ್ಟಾರ್​​ ಪ್ರಭಾಸ್ ಅಭಿನಯದ ಹಾಗೂ ಸಂದೀಪ್​ ರೆಡ್ಡಿ ವಂಗಾ ನಿರ್ದೇಶಿಸಿರುವ ಬಹುನಿರೀಕ್ಷಿತ ತೆಲುಗು ಸಿನಿಮಾ 'ಸ್ಪಿರಿಟ್'​ ಫಸ್ಟ್​ ಲುಕ್​ ಇಂದು ಅಧಿಕೃತವಾಗಿ ಹೊರಬಿದ್ದಿದೆ. ಭಾರೀ ನಿರೀಕ್ಷೆಗಳನ್ನು ಹೊತ್ತಿರುವ ಈ ಚಿತ್ರವು, ತನ್ನ ಮೇಕಿಂಗ್ ಅಥವಾ ಇತರೆ ವಿಚಾರಗಳಿಗಿಂತ ವಿವಾದಗಳಿಂದಲೇ ಹೆಚ್ಚು ಸದ್ದು ಮಾಡಿತು. ದೀಪಿಕಾ ಪಡುಕೋಣೆ ಅವರನ್ನು ಹೊರಗಿಟ್ಟು, ಅವರ ಸ್ಥಾನಕ್ಕೆ ಅನಿಮಲ್​ ಚಿತ್ರದ ಯುವ ನಟಿ ತ್ರಿಪ್ತಿ ದಿಮ್ರಿಗೆ ಅವಕಾಶ ನೀಡಿದ ಸಂದೀಪ್​, ಪ್ರಥಮ ಬಾರಿಗೆ ತಮ್ಮ ಚಿತ್ರದಲ್ಲಿ ನಾಯಕನಿಗಿಂತ ನಾಯಕಿ ಪಾತ್ರಕ್ಕೆ ಹೆಚ್ಚು ಆದ್ಯತೆ ಕೊಟ್ಟಂತಿದೆ.

ಹೊಸ ವರ್ಷಕ್ಕೆ ಫಸ್ಟ್ ಲುಕ್ ಪೋಸ್ಟರ್ ಬಿಡುಗಡೆಗೊಳಿಸಿರುವ ಚಿತ್ರತಂಡ, ಪ್ರಭಾಸ್​ ಅಭಿಮಾನಿಗಳು ಹಾಗೂ ಸಿನಿಪ್ರಿಯರ ಕುತೂಹಲವನ್ನು ಕೆರಳಿಸಿದೆ. ಇದರಲ್ಲಿ, ಹೊಸ ಪ್ರಭಾಸ್​ರನ್ನು ನೋಡುವ ಅವಕಾಶ ಚಿತ್ರಪ್ರೇಮಿಗಳಿಗೆ ಸಿಗಲಿದೆ ಎಂಬುದು ಖಚಿತ. ಏಕೆಂದರೆ, ಶರ್ಟ್​ ಇಲ್ಲದೆ, ಗಾಯಗಳು, ಬ್ಯಾಂಡೇಜ್‌ಗಳಿರುವ, ಮದ್ಯದ ಬಾಟಲಿ, ನಾಯಕನಿಗೆ ತ್ರಿಪ್ತಿ ಸಿಗರೇಟ್ ಲೈಟ್​ ಮಾಡುತ್ತಿರುವ ಫೋಟೋಗಳು ಕಥೆಯ ಮೇಲಿನ ಕುತೂಹಲವನ್ನು ದುಪ್ಪಟ್ಟಾಗಿಸಿದೆ ಎಂದೇ ಹೇಳಬಹುದು.

ಸಾಮಾನ್ಯವಾಗಿ, ಪ್ಯಾನ್ ಇಂಡಿಯಾ ಹಾಗೂ ಸ್ಟಾರ್ ನಟರ ಸಿನಿಮಾಗಳ ಫಸ್ಟ್ ಲುಕ್ ಪೋಸ್ಟರ್‌ಗಳಲ್ಲಿ ಹೀರೋ ಮೇಲೆ ಮಾತ್ರ ಚಿತ್ರತಂಡ ಹೆಚ್ಚು ಫೋಕಸ್​ ಮಾಡುತ್ತದೆ. ಆದರೆ, ಸಂದೀಪ್​ ನಿರ್ದೇಶನದ ಸ್ಪಿರಿಟ್‌ನಲ್ಲಿ, ನಾಯಕಿಯ ಪಾತ್ರಕ್ಕೆ ಹೆಚ್ಚು ಆದ್ಯತೆ ಹಾಗೂ ಪ್ರಾಮುಖ್ಯತೆ ನೀಡಿರುವುದು ಸ್ಪಷ್ಟವಾಗಿ ಕಾಣುತ್ತಿದೆ. ಸಿನಿಮಾದ ಫಸ್ಟ್​ ಲುಕ್​ ಪೋಸ್ಟರ್​ನಲ್ಲಿ ಹೀರೋ ಜತೆಗೆ ಹೀರೋಯಿನ್​ ಕಾಣಿಸಿಕೊಂಡಿರುವ ದೃಶ್ಯ ಸೋಷಿಯಲ್​ ಮೀಡಿಯಾದಲ್ಲಿ ಹಲ್​ಚಲ್​ ಎಬ್ಬಿಸಿದೆ.

ಪ್ರಭಾಸ್​ ಅಭಿನಯದ ರಿಲೀಸ್​ಗೆ ಸಜ್ಜಾಗಿರುವ ಸಿನಿಮಾಗಳ ಪೈಕಿ ಸ್ಪಿರಿಟ್​ ಮೇಲೆ ಸಾಕಷ್ಟು ನಿರೀಕ್ಷೆಗಳು ಮೂಡಿವೆ. ಪ್ರಭಾಸ್​ ಮತ್ತು ತ್ರಿಪ್ತಿ ದಿಮ್ರಿ ಮುಖ್ಯಭೂಮಿಕೆಯಲ್ಲಿ ಕಾಣಿಸಿಕೊಂಡಿರುವ ಈ ಸಿನಿಮಾದ ರಿಲೀಸ್​ ಡೇಟ್​ ಇನ್ನೂ ಅಧಿಕೃತವಾಗಿ ಘೋಷಣೆಯಾಗಿಲ್ಲ. ಚಿತ್ರದ ಪೋಸ್ಟ್ ಪ್ರೊಡಕ್ಷನ್‌ ಕೆಲಸಗಳು ಸಾಕಷ್ಟು ಸಮಯವನ್ನು ತೆಗೆದುಕೊಳ್ಳಬಹುದು ಎನ್ನಲಾಗಿದೆ,(ಏಜೆನ್ಸೀಸ್).