Chargesheet 03-08 Review _
ನಿರ್ದೇಶನ: ವೆಂಕಟ್ ಭಾರದ್ವಾಜ್
ತಾರಾಗಣ: ಸುಂದರ್ ರಾಜ್, ಹರ್ಷ ಅರ್ಜುನ್, ಅಮರ್, ಸತ್ಯಶ್ರೀ, ವೆಂಕಟ್ ಮತ್ತಿತರರು.
ಪತ್ನಿಯನ್ನು ಕಳೆದುಕೊಂಡಿರುವ ನಿವೃತ್ತ ಎಂಜಿನಿಯರ್ ರಾಮಣ್ಣನಿಗೆ (ಸುಂದರ್ ರಾಜ್) ಮಗಳು ಸೌಮ್ಯಳೇ (ಸತ್ಯಶ್ರೀ) ಪ್ರಪಂಚ. ಮಲೇಷಿಯಾ ಏರ್ಲೈನ್ಸ್ನಲ್ಲಿ ಗಗನಸಖಿ ಕೆಲಸಕ್ಕೆಂದು ಹೋಗುವ ಆಕೆ ಕಣ್ಮರೆಯಾಗುತ್ತಾಳೆ. ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಲು ಹೋದರೆ, ಮಲೇಷಿಯಾದಲ್ಲೇ ಹೋಗಿ ಹುಡುಕಿ ಎಂಬ ಉತ್ತರ. ಕಾರ್ಪೊರೇಟರ್ನಿಂದ ಹಿಡಿದು ಶಾಸಕ, ಸಂಸದರ ಬಳಿ ಹೋಗಿ ಅಳಲು ತೋಡಿಕೊಂಡರೂ ಯಾರೂ ಸ್ಪಂದಿಸುವುದಿಲ್ಲ. ಕೊನೆಗೆ ಪರಿಚಯದವರು ಕಲಾಸಿಪಾಳ್ಯ ಪೊಲೀಸ್ ಠಾಣೆಯ ಇನ್ಸ್ಪೆಕ್ಟರ್ ಎಸ್.ಕೆ. ಉಮೇಶ್ (ಹರ್ಷ ಅರ್ಜುನ್) ಬಳಿ ವಿಷಯ ತಿಳಿಸಲು ಹೇಳುತ್ತಾರೆ. ರಾಮಣ್ಣನ ನೋವಿಗೆ ಸ್ಪಂದಿಸುವ ದಕ್ಷ ಅಧಿಕಾರಿ ಉಮೇಶ್ ಅನ್-ಅಫಿಷಿಯಲ್ಲಾಗಿ ಐದು ವರ್ಷಗಳ ಹಿಂದಿನ ಪ್ರಕರಣದ ಬೆನ್ನು ಹತ್ತುತ್ತಾರೆ. ಅವರ ತಂಡವೂ ಅಧಿಕಾರಿಯ ಬೆನ್ನಿಗೆ ನಿಲ್ಲುತ್ತದೆ. ಅಲ್ಲಿಂದ ಸೌಮ್ಯ ಮತ್ತು ಪ್ರಭಾಕರ್ ರಾಜು (ಅಮರ್) ನಡುವಿನ ಲವ್ಸ್ಟೋರಿ ತೆರೆದುಕೊಳ್ಳುತ್ತದೆ. ಆತನ ಮೇಲಿದ್ದ ಅನುಮಾನ, ಕೊನೆಗೆ ರಾಮಣ್ಣನತ್ತಲೇ ತಿರುಗುತ್ತದೆ. ಕರ್ನಾಟಕದಿಂದ ಆರಂಭವಾಗುವ ಕಥೆ ತಮಿಳುನಾಡು, ಆಂಧ್ರ ಪ್ರದೇಶಕ್ಕೂ ಸಂಚರಿಸುತ್ತದೆ. ಹಾಗಾದರೆ ಸೌಮ್ಯ ಕಣ್ಮರೆ ಹಿಂದಿನ ಕಥೆಯೇನು? ಆಕೆ ಎಲ್ಲಿಗೆ ಹೋದಳು? ಏನಾದಳು? ಮತ್ತೆ ವಾಪಸ್ ಬರುತ್ತಾಳಾ? "ಚಾರ್ಜ್ಶೀಟ್ 03-08' ನೋಡಿ.
2003ರಿಂದ 2008ರವರೆಗೆ ನಡೆದ ನೈಜ ಘಟನೆಯಾಧಾರಿತ ಕೆಮ್ ಥ್ರಿಲ್ಲರ್ ಕಥೆಯನ್ನು ನಿರ್ದೇಶಕ ವೆಂಕಟ್ ಭಾರದ್ವಾಜ್ ನೈಜವಾಗಿಯೇ ಪ್ರೇಕ್ಷಕರ ಮುಂದಿಡಲು ಯತ್ನಿಸಿದ್ದಾರೆ. ಚಿತ್ರದುದ್ದಕ್ಕೂ ಸೌಮ್ಯ ಏನಾದಳು? ಎಂಬ ಪ್ರಶ್ನೆ ಪ್ರೇಕ್ಷಕರನ್ನು ಕಾಡುತ್ತದೆ. ಕೆಲವೆಡೆ ಲಿಂಕ್ ಇಲ್ಲದೇ ಚಿತ್ರಕಥೆ ಕೈಕೊಟ್ಟರೂ, ನಿವೃತ್ತ ಪೊಲೀಸ್ ಅಧಿಕಾರಿ ಎಸ್.ಕೆ. ಉಮೇಶ್ ಅವರೇ ಬಂದು ಕಥೆಯನ್ನು ಮುಂದುವರಿಸುವ ಕಾರಣ "ಚಾರ್ಜ್ಶೀಟ್' ಕುತೂಹಲದಿಂದ ನೋಡಿಸಿಕೊಂಡು ಹೋಗುತ್ತದೆ. ಸುಂದರ್ ರಾಜ್ ಅಕ್ಷರಶಃ ರಾಮಣ್ಣ ಪಾತ್ರವನ್ನು ಜೀವಿಸಿದ್ದಾರೆ. ಅವರ ನಟನೆಯೇ ಚಿತ್ರದ ಹೈಲೈಟ್. ಎಸ್.ಕೆ. ಉಮೇಶ್ ಪಾತ್ರದಲ್ಲಿ ಹರ್ಷ ಅರ್ಜುನ್, ಪ್ರೀತಿಸಿದ ಹುಡುಗಿಯನ್ನು ಕಳೆದುಕೊಳ್ಳುವ ಪ್ರೇಮಿಯಾಗಿ ಅಮರ್ ಗಮನ ಸೆಳೆಯುತ್ತಾರೆ. ಸಮೀರ್ ಕುಲಕರ್ಣಿ ಸಂಗೀತದಲ್ಲಿ "ಋತುಮಾನವು ಬದಲಾಗಿದೆ' ಹಾಡು ನೆನಪಿನಲ್ಲಿ ಉಳಿಯುತ್ತದೆ. ನೈಜ ಘಟನೆಯಾಧಾರಿತ ಹಾಗೂ ಕ್ರೈಮ್ ಥ್ರಿಲ್ಲರ್ ಅಭಿಮಾನಿಗಳಿಗೆ "ಚಾರ್ಜ್ಶೀಟ್' ಇಷ್ಟವಾಗಬಹುದು.