"ಬಘೀರ' ಚಿತ್ರದ ಬಳಿಕ ನಟ ಶ್ರೀಮುರಳಿ ಸದ್ಯ ಎರಡು ಚಿತ್ರಗಳಲ್ಲಿ ಬಿಜಿಯಾಗಿದ್ದಾರೆ. ಪುನೀತ್ ರುದ್ರನಾಗ್ ಆ್ಯಕ್ಷನ್&ಕಟ್ ಹೇಳುತ್ತಿರುವ "ಉಗ್ರಾಯುಧಮ್' ಮತ್ತು ಹಾಲೇಶ್ ಕೊಗುಂಡಿ ನಿರ್ದೇಶಿಸುತ್ತಿರುವ "ಪರಾಕ್'. "ಉಗ್ರಾಯುಧಮ್'ನಲ್ಲಿ ಐತಿಹಾಸಿಕ ಪಾತ್ರಗಳ ಸುತ್ತ ನಡೆಯುವ ಕಾಲ್ಪನಿಕ ಕಥೆಯಾಗಿದ್ದು, "ಕಾಂತಾರ' ಖ್ಯಾತಿಯ ಸಪ್ತಮಿ ಗೌಡ ನಾಯಕಿಯಾಗಿದ್ದಾರೆ. ಬಹುಕೋಟಿ ವೆಚ್ಚದಲ್ಲಿ ಮೂಡಿಬರುತ್ತಿರುವ ಈ ಚಿತ್ರಕ್ಕೆ "ನಿದ್ರಾದೇವಿ ನೆಕ್ಸ್ಟ್ ಡೋರ್' ನಿರ್ಮಿಸಿದ್ದ ಜಯರಾಮ್ ದೇವಸಮುದ್ರ ಸುರಮ್ ಮೂವೀಸ್ ಬ್ಯಾನರ್ನಲ್ಲಿ ಹಣ ಹೂಡಿದ್ದಾರೆ. ಈಗಾಗಲೇ ಚಿತ್ರದ ಶೇಕಡಾ 40ರಷ್ಟು ಮಾತಿನ ಭಾಗದ ಶೂಟಿಂಗ್ ಪೂರ್ಣಗೊಂಡಿದ್ದು, ಇತ್ತೀಚೆಗಷ್ಟೆ ಬೆಂಗಳೂರಿನ ರಾಕ್ಲೈನ್ ಸ್ಟುಡಿಯೋನಲ್ಲಿ ರಾಜರ ಆಸ್ಥಾನದ ಬೃಹತ್ ಸೆಟ್ಗಳನ್ನು ನಿರ್ಮಿಸಿ, 400ಕ್ಕೂ ಅಧಿಕ ಸಹ-ಕಲಾವಿದರೊಂದಿಗೆ 12 ದಿನಗಳ ಕಾಲ ಚಿತ್ರೀಕರಣ ನಡೆಸಲಾಗಿದೆ. ನಿರ್ದೇಶಕ ಪುನೀತ್ ರುದ್ರನಾಗ್, "ಕೊನೆಯ ದಿನ ಮೂರು ಕಾಲ್ಶೀಟ್ನಲ್ಲಿ ಸತತ 24 ತಾಸುಗಳ ಚಿತ್ರೀಕರಣ ಮಾಡಿದೆವು. ಶ್ರೀಮುರಳಿ ಸರ್ ಸೇರಿ ಇಡೀ ತಂಡ ತುಂಬ ಜೋಶ್ನಲ್ಲಿ ಕೆಲಸ ಮಾಡುತ್ತಿದ್ದೇವೆ. ಮಳೆಗಾಲವಿರುವ ಕಾರಣ ಸದ್ಯ ಒಳಾಂಗಣದಲ್ಲಿ ಸೆಟ್ಗಳಲ್ಲಿ ನಡೆಯುವ ಭಾಗದ ಚಿತ್ರೀಕರಣ ಮಾಡಿದ್ದೇವೆ. ಸೆಪ್ಟೆಂಬರ್ನಲ್ಲಿ ಕನಕಪುರದ ಸಂಗಮ ಸುತ್ತಮುತ್ತ 15 ದಿನಗಳ ಶೂಟಿಂಗ್ ಪ್ಲ್ಯಾನ್ ಮಾಡಿಕೊಂಡಿದ್ದೇವೆ. ಅಲ್ಲಿ ಸದ್ಯ ಸೆಟ್ ಕೆಲಸಗಳು ನಡೆಯುತ್ತಿವೆ. ಬಳಿಕ ಮಳೆ ನಿಂತ ಬಳಿಕ ಅಕ್ಟೋಬರ್ನಿಂದ ಡಿಸೆಂಬರ್ವರೆಗೆ 60 ದಿನಗಳ ಕಾಲ ತೀರ್ಥಹಳ್ಳಿಯ ಕಾಫಿ ತೋಟದಲ್ಲಿ ಚಿತ್ರೀಕರಣ ನಡೆಸಲಿದ್ದೇವೆ. ಸಿನಿಮಾ ಅಂದುಕೊಂಡಂತೆಯೇ ತುಂಬ ಚೆನ್ನಾಗಿ ಮೂಡಿಬರುತ್ತಿದೆ' ಎಂದು ಸಂತಸ ಹಂಚಿಕೊಳ್ಳುತ್ತಾರೆ. ಈ ಹಿಂದೆ "ಕೆಜಿಎಫ್ ಚಾಪ್ಟರ್ 1', "ಎಕ್ಕ' ಚಿತ್ರಗಳಲ್ಲಿ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ಪುನೀತ್, "ಉಗ್ರಾಯುಧಮ್' ಮೂಲಕ ಡೈರೆಕ್ಟರ್ ಕ್ಯಾಪ್ ಧರಿಸಿದ್ದಾರೆ. ಈ ಸಿನಿಮಾ ಬಿಡುಗಡೆಯ ಬಳಿಕ ಅವರು "ಸೈನಿಕ 2' ಚಿತ್ರದಲ್ಲಿ ತೊಡಗಲಿದ್ದಾರೆ.
ಕೋಟ್:
ಪುನೀತ್ ರುದ್ರನಾಗ್, ನಿರ್ದೇಶಕ