'ಫ್ಲಾಪ್ ಸಾಂಗಿದು, ಅನಗತ್ಯವಾದ ಅಭಿಮಾನದ ದುಡುಕು ದಯವಿಟ್ಟು ನಿಲ್ಲಿಸಿ'; ನೆನಪಿರಲಿ ಪ್ರೇಮ್​​​ ಅಭಿಯಾನಕ್ಕೆ ನಾದಬ್ರಹ್ಮ ಹಂಸಲೇಖ ಬ್ರೇಕ್..Hamsalekha

Hamsalekha on Nenapirali Prem: ಕನ್ನಡ ಸಿನಿಮಾ ರಂಗ ಅದ್ಭುತ ಸಂಗೀತ ಸಂಯೋಜಕ ಮತ್ತು ಗೀತ ರಚನೆಕಾರ ಹಂಸಲೇಖ ಅವರು ಕನ್ನಡ ಸಿನಿಮಾ ರಂಗಕ್ಕೆ ಮುನ್ನೂರಕ್ಕೂ ಹೆಚ್ಚು ಸಂಗೀತ ಸಂಯೋಜಿಸಿದ್ದಾರೆ. ಸಾಹಿತ್ಯ ಬರೆದಿದ್ದಾರೆ. ಬಾ ನಲ್ಲೆ ಮಧು ಚಂದ್ರಕ್ಕೆ, ಪ್ರೇಮಲೋಕದಿಂದ, ಪ್ರೀತ್ಸೆ ಪ್ರೇತ್ಸೆ, ಲಾಲಿ ಲಾಲಿ, ಚಂದಕ್ಕಿಂತ ಚಂದ, ಹೇ ನವಿಲೇ ಹೆಣ್​ ನವಿಲೇ ಹಾಡುಗಳು ಇಂದಿಗೂ ಗುನುಗುವಂತೆ ಮಾಡುತ್ತವೆ. ಸ್ಯಾಂಡಲ್​ವುಡ್​ಗೆ ಇಷ್ಟೆಲ್ಲ ಕೊಡುಗೆ ಕೊಟ್ಟಿರುವ ನಾದಬ್ರಹ್ಮನಿಗೆ ದೇಶದ ಪ್ರತಿಷ್ಠಿತ ಪದ್ಮ ಪ್ರಶಸ್ತಿ ಅಥವಾ ಜ್ಞಾನಪೀಠ ಪ್ರಶಸ್ತಿ ನೀಡಬೇಕು ಎಂದು ಒತ್ತಾಯಿಸಿ ನಟ ನೆನಪಿರಲಿ ಪ್ರೇಮ್​ ಅಭಿಯಾನ ಆರಂಭಿಸಿದ್ದರು. ಸದ್ಯ ಈ ಬಗ್ಗೆ ಇನ್​ಸ್ಟಾಗ್ರಾಮ್​​ನಲ್ಲಿ ಹಂಸಲೇಖ ಅವರೇ ಪೋಸ್ಟ್​ವೊಂದನ್ನು ಹಂಚಿಕೊಂಡಿದ್ದಾರೆ.

ಹಂಸಲೇಖ ಅವರಿಗೆ ಪದ್ಮ ಪುರಸ್ಕಾರ ಅಥವಾ ಜ್ಞಾನಪೀಠ ಪ್ರಶಸ್ತಿ ಸಲ್ಲಬೇಕು ಎನ್ನುವ ಅಭಿಯಾನಕ್ಕೆ ಹಂಸಲೇಖ ಅವರೇ ಬ್ರೇಕ್​ ಹಾಕಿದ್ದು, ಇದಕ್ಕೆ ನನಗೆ ಒಪ್ಪಿಗೆ ಇಲ್ಲ. ಇದೊಂದು ಅನಗತ್ಯದ ಅಭಿಮಾನದ ಮಾತು. ಕನ್ನಡ ನಮ್ಮ ಹಕ್ಕಿನ ಭಾಷೆ ಇದನ್ನು ಸಾಬೀತು ಪಡಿಸುವ ಮಟ್ಟದಲ್ಲಿದ್ದೇವೆ ಎಂದು ಹೇಳಿದ್ದಾರೆ.

ಪ್ರೇಮ್​ ಹೀಗೆಂದು ಬರೆದುಕೊಂಡಿದ್ದರು

ಕನ್ನಡದಾಣೆ...ಇದಕ್ಕೆ ನನ್ನ ಒಪ್ಪಿಗೆಯಿಲ್ಲ. ಇದೊಂದು ಅನಗತ್ಯವಾದ ಅಭಿಮಾನದ ದುಡುಕು ; ಮತ್ತು ಪ್ರೀತಿಯ ತೊಂದರೆ... ಸೀನ್‌ ಗೂ ; ಟ್ಯೂನ್‌ಗೂ : ಲಿರಿಕ್ಸ್‌ ಗೂ... ಹೊಂದಾಣಿಕೆಯೇ ಇಲ್ಲದ ಫ್ಲಾಪ್ ಸಾಂಗಿದು. ದಯವಿಟ್ಟು ನಿಲ್ಲಿಸಿ ನೆನಪಿರಲಿ, ಪ್ರೀತಿಯ ಪ್ರೇಮ್. ಕನ್ನಡ ನಮ್ಮ ಹಕ್ಕಿನ ಭಾಷೆ. ಈ ಸತ್ಯವನ್ನು ಪ್ರತಿದಿನವೂ ಸಾಬೀತು ಪಡಿಸಬೇಕಾದ ಸಮಯದಲ್ಲಿದ್ದೇವೆ. ಅದಕ್ಕೆ ಬೇಕಾಗಿರುವುದು ಅಭಿಮಾನದ ಅಭಿಯಾನಗಳು ಎಂದು ಸಲಹೆ ನೀಡಿದ್ದಾರೆ.