ತಮಿಳುನಾಡಿನ ಮಾಜಿ ಮುಖ್ಯಮಂತ್ರಿ ಜಯಲಲಿತಾ ಅವರ ಜೀವನದ ಕಥೆ ಆಧಾರಿತವಾಗಿ ಮೂಡಿಬರುತ್ತಿರುವ ‘ತಲೈವಿ’ ಚಿತ್ರಕ್ಕೆ ಈಗ ಬಂಗಾಲಿ ನಟ ಜಿಶುಸೇನ್ ಗುಪ್ತಾ ಸೇರಿಕೊಂಡಿದ್ದಾರೆ. ತಮಿಳಿನ ಖ್ಯಾತ ನಿರ್ದೇಶಕ ಎ.ಎಲ್.ವಿಜಯ್ ಆಕ್ಷನ್-ಕಟ್ ಹೇಳುತ್ತಿರುವ ಈ ಚಿತ್ರದಲ್ಲಿ ಜಯಲಲಿತಾ ಪಾತ್ರದಲ್ಲಿ ಬಾಲಿವುಡ್ ನಟಿ ಕಂಗನಾ ರಣಾವತ್ ನಟಿಸುತ್ತಿದ್ದಾರೆ. ಈಗಾಗಲೇ ಚಿತ್ರದ ಟೀಸರ್ ರಿಲೀಸ್ ಆಗಿ ಕೊಂಚ ವಿವಾದವಾಗಿದ್ದು, ಅದು ವೈರಲ್ ಕೂಡ ಆಗಿತ್ತು. ಅದೇ ಚಿತ್ರದ ಎಂಜಿಆರ್ ಪಾತ್ರದಲ್ಲಿ ತಮಿಳಿನ ಅರವಿಂದ ಸಾಮಿ ನಟಿಸುತ್ತಿದ್ದಾರೆ ಎಂಬುದು ಗೊತ್ತಾಗಿತ್ತು. ಈಗ ಆ ಚಿತ್ರದಲ್ಲಿ ಶೋಭನ್ ಬಾಬು ಪಾತ್ರಕ್ಕೆ ಬಂಗಾಲಿಯ ಖ್ಯಾತ ನಟ ಜಿಶು ಸೇನ್ಗುಪ್ತಾ ಬರಲಿದ್ದಾರಂತೆ.
ಜಯಲಲಿತಾ ಅವರ ಬದುಕಲ್ಲಿ ನಟ ಶೋಭನ್ ಬಾಬು ಅವರು ಬಹು ಮುಖ್ಯ ಪಾತ್ರ ವಹಿಸಿದ್ದರು. ಮೂಲಗಳ ಪ್ರಕಾರ ಅವರಿಬ್ಬರೂ ರಿಲೇಷನ್ಶಿಪ್ನಲ್ಲಿಯೂ ಇದ್ದರು. ಹಾಗಾಗಿ ಅವರ ಬಯೋಪಿಕ್ನಲ್ಲಿ ಶೋಭನ್ ಬಾಬು ಪಾತ್ರ ಬಹಳ ಪ್ರಾಮುಖ್ಯತೆ ವಹಿಸುವುದರಿಂದ, ಅದಕ್ಕಾಗಿ ಉತ್ತಮ ಕಲಾವಿದರನ್ನು ವಿಜಯ್ ಆಯ್ಕೆ ಮಾಡಿದ್ದಾರಂತೆ. ಸದ್ಯದಲ್ಲೆ ಜಿಶುಸೇನ್ ಗುಪ್ತಾ ಚಿತ್ರತಂಡವನ್ನು ಸೇರಿಕೊಳ್ಳಲಿದ್ದಾರೆ. ಜಿಶು ಈಗಾಗಲೇ ಶೋಭನ್ ಬಾಬು ಲುಕ್ಗಳತ್ತ ತಮ್ಮ ಚಿತ್ತ ಹರಿಸಿದ್ದಾರಂತೆ. ಜಿಶು ಇತ್ತೀಚೆಗೆ ನಾಗಶೌರ್ಯ ನಟನೆಯ ತೆಲುಗು ಸಿನಿಮಾ ‘ಅಶ್ವತ್ಥಾಮ’ದಲ್ಲಿ ನೆಗೆಟಿವ್ ರೋಲ್ನಲ್ಲಿ ಕಾಣಿಸಿಕೊಂಡಿದ್ದರು. -ಏಜೆನ್ಸೀಸ್