ನಟನೆಯಿಂದ 4 ವರ್ಷಗಳ ಬ್ರೇಕ್: ಮಾಧವನ್ 2.0 ರೂಪಾಂತರದ ಹಿಂದೆ ಅಡಗಿದೆ ಮರೆಯಲಾಗದ ಅವಮಾನದ ಕಥೆ! R Madhavan

ಅನ್‌ಫಿಲ್ಟರ್ಡ್ ಎಂಟರ್‌ಟೈನ್‌ಮೆಂಟ್ ಜೊತೆಗಿನ ಸಂಭಾಷಣೆಯಲ್ಲಿ ಮಾತನಾಡಿದ ಮಾಧವನ್,​ ಆರಂಭಿಕ ದಿನಗಳಲ್ಲಿ ಚಾಕೊಲೇಟ್ ಬಾಯ್ ಅಥವಾ ಪ್ರೇಮಿ ಹುಡುಗ ಎಂಬ ಹೆಸರಿಗೆ ಸೀಮಿತವಾಗಿದ್ದೆ. ಈ ಇಮೇಜ್​ ಬದಲಾಗಲು ಒಂದು ಕಾರಣವಿದೆ. ಅದೇನೆಂದರೆ ಸ್ವಿಟ್ಜರ್ಲೆಂಡ್‌ನ ಸುಂದರ ಪ್ರದೆಶವೊಂದರಲ್ಲಿ ತಮಿಳು ಹಾಡಿಗೆ ನೃತ್ಯ ಮಾಡುತ್ತಾ ಶೂಟಿಂಗ್​ನಲ್ಲಿ ತೊಡಗಿದ್ದಾಗ ಅಲ್ಲಿನ ಸ್ಥಳೀಯ ರೈತನೊಬ್ಬ ನನ್ನನ್ನು ತಿರಸ್ಕಾರದಿಂದ ನೋಡಿದ್ದರು.

ಆ ವೇಳೆ ನಾನು ಅವನನ್ನು ನೋಡಿ ನೀವು ಚೆನ್ನೈಗೆ ಬನ್ನಿ, ನಾನು ಯಾರೆಂದು ನಿಮಗೆ ತೋರಿಸುತ್ತೇನೆ ಎಂದು ಹೇಳಿದೆ. ಆ ಸಮಯದಲ್ಲಿ ನನಗೆ ನಿಜವಾಗಿಯೂ ಮನನೊಂದಿತ್ತು. ಆದರೆ ಇತರರ ರಾಗಗಳಿಗೆ ನೃತ್ಯ ಮಾಡುತ್ತಿದ್ದೇನೆ ಎಂದು ನನಗೆ ಇದ್ದಕ್ಕಿದ್ದಂತೆ ಅನಿಸಲು ಪ್ರಾರಂಭಿಸಿತು ಎಂದರು.

ಈ ಘಟನೆ ನಡೆದ ನಂತರ ಸುಮಾರು 4 ವರ್ಷಗಳ ಕಾಲ ಮಾಧವನ್​ ನಟನೆಯಿಂದ ದೂರ ಉಳಿಯುವ ನಿರ್ಧಾರವನ್ನು ಕೈಗೊಂಡರು. ಒಬ್ಬ ಜನಪ್ರಿಯ ನಟ ವೃತ್ತಿಜೀವನದ ಉತ್ತುಂಗದಲ್ಲಿ ಇಂತಹ ವಿರಾಮ ತೆಗೆದುಕೊಳ್ಳುವುದು ಸುಲಭದ ಮಾತಲ್ಲ.

ಆದರೆ, ಮಾಧವನ್ ಈ ಸಮಯವನ್ನು ತಮ್ಮ ಆತ್ಮಾವಲೋಕನಕ್ಕಾಗಿ ಬಳಿಸಿಕೊಂಡು, ತಮಗೆ ಬರುವಂತಹ ರೊಮ್ಯಾಂಟಿಕ್​ ಕಥೆಗಳನ್ನು ತಿರಸ್ಕರಿಸಿದರು. ಬದಲಾಗಿ, ತಮಗೊಬ್ಬ ನಟನಾಗಿ ಸವಾಲು ನೀಡುವ ಕಥೆಗಳಿಗಾಗಿ ಕಾಯಲು ಪ್ರಾರಂಭಿಸಿದರು.

ಈ ಅವಧಿಯಲ್ಲಿ ನಾನು ನಟನೆ, ಜಾಹಿರಾತುಗಳನ್ನು ನಿಲ್ಲಿಸಿದೆ ಬದಲಾಗಿ ಭಾರತದಾದ್ಯಂತ ಪ್ರಯಾಣ ನಡೆಸಲು ಪ್ರಾರಂಭಿಸಿದೆ. ರಿಕ್ಷಾ ಚಾಲಕರು ಹೇಗೆ ಮಾತನಾಡುತ್ತಾರೆ ಎಂಬುದನ್ನು ಅರ್ಥಮಾಡಿಕೊಂಡೆ. ಆ ನಾಲ್ಕು ವರ್ಷಗಳ ಒಳನೋಟವು ಬಹುಶಃ ಈಗ ತಿನ್ನುತ್ತಿದ್ದೇನೆ ಎಂದರು.

ಈ ವಿರಾಮದ ನಂತರ ಮರಳಿದ ಮಾಧವನ್ ಅವರನ್ನು ಅಭಿಮಾನಿಗಳು 'ಮಾಧವನ್ 2.0' ಎಂದು ಕರೆಯುತ್ತಿದ್ದಾರೆ. ಅವರ ಮರಳುವಿಕೆಯ ನಂತರ ಬಂದ ಚಿತ್ರಗಳು ಅವರ ಅಭಿನಯದ ಹೊಸ ಆಯಾಮವನ್ನು ಪರಿಚಯಿಸಿದವು.

ಮಾಧವನ್ ಅವರ ಈ ಪಯಣವು ಪ್ರತಿಭೆ ಇದ್ದರೂ ಸರಿಯಾದ ಹಾದಿಗಾಗಿ ಕಾಯುವ ತಾಳ್ಮೆ ಎಷ್ಟು ಮುಖ್ಯ ಎಂಬುದನ್ನು ಕಲಿಸುತ್ತದೆ. ಬರಿ ನೃತ್ಯ ಮಾಡುವ ಪ್ರೇಮಿ ಹುಡುಗ ಎಂಬ ಚೌಕಟ್ಟಿನಿಂದ ಹೊರಬಂದು, ಸಂಕೀರ್ಣ ಪಾತ್ರಗಳನ್ನು ನಿಭಾಯಿಸುವ ಅದ್ಭುತ ನಟನಾಗಿ ಅವರು ಹೊರಹೊಮ್ಮಿದ್ದಾರೆ.

ತಮ್ಮ ವೃತ್ತಿಜೀವನದ ಈ ಬದಲಾವಣೆಯ ಬಗ್ಗೆ ಮಾತನಾಡುವ ಅವರು, ಆ ವಿರಾಮ ನನ್ನನ್ನು ನಾನು ಕಂಡುಕೊಳ್ಳಲು ಸಹಾಯ ಮಾಡಿತು ಎಂದು ಹೆಮ್ಮೆಯಿಂದ ಹೇಳಿಕೊಳ್ಳುತ್ತಾರೆ. ಸಿನಿಮಾ ಪ್ರೇಮಿಗಳ ಪಾಲಿಗೆ ಮಾಧವನ್ ಅವರ ಈ ಎರಡನೇ ಇನ್ನಿಂಗ್ಸ್ ಸುವರ್ಣ ಯುಗದಂತಿದೆ (ಏಜೆನ್ಸೀಸ್​).