ಮುಂಬೈ: ಅಕ್ಷಯ್ ಕುಮಾರ್ ಅಭಿನಯದ 'ಲಕ್ಷ್ಮೀ ಬಾಂಬ್' ಚಿತ್ರದ ಹೆಸರು ಬದಲಾಗಿರುವುದು ಇಷ್ಟರಲ್ಲಾಲೇ ಸಾಕಷ್ಟು ಸುದ್ದಿಯಾಗಿದೆ. ಹಿಂದೂ ದೇವರ ಹೆಸರಿಗೆ ಅವಮಾನ ಮಾಡುವಂತೆ ಶೀರ್ಷಿಕೆ ಇಡಲಾಗಿದ್ದು, ಹೆಸರನ್ನು ಬದಲಾಯಿಸದಿದ್ದರೆ ಉಗ್ರ ಹೋರಾಟ ಮಾಡುವುದಾಗಿ ಹಲವು ಸಂಘ-ಸಂಸ್ಥೆಗಳು ಒತ್ತಡ ಹೇರಿದ ಕಾರಣ, ಚಿತ್ರದ ಹೆಸರನ್ನು ಇದೀಗ 'ಲಕ್ಷ್ಮೀ' ಎಂದು ಬದಲಾಯಿಸಲಾಗಿದೆ.
ಇದನ್ನೂ ಓದಿ: ನಾಪತ್ತೆಯಾದ ದೀಪಿಕಾ ಪಡುಕೋಣೆ ಮ್ಯಾನೇಜರ್ ಕರಿಷ್ಮಾ …
ಹೆಸರು ಬದಲಾಯಿಸಿರುವುದರಿಂದ ಪ್ರಕರಣವೇನು ಸುಖಾಂತ್ಯ ಕಂಡಿದೆ. ಆದರೆ, ಈ ತರಹದ ಬೆಳವಣಿಗೆ ಇದು ಮೊದಲೇನಲ್ಲ. ಇತ್ತೀಚಿನ ವರ್ಷಗಳಲ್ಲಿ ಈ ತರಹ ಹೆಸರು ಬದಲಾಯಿಸಿದ ಹಲವು ಪ್ರಸಂಗಗಳು ಬಾಲಿವುಡ್ನಲ್ಲಾಗಿವೆ ಎನ್ನುವುದು ವಿಶೇಷ.
ಕಳೆದ ವರ್ಷ ಸಾಕಷ್ಟು ಸುದ್ದಿಯಾದ ಒಂದು ಚಿತ್ರವೆಂದರೆ ಅದು ಕಂಗನಾ ರಣಾವತ್ ಮತ್ತು ರಾಜಕುಮಾರ್ ರಾವ್ ಅಭಿನಯದ 'ಜಡ್ಜ್ಮೆಂಟಲ್ ಹೇ ಕ್ಯಾ'. ಚಿತ್ರಕ್ಕೆ ಮುಂಚೆ 'ಮೆಂಟಲ್ ಹೇ ಕ್ಯಾ' ಎಂಬ ಹೆಸರನ್ನು ಇಡಲಾಗಿತ್ತು. ಮೆಂಟಲ್ ಎಂಬ ಪದಬಳಕೆ ಸರಿಯಲ್ಲ ಮತ್ತು ಈ ಹೆಸರನ್ನು ಬದಲಾಯಿಸಬೇಕು ಎಂಬ ಒತ್ತಡ ಬಂದ ಹಿನ್ನೆಲೆಯಲ್ಲಿ ಚಿತ್ರದ ಹೆಸರನ್ನು 'ಜಡ್ಜ್ಮೆಂಟಲ್ ಹೇ ಕ್ಯಾ' ಎಂದಬ ಬದಲಾಯಿಸಲಾಯಿತು. ಅದಕ್ಕೂ ಮುನ್ನ, ದೀಪಿಕಾ ಪಡುಕೋಣೆ, ಶಾಹಿದ್ ಕಪೂರ್ ಮತ್ತು ರಣವೀರ್ ಸಿಂಗ್ ಅಭಿನಯದ ಚಿತ್ರಕ್ಕೆ 'ಪದ್ಮಾವತಿ' ಎಂಬ ಹೆಸರಿಡಲಾಗಿತ್ತು. ಆದರೆ, ಇತಿಹಾಸವನ್ನು ತಿರುಚಿರುವ ಆರೋಪ ಕೇಳಿಬಂದ ಹಿನ್ನೆಲೆಯಲ್ಲಿ ಚಿತ್ರಕ್ಕೆ 'ಪದ್ಮಾವತ್' ಎಂದು ನಾಮಕರಣ ಮಾಡಿ ಅದೇ ಹೆಸರಿನಲ್ಲಿ ಬಿಡುಗಡೆ ಮಾಡಲಾಯಿತು.
ಬರೀ ಇಷ್ಟೇ ಅಲ್ಲ, ಸಲ್ಮಾನ್ ಖಾನ್ ಅಭಿನಯದ 'ಟ್ಯೂಬ್ಲೈಟ್', ಶಾರೂಖ್ ಖಾನ್ ಮತ್ತು ಇರ್ಫಾನ್ ಖಾನ್ ಅಭಿನಯದ 'ಬಿಲ್ಲು', ಜಾನ್ ಅಬ್ರಹಾಂ ಅಭಿನಯದ 'ಮದ್ರಾಸ್ ಕೆಫೆ', ಆಯುಷ್ಮಾನ್ ಶರ್ಮ ಅಭಿನಯದ 'ಲವ್ಯಾತ್ರಿ' ಇವೆಲ್ಲಾ ಚಿತ್ರಗಳಿಗೂ ಮೊದಲು ಬೇರೆ ಹೆಸರುಗಳನ್ನು ಇಡಲಾಗಿತ್ತು. ಆದರೆ, ಜನರ ಭಾವನೆಗಳಿಗೆ ಧಕ್ಕೆ ತರುತ್ತವೆ ಎಂಬ ಆರೋಪಗಳು ಕೇಳಿ ಬಂದ ಹಿನ್ನೆಲೆಯಲ್ಲಿ, ಮೇಲೆ ಹೇಳಿದ ಎಲ್ಲಾ ಚಿತ್ರಗಳ ಹೆಸರುಗಳನ್ನು ಬದಲಾಯಿಸಲಾಯಿತು.