ಬೆಂಗಳೂರು: ಲಾಕ್ಡೌನ್ ಪರಿಕಲ್ಪನೆಯಲ್ಲಿ ಹಲವು ಸಿನಿಮಾ ಸೆಟ್ಟೇರಿರುವುದು ಗೊತ್ತಿರುವ ವಿಚಾರ. ಇದೀಗ ಅಂಥದ್ದೆ ಮತ್ತೊಂದು ಚಿತ್ರ ಫಸ್ಟ್ ಲುಕ್ ಮೂಲಕ ಸದ್ದು ಮಾಡುತ್ತಿದೆ. ಆ ಚಿತ್ರದ ಹೆಸರು ‘ಲವ್ ಇನ್ ದಿ ಟೈಮ್ ಆಫ್ ಕೋವಿಡ್’. ಈ ಚಿತ್ರದಲ್ಲಿ ನಟಿ ಶ್ರುತಿ ಪ್ರಕಾಶ್ ನಾಯಕಿಯಾಗಿ ನಟಿಸಿದ್ದು, ರಾಕೇಶ್ ಮಯ್ಯ ನಾಯಕರಾಗಿದ್ದಾರೆ. ಜಯಂತ್ ಸೀಗೆ ಈ ಚಿತ್ರವನ್ನು ನಿರ್ದೇಶಿಸಿದ್ದಾರೆ. ಕನ್ನಡದಲ್ಲಿ ಹಿಂದೆಂದೂ ಆಗದ ಪ್ರಯತ್ನ ಈ ಚಿತ್ರದಲ್ಲಾಗಿದೆ ಎಂದು ಹೆಮ್ಮೆಯಿಂದಲೇ ಹೇಳಿಕೊಳ್ಳುತ್ತಾರೆ ನಿರ್ದೇಶಕ ಜಯಂತ್.
‘ಮಲಯಾಳಂನಲ್ಲಿ ‘ಸೀ ಯೂ ಸೂನ್’ ಚಿತ್ರ ತೆರೆಗೆ ಬಂದಿತ್ತು. ಆ ಶೈಲಿಯಲ್ಲಿ ಈ ಸಿನಿಮಾ ಚಿತ್ರೀಕರಿಸಿದ್ದೇವೆ. ಗ್ರಾಫಿಕ್ಸ್ ಕೆಲಸವೂ ತುಂಬ ಇದೆ. ಎಲ್ಲ ಕಲಾವಿದರೂ ಅವರವರ ಮನೆಯಿಂದಲೇ ಶೂಟಿಂಗ್ನಲ್ಲಿ ಪಾಲ್ಗೊಂಡಿದ್ದಾರೆ. ಒಬ್ಬರನ್ನೊಬ್ಬರು ಮುಖಕ್ಕೆ ಮುಖ ಕೊಟ್ಟು ಯಾರೂ ಕಾಣಿಸಿಕೊಂಡಿಲ್ಲ’ ಎನ್ನುವ ನಿರ್ದೇಶಕರು. ಇದೊಂದು ಪಕ್ಕಾ ರೊಮ್ಯಾಂಟಿಕ್ ಲವ್ ಸ್ಟೋರಿ’ ಎಂದೂ ಹೇಳುತ್ತಾರೆ. ಕಳೆದ ಡಿಸೆಂಬರ್ನಲ್ಲಿ ಈ ಚಿತ್ರದ ಚಿತ್ರೀಕರಣ ಪ್ರಾರಂಭವಾಗಿದ್ದು, ಈಗಾಗಲೇ ಶೇ. 90 ಭಾಗದ ಶೂಟಿಂಗ್ ಮುಗಿದಿದೆ. ಸದ್ಯ, ಚಿತ್ರೀಕರಣೋತ್ತರ ಕೆಲಸಗಳು ನಡೆಯುತ್ತಿವೆ. ಇನ್ನು, ಈ ಚಿತ್ರದ ಬಗ್ಗೆ ತುಂಬ ಎಗ್ಸೈಟ್ ಆಗಿರುವ ಶ್ರುತಿ, ‘ಈ ಚಿತ್ರದ ಕಥೆ ಕೇಳುತ್ತಿದ್ದಂತೆ ಅಚ್ಚರಿ ಅನಿಸಿತು. ಇಲ್ಲಿಯವರೆಗೂ ಸಹ ಕಲಾವಿದರ ಜತೆಗೆ ನಟಿಸಿದ್ದೆ. ಇದೀಗ ಮೊದಲ ಬಾರಿ ನಾನೊಬ್ಬಳೇ ಕ್ಯಾಮರಾ ಜತೆ ನಟಿಸಿದ್ದೇನೆ. 10 ವರ್ಷದ ಬಳಿಕ ಕಾಲೇಜು ಸ್ನೇಹಿತ ಆನ್ಲೈನ್ನಲ್ಲಿ ಸಿಗ್ತಾನೆ. ಮುಂದೆ ಇಬ್ಬರ ಒಡನಾಟ ಎಲ್ಲಿಗೆ ಹೋಗುತ್ತದೆ ಎಂಬುದೇ ಚಿತ್ರದ ಕಥೆ. ಇಲ್ಲಿ ಶೀಲಾ ಹೆಸರಿನ ಪಾತ್ರ ಮಾಡುತ್ತಿದ್ದೇನೆ’ ಎನ್ನುತ್ತಾರೆ. ಇನ್ನುಳಿದಂತೆ ಅಪೂರ್ವ ಭಾರದ್ವಾಜ್, ಗೌತಮ್ ಶಂಕರ್ವುೂರ್ತಿ, ಶ್ರವಣ್ ಐತಾಳ್, ಪವನ್ ವೇಣುಗೋಪಾಲ್ ಪಾತ್ರವರ್ಗದಲ್ಲಿದ್ದಾರೆ. ಭರತ್ ಬಿಜೆ ಸಂಗೀತ, ಪ್ರದೀಪ್ ರೆಡ್ಡಿ ಛಾಯಾಗ್ರಹಣ ಚಿತ್ರಕ್ಕಿದೆ.