- 2018ರಲ್ಲೇ "ದ ಡೆವಿಲ್' ಕಥೆ ಬಗ್ಗೆ ದರ್ಶನ್ಗೆ ಹೇಳಿದ್ದರಂತೆ ಪ್ರಕಾಶ್ ವೀರ್
- ಎರಡು ವಾರಗಳ ಹಿಂದೆ ಹೋಗಿ ದರ್ಶನ್ರನ್ನು ಭೇಟಿಯಾಗಿದ್ದ ಪ್ರಕಾಶ್ ಕೆಲ ಪುಸ್ತಕಗಳನ್ನು ಕೊಟ್ಟು ಮಾತನಾಡಿಸಿಕೊಂಡು ಬಂದರಂತೆ
- ಈ ಚಿತ್ರದಲ್ಲಿ ಅದ್ಭುತ ನಟನನ್ನು ನೋಡಬಹುದು - ಪ್ರಕಾಶ್ ವೀರ್
- ಡಿ. 11ರ ಬೆ. 6.30ಕ್ಕೆ ರಾಜ್ಯಾದ್ಯಂತ ದ ಡೆವಿಲ್ ಸಿನಿಮಾ ಶೋಗಳು ಪ್ರಾರಂಭವಾಗಲಿವೆ
The Devil - "ಖುಷಿ', "ರಿಷಿ', "ಮಿಲನ', "ವಂಶಿ', "ತಾರಕ್' ಸೇರಿ 23 ವರ್ಷಗಳ ಕರಿಯರ್ನಲ್ಲಿ ಎಂಟು ಚಿತ್ರಗಳಿಗೆ ಆ್ಯಕ್ಷನ್-ಕಟ್ ಹೇಳಿರುವ ಪ್ರಕಾಶ್ ವೀರ್ ನಿರ್ದೇಶನದ ಒಂಬತ್ತನೇ ಸಿನಿಮಾ "ದ ಡೆವಿಲ್'. "ತಾರಕ್' ಬಳಿಕ 8 ವರ್ಷಗಳ ನಂತರ ಪ್ರಕಾಶ್ ವೀರ್ ಮತ್ತೆ ನಿರ್ದೇಶಿಸುತ್ತಿದ್ದು ಜತೆಗೆ ದರ್ಶನ್ ಕಾರಣಕ್ಕೆ ಸಿನಿಮಾ ಬಗ್ಗೆ ಪ್ರಾರಂಭದಿಂದಲೂ ಕುತೂಹಲ ಹೆಚ್ಚಿದೆ.
ಈ ಸುದೀರ್ಘ ಗ್ಯಾಪ್ ಬಗ್ಗೆ ಪ್ರಕಾಶ್, "ಒಂದು ಕಥೆ ನಮ್ಮನ್ನು ಮಲಗಲು ಬಿಡದಷ್ಟು ಕಾಡಬೇಕು, ಅದೇ ನಮ್ಮನ್ನು ಸೆಟ್ಗೆ ಕರೆದುಕೊಂಡು ಹೋಗಬೇಕು ಅನ್ನೋದು ನನ್ನ ನಂಬಿಕೆ. ಆದರೆ, ನನ್ನ ತಂದೆ, ದೊಡ್ಡಮ್ಮ ಪಾರ್ವತಮ್ಮ ರಾಜಕುಮಾರ್ ಸೇರಿ ಎಲ್ಲರೂ ಒಂದೊಂದು ಚಿತ್ರಕ್ಕೂ ನೀನು ಇಷ್ಟೊಂದು ಸಮಯ ತೆಗೆದುಕೊಂಡರೆ ಹೇಗೋ? ಬೇಗ ಸಿನಿಮಾ ಮಾಡು ಅಂತ ಬೈಯುತ್ತಿದ್ದರು. 2018ರಲ್ಲೇ "ದ ಡೆವಿಲ್' ಕಥೆ ಬಗ್ಗೆ ದರ್ಶನ್ಗೆ ಹೇಳಿದ್ದೆ. ಅದರ ನಡುವೆ ಕರೊನಾ ಬಂತು. ಅಪ್ಪನಿಗೆ ತುಂಬ ದಿನಗಳ ಕಾಲ ಅನಾರೋಗ್ಯವಿತ್ತು. ನಿಜ ಹೇಳಬೇಕೆಂದರೆ "ಕ್ರಾಂತಿ' ಡೇಟ್ಸ್ ಅನ್ನೇ ದರ್ಶನ್ "ಡೆವಿಲ್'ಗೆ ನೀಡಿದ್ದರು. ಆದರೆ, "ಡೆವಿಲ್' ತಡವಾಗುತ್ತಿದ್ದ ಕಾರಣ ದರ್ಶನ್ "ಕ್ರಾಂತಿ' ಮತ್ತು "ಕಾಟೇರ' ಶೂಟಿಂಗ್ಗೆ ಡೇಟ್ಸ್ ಕೊಟ್ಟರು. ಕೇವಲ 80 ದಿನಗಳಲ್ಲಿ "ಡೆವಿಲ್' ಶೂಟಿಂಗ್ ಮುಗಿಸಿದೆವು. ಅದಕ್ಕೆ ಕಾರಣ ಹೋಮ್ ವರ್ಕ್. ಸಿದ್ಧತೆ ಚೆನ್ನಾಗಿದ್ದರೆ ಸೆಟ್ನಲ್ಲಿ ಯಾವುದೇ ಗೊಂದಲವಿರುವುದಿಲ್ಲ. ಏನು ಬೇಕು? ಎಷ್ಟು ಬೇಕು? ಎಂಬ ಸ್ಪಷ್ಟತೆ ಇರುತ್ತದೆ. ಎಷ್ಟೇ ವರ್ಷಗಳ ಬಳಿಕ ನಾನು ನನ್ನ ಸಿನಿಮಾ ಮತ್ತೆ ನೋಡಿದಾಗ, ನಾನೇಕೆ ಈ ಸಿನಿಮಾ ಮಾಡಿದೆ ಅಂತ ನನಗೇ ಅನ್ನಿಸಬಾರದು. ಆ ಅನುಭವ ಕಾಡದಂತಹ ಸಿನಿಮಾ ಮಾಡುವುದಷ್ಟೇ ನನ್ನ ಗುರಿ' ಎಂದು ಹೇಳಿಕೊಳ್ಳುತ್ತಾರೆ.
ಎರಡು ವಾರಗಳ ಹಿಂದೆ ದರ್ಶನ್ ಭೇಟಿ
"ನಾನು, ದರ್ಶನ್ ಫ್ಯಾಮಿಲಿ ಫ್ರೆಂಡ್ಸ್. ಆದರೆ, ನಮ್ಮ ಗೆಳೆತನದ ಬಗ್ಗೆ ನಾನಾಗಲಿ ಅಥವಾ ದರ್ಶನ್ ಆಗಲಿ ಮಾತನಾಡುವುದಿಲ್ಲ. ಅವರು ನನ್ನನ್ನು, ನಾನು ಅವರನ್ನು ಕುಟುಂಬದ ಸದಸ್ಯರಂತೆಯೇ ನೋಡುತ್ತೇವೆ. ನಾವು ಸಿನಿಮಾ ಮತ್ತು ವೈಯಕ್ತಿಕ ವಿಷಯಗಳನ್ನು ಮಿಕ್ಸ್ ಮಾಡುವುದಿಲ್ಲ. ಎರಡು ವಾರಗಳ ಹಿಂದೆ ಹೋಗಿ ದರ್ಶನ್ರನ್ನು ಭೇಟಿ ಮಾಡಿದೆ. ಕೆಲ ಪುಸ್ತಕಗಳನ್ನು ಕೊಟ್ಟು ಮಾತನಾಡಿಸಿಕೊಂಡು ಬಂದೆ. "ಸಿನಿಮಾ ನಿನಗೆ ಇಷ್ಟವಾಯಿತಾ? ಸಂಗೀತ ಹೇಗೆ ಬಂದಿದೆ? ತೆರೆಯ ಮೇಲೆ ಹೇಗೆ ಕಾಣುತ್ತದೆ? ರಿಲೀಸ್ಗೆ ಹೇಗೆ ಸಿದ್ಧತೆ ನಡೆಸುತ್ತಿದ್ದೀಯಾ?' ಅಂತ ಸಿನಿಮಾ ಬಿಟ್ಟು ಬೇರೆ ವಿಷಯ ನಾವು ಮಾತನಾಡುವುದಿಲ್ಲ. ರಿಲೀಸ್ಗೂ ಮುನ್ನ ಮತ್ತೊಮ್ಮೆ ಅವರನ್ನು ಭೇಟಿಯಾಗಬೇಕು ಅಂತ ಅಂದುಕೊಂಡಿದ್ದೇನೆ. ದರ್ಶನ್ನ ತುಂಬ ಮಿಸ್ ಮಾಡಿಕೊಳ್ಳುತ್ತೇನೆ' ಎಂದು ಮಾಹಿತಿ ನೀಡುತ್ತಾರೆ ಪ್ರಕಾಶ್.
ಹಲವು ಶೇಡ್ಗಳ ದರ್ಶನ
ಈ ಹಿಂದೆ ಹಲವು ಬಾರಿ ನೆಗೆಟಿವ್ ಪಾತ್ರ ಮಾಡಲು ಇಷ್ಟ ಅಂತ ಖುದ್ದು ದರ್ಶನ್ ಹೇಳಿಕೊಂಡಿದ್ದರು. "ಡೆವಿಲ್' ಪಾತ್ರದ ಬಗ್ಗೆ, "ಚಿತ್ರದಲ್ಲಿ ದರ್ಶನ್ ಪಾತ್ರಕ್ಕೆ ಹಲವು ಶೇಡ್ಗಳಿವೆ. ಪಾತ್ರದ ಬಗ್ಗೆ ಕೇಳಿ ಅವರೂ ತುಂಬ ಎಕ್ಸೈಟ್ ಆಗಿದ್ದರು. ಯಾವಾಗಲೂ ಕಥೆ ರೆಡಿ ಆಯಿತಾ ಅಂತ ಕೇಳುತ್ತಿದ್ದರು. ಈ ಚಿತ್ರದಲ್ಲಿ ಅದ್ಭುತ ನಟನನ್ನು ನೋಡಬಹುದು. ಅವರನ್ನು ಕ್ಯಾಮರಾ ಹಿಂದೆ ಕುಳಿತು ನೋಡುತ್ತಲೇ ನಾನು ತುಂಬ ಎಂಜಾಯ್ ಮಾಡಿದೆ' ಎನ್ನುತ್ತಾರೆ.
ಅಭಿಮಾನಿಗಳೇ ಪ್ರಚಾರ ರಾಯಭಾರಿಗಳು
"ಅಭಿಮಾನಿಗಳೇ "ಡೆವಿಲ್' ಪ್ರಚಾರ ಮಾಡುತ್ತಿದ್ದಾರೆ' ಎನ್ನುವ ಪ್ರಕಾಶ್, "ಡಿ. 5ರಂದು ಟ್ರೇಲರ್ ಬಿಡುಗಡೆ ಆಗಿದೆ. ಟಿಕೆಟ್ ದರ ಏರಿಸುವ ಆಲೋಚನೆ ಇಲ್ಲ. ಡಿ. 12ರಂದು ರಿಲೀಸ್ ಪ್ಲ್ಯಾನ್ ಮಾಡಿದ್ದೆವು. 11ರಂದು ಸೆಲೆಬ್ರಿಟಿ ಶೋ ಅಥವಾ ಫ್ಯಾನ್ ಶೋ ಅಂತೆಲ್ಲ ಮಾಡುವ ಬದಲು, ಅಂದು ಸಿನಿಮಾನೇ ಬಿಡುಗಡೆ ಮಾಡಲು ನಿರ್ಧರಿಸಿದೆವು. ಡಿ. 11ರ ಬೆ. 6.30ಕ್ಕೆ ಶೋಗಳು ಪ್ರಾರಂಭವಾಗಲಿವೆ' ಎಂದು ಮಾಹಿತಿ ನೀಡುತ್ತಾರೆ.