ಬೆಂಗಳೂರು: ‘ಸತ್ಯಜ್ಯೋತಿ ಫಿಲಮ್ಸ್’ ಬ್ಯಾನರ್ನಲ್ಲಿ ರವಿ ಅರಸು ನಿರ್ದೇಶನದ ಅದ್ದೂರಿ ಸಿನಿಮಾದಲ್ಲಿ ಸೆಂಚುರಿ ಸ್ಟಾರ್ ಶಿವರಾಜ್ಕುಮಾರ್ ನಾಯಕನಾಗಿ ನಟಿಸಲಿದ್ದಾರೆ ಎಂಬುದು ಈ ಹಿಂದೆಯೇ ಸುದ್ದಿಯಾಗಿತ್ತು. ಆದರೆ, ಸಿನಿಮಾ ಶೀರ್ಷಿಕೆ ಏನು ಎಂಬ ಬಗ್ಗೆ ಸಣ್ಣ ಸುಳಿವೂ ಸಿಕ್ಕಿರಲಿಲ್ಲ. ಈಗ ಆ ಕುತೂಹಲಕ್ಕೆ ತೆರೆಬಿದ್ದಿದೆ. ಚಿತ್ರಕ್ಕೆ ‘ಆರ್ಡಿಎಕ್ಸ್’ ಟೈಟಲ್ ಫಿಕ್ಸ್ ಆಗಿದೆ.
ಫೆಬ್ರವರಿ 19ಕ್ಕೆ ಶಿವರಾಜ್ಕುಮಾರ್ ಚಿತ್ರರಂಗಕ್ಕೆ ಬಂದು ಬರೋಬ್ಬರಿ 34 ವರ್ಷಗಳು ತುಂಬಲಿವೆ. ಆ ವಿಶೇಷ ದಿನದಂದೇ ‘ಆರ್ಡಿಎಕ್ಸ್’ ಚಿತ್ರಕ್ಕೆ ಮುಹೂರ್ತ ನೆರವೇರಲಿದೆ. ಮತ್ತೆ ಕಾಪ್ ಅವತಾರದಲ್ಲಿ ಶಿವಣ್ಣ ಎದುರಾಗಲಿದ್ದು, ಹೊಸ ಅವತಾರದಲ್ಲಿ ಕಾಣಿಸಿಕೊಳ್ಳಲಿದ್ದಾರಂತೆ.
‘ಟಗರು’ ಚಿತ್ರಕ್ಕೆ ಸಂಗೀತ ನೀಡಿದ್ದ ಚರಣ್ ರಾಜ್ ಇಲ್ಲಿಯೂ ಮುಂದುವರಿದಿದ್ದು, ಚಂದ್ರಮೌಳಿ ಸಂಭಾಷಣೆ ಬರೆಯಲಿದ್ದಾರೆ. ಈ ಹಿಂದೆ ರವಿ ಅರಸು ನಿರ್ದೇಶನದ ‘ಎಟ್ಟಿ’ ಮತ್ತು ‘ಐಂಗರನ್’ ಚಿತ್ರಗಳಿಗೆ ಛಾಯಾಗ್ರಹಣ ಮಾಡಿದ್ದ ಎಂ. ಸರವಣನ್, ‘ಆರ್ಡಿಎಕ್ಸ್’ ಮೂಲಕ ಮೊದಲ ಬಾರಿ ಕನ್ನಡಕ್ಕೆ ಆಗಮಿಸುತ್ತಿದ್ದಾರೆ.
ಜತೆಗೆ ತಾರಾಗಣದ ಆಯ್ಕೆ ಪ್ರಕ್ರಿಯೆಯೂ ನಡೆಯುತ್ತಿದೆ. ಸದ್ಯ ಹರ್ಷ ನಿರ್ದೇಶನದ ‘ಭಜರಂಗಿ 2’ ಸಿನಿಮಾದಲ್ಲಿ ಶಿವರಾಜ್ಕುಮಾರ್ ಬಿಜಿಯಾಗಿದ್ದಾರೆ. ಆ ಚಿತ್ರದ ಕೆಲಸಗಳ ಜತೆಯಲ್ಲಿ ‘ಆರ್ಡಿಎಕ್ಸ್’ಗೂ ಸಜ್ಜಾಗಲಿದ್ದಾರೆ. ಚಿತ್ರದ ಎರಡನೇ ಭಾಗದ ಶೂಟಿಂಗ್ ಭೋಪಾಲ್ ಮತ್ತು ಮೇಘಾಲಯದಲ್ಲಿ ಚಿತ್ರೀಕರಿಸಲು ತಂಡ ಪ್ಲಾ್ಯನ್ ಹಾಕಿದೆ.