- ಸಿನಿಮಾ ಪೂರ್ಣಗೊಳ್ಳುವವರೆಗೂ ಘೋಷಣೆ ಮಾಡಬಾರದು ಅಂತ ಮೊದಲೇ ಅಂದುಕೊಂಡಿದ್ದರಂತೆ ವಿಜಯಾನಂದ್
- ಗಿಲ್ಲಿನಟ ಮತ್ತು ಗೌರವ್ ಶೆಟ್ಟಿ "ಸೂಪರ್ಹಿಟ್' ಮೂಲಕ ನಾಯಕರಾಗಿ ಪದಾರ್ಪಣೆ ಮಾಡುತ್ತಿದ್ದಾರೆ.
- ಇದೊಂದು ಜರ್ನಿ ಹಿನ್ನೆಲೆಯಲ್ಲಿ ನಡೆಯುವ ಕಥೆ.
- ಸಾಧು ಕೋಕಿಲ, ಪ್ರಮೋದ್ ಶೆಟ್ಟಿ, ಡ್ರ್ಯಾಗನ್ ಮಂಜು, ಟೆನ್ನಿಸ್ ಕೃಷ್ಣ, ಗಿರಿ, ಕರಿಸುಬ್ಬು ತಾರಾಗಣದಲ್ಲಿದ್ದಾರೆ.
Superhit - ಸಾಮಾನ್ಯವಾಗಿ ಬಿಡುಗಡೆಯಾದ ಸಿನಿಮಾಗಳು ಹೌಸ್ಫುಲ್ ಪ್ರದರ್ಶನ ಕಾಣುತ್ತಿದ್ದರೆ "ಸೂಪರ್ಹಿಟ್, ರನ್ನಿಂಗ್ ಸಕ್ಸಸ್ಫುಲಿ' ಎಂದು ಹೇಳುವುದುಂಟು. ಆದರೆ, ಕಾಶೀನಾಥ್ ನಟಿಸಿದ್ದ ಡ್ರಾಮಾ "ಓಳ್ ಮುನ್ಸಾಮಿ' ಮತ್ತು ಅಜೇಯ್ ರಾವ್ ನಾಯಕನಾಗಿದ್ದ ಹಾರರ್ ಥ್ರಿಲ್ಲರ್ "ಕೃಷ್ಣ ಟಾಕೀಸ್' ಚಿತ್ರಗಳನ್ನು ನಿರ್ದೇಶಿಸಿದ್ದ ವಿಜಯಾನಂದ್ "ಸೂಪರ್ಹಿಟ್' ಎಂಬ ಶೀರ್ಷಿಕೆಯಲ್ಲೇ ಸಿನಿಮಾ ಮಾಡಿ ಮುಗಿಸಿದ್ದಾರೆ. ವಿಶೇಷ ಅಂದರೆ ಅದಕ್ಕೆ "ರನ್ನಿಂಗ್ ಸಕ್ಸಸ್ಫುಲಿ' ಎಂಬ ಅಡಿಬರಹ ಇಟ್ಟಿದ್ದಾರೆ! ಇತ್ತೀಚೆಗಷ್ಟೆ ಚಿತ್ರದ ಟೀಸರ್ ಬಿಡುಗಡೆ ಮಾಡಲಾಗಿದೆ.
"ಸೂಪರ್ಹಿಟ್' ಬಗ್ಗೆ ವಿಜಯಾನಂದ್, "ಕನ್ನಡದಲ್ಲಿ ಕಾಮಿಡಿ ಥ್ರಿಲ್ಲರ್ ಚಿತ್ರಗಳು ಬಂದಿರುವುದು ಕಡಿಮೆ. ಹೀಗಾಗಿ ಈ ಜಾನರ್ನಲ್ಲೇ ಸಿನಿಮಾ ಮಾಡಬೇಕು ಅಂತ ಯೋಚಿಸಿ, ಕಥೆ ಪ್ರಾರಂಭಿಸಿದೆ. ಭಗವದ್ಗೀತೆಯಲ್ಲಿ ಭಗವಂತನ ಅಪ್ಪಣೆ ಇಲ್ಲದೇ ಒಂದು ಹುಲ್ಲುಕಡ್ಡಿಯೂ ಅಲುಗಾಡುವುದಿಲ್ಲ ಎಂಬ ಮಾತಿದೆ. ಅದೇ ಸಾಲಿನಲ್ಲಿ ಸಾಗುವ ಕಥೆಯಿದು. ಸ್ಟೋರಿ ನನಗೆ ವ್ಹಾಹ್ ಅನ್ನಿಸಿದ ಬಳಿಕವಷ್ಟೇ ಸಿನಿಮಾ ಮಾಡಲು ನಿರ್ಧರಿಸಿದೆ. ಸಿನಿಮಾ ಪೂರ್ಣಗೊಳ್ಳುವವರೆಗೂ ಘೋಷಣೆ ಮಾಡಬಾರದು ಅಂತ ಮೊದಲೇ ಅಂದುಕೊಂಡಿದ್ದೆ. ಅದರಂತೆ ಶೂಟಿಂಗ್ ಮುಗಿಸಿ, ಇದೀಗ ಟೀಸರ್ ಬಿಡುಗಡೆಯ ಮೂಲಕ ಅನೌನ್ಸ್ ಮಾಡುತ್ತಿದ್ದೇವೆ. ಟೀಸರ್ಗಿಂತ ಸಾವಿರ ಪಟ್ಟು ಮನರಂಜನೆ ಚಿತ್ರದಲ್ಲಿದೆ' ಎಂದು ಆತ್ಮವಿಶ್ವಾಸ ವ್ಯಕ್ತಪಡಿಸಿದರು.
ಸದ್ಯ ಬಿಗ್ಬಾಸ್ ಮನೆಯಲ್ಲಿ ಅಬ್ಬರಿಸುತ್ತಿರುವ ಗಿಲ್ಲಿನಟ ಮತ್ತು ಯೂಟ್ಯೂಬ್ನಲ್ಲಿ ತಮ್ಮದೇ ಛಾಪು ಮೂಡಿಸಿರುವ ಗೌರವ್ ಶೆಟ್ಟಿ "ಸೂಪರ್ಹಿಟ್' ಚಿತ್ರದ ಮೂಲಕ ನಾಯಕರಾಗಿ ಪದಾರ್ಪಣೆ ಮಾಡುತ್ತಿದ್ದಾರೆ. ಅವರಿಗೆ ಶ್ವೇತಾ ನಾಯಕಿಯಾಗಿದ್ದು ಸಾಧು ಕೋಕಿಲ, ಪ್ರಮೋದ್ ಶೆಟ್ಟಿ, ಡ್ರ್ಯಾಗನ್ ಮಂಜು, ಟೆನ್ನಿಸ್ ಕೃಷ್ಣ, ಗಿರಿ, ಕರಿಸುಬ್ಬು ಪ್ರಮುಖ ತಾರಾಗಣದಲ್ಲಿದ್ದಾರೆ. ಜತೆಗೆ ನಿರ್ದೇಶಕ ವಿಜಯಾನಂದ್ ಮತ್ತು ಅವರ ಅಣ್ಣ ಡಾ. ವಿ. ನಾಗೇಂದ್ರ ಪ್ರಸಾದ್ ಕೂಡ ವಿಶೇಷ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಹಾಗೇ ಚಿತ್ರದ ಸಾಹಿತ್ಯ ಮತ್ತು ಸಂಗೀತದ ಜವಾಬ್ದಾರಿಯನ್ನೂ ನಾಗೇಂದ್ರ ಪ್ರಸಾದ್ ನಿರ್ವಹಿಸಿದ್ದಾರೆ.
ಚಿತ್ರದಲ್ಲಿ ಪ್ರತಿ 10 ನಿಮಿಷದಲ್ಲಿ ಒಂದು ವ್ಹಾವ್ ಅನ್ನಿಸುವ ಥ್ರಿಲ್ಲಿಂಗ್ ಅಂಶಗಳಿವೆ. ಇದೊಂದು ಜರ್ನಿ ಹಿನ್ನೆಲೆಯಲ್ಲಿ ನಡೆಯುವ ಕಥೆ. ಹೀಗಾಗಿಯೇ ಹುಬ್ಬಳ್ಳಿ, ಧಾರವಾಡ, ಚನ್ನರಾಯಪಟ್ಟಣ, ಮರವಂತೆ, ಹಾಸನ ಸೇರಿ ಹಲವು ಸ್ಥಳಗಳಲ್ಲಿ ಶೂಟಿಂಗ್ ಮಾಡಿದ್ದೇವೆ. ಸದ್ಯ ಚಿತ್ರದ ಪೋಸ್ಟ್-ಪ್ರೊಡಕ್ಷನ್ ಕೆಲಸಗಳು ಭರದಿಂದ ಸಾಗಿವೆ. ಕೆಲವೇ ದಿನಗಳಲ್ಲಿ ಸಿನಿಮಾ ಬಿಡುಗಡೆ ದಿನಾಂಕ ಘೋಷಿಸಲಿದ್ದೇವೆ. -ವಿಜಯಾನಂದ್, ನಿರ್ದೇಶಕ