ಅಂದು ಮಮ್ಮುಟ್ಟಿ ಟೀಕಿಸಿದವರಿಗೆ ಇಂದು ಕಾಲವೇ ಉತ್ತರಿಸಿದೆ...ಟಾಕ್ಸಿಕ್​ ಸೃಷ್ಟಿಕರ್ತೆಗೆ ಕರ್ಮ ರಿಟರ್ನ್ಸ್​ ಎಂದ ನಿರ್ದೇಶಕ! Toxic

Toxic : ದಕ್ಷಿಣ ಭಾರತದ ಖ್ಯಾತ ನಟ ರಾಕಿಂಗ್ ಸ್ಟಾರ್ ಯಶ್ ಅಭಿನಯದ, ಗೀತು ಮೋಹನ್ ದಾಸ್ ನಿರ್ದೇಶನದ ಬಹುನಿರೀಕ್ಷಿತ 'ಟಾಕ್ಸಿಕ್' ಸಿನಿಮಾ ಬಿಡುಗಡೆಯಾದ ದಿನದಿಂದಲೇ ಪರ-ವಿರೋಧ ಚರ್ಚೆಗೆ ಗುರಿಯಾಗಿದೆ. ನಿರೀಕ್ಷೆಗೂ ಮೀರಿ ತಯಾರಾದ ಈ ಚಿತ್ರವು ಬಾಕ್ಸ್ ಆಫೀಸ್‌ನಲ್ಲಿ ಹಿನ್ನಡೆ ಅನುಭವಿಸುತ್ತಿರುವುದರ ಜೊತೆಗೆ, ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಟೀಕೆಗಳನ್ನು ಎದುರಿಸುತ್ತಿದೆ. ಈ ವಿಚಾರವಾಗಿ ಮಲಯಾಳಂ ಸಿನಿಮಾ ನಿರ್ದೇಶಕ ಅಲೆಪ್ಪಿ ಅಶ್ರಫ್ ಅವರು ನೀಡಿರುವ ಹೇಳಿಕೆಯೊಂದು ಚಲನಚಿತ್ರರಂಗದಲ್ಲಿ ಹೊಸ ಚರ್ಚೆಗೆ ಗ್ರಾಸವಾಗಿದೆ.

ಅಲೆಪ್ಪಿ ಅಶ್ರಫ್ ಅವರು ಇತ್ತೀಚೆಗೆ ಬಿಡುಗಡೆ ಮಾಡಿರುವ ವಿಡಿಯೋದಲ್ಲಿ, 'ಟಾಕ್ಸಿಕ್' ಸಿನಿಮಾದ ವಿರುದ್ಧ ಕೇಳಿಬರುತ್ತಿರುವ ಕಟುವಾದ ಟೀಕೆಗಳ ಬಗ್ಗೆ ವಿಸ್ತೃತವಾಗಿ ಮಾತನಾಡಿದ್ದಾರೆ. ಸದ್ಯ ವಿಮರ್ಶಕರು ಈ ಸಿನಿಮಾವನ್ನು ತೀವ್ರವಾಗಿ ಟೀಕಿಸುತ್ತಿದ್ದು, ಇತ್ತೀಚಿನ ದಿನಗಳಲ್ಲಿ ಇಷ್ಟರ ಮಟ್ಟಿಗೆ ಯಾವುದೇ ಸಿನಿಮಾವನ್ನು ಕಡೆಗಣಿಸಿ ಅವಮಾನಿಸಿದ್ದನ್ನು ತಾನು ನೋಡಿಲ್ಲ ಎಂದು ಅಶ್ರಫ್ ಅವರು ಅಚ್ಚರಿ ವ್ಯಕ್ತಪಡಿಸಿದ್ದಾರೆ. ದಕ್ಷಿಣ ಭಾರತದ ಸ್ಟಾರ್ ನಟ ಯಶ್ ನಟಿಸಿರುವ ಮತ್ತು ವಿವಿಧ ಭಾಷೆಗಳಲ್ಲಿ ಬಿಡುಗಡೆಯಾಗಿರುವ ಈ ಚಿತ್ರವು ಸಾಮಾನ್ಯ ಸಿನಿಮಾವಲ್ಲ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಸುಮಾರು 500 ಕೋಟಿ ರೂಪಾಯಿಗೂ ಅಧಿಕ ಬೃಹತ್ ಬಜೆಟ್‌ನಲ್ಲಿ ನಿರ್ಮಾಣವಾಗಿರುವ ಈ ಸಿನಿಮಾದ ಮೇಲೆ ನಿರ್ಮಾಪಕರು ಭಾರಿ ಹಣ ಹೂಡಿದ್ದಾರೆ ಎಂದು ಅಶ್ರಫ್ ತಿಳಿಸಿದ್ದಾರೆ. ಮಲಯಾಳಂ ಚಿತ್ರರಂಗದ ಇತಿಹಾಸದಲ್ಲೇ ಯಾವೊಬ್ಬ ದಿಗ್ಗಜ ನಿರ್ದೇಶಕರಿಗೂ ಸಿಗದಂತಹ ಸುವರ್ಣ ಅವಕಾಶವನ್ನು ನಿರ್ದೇಶಕಿ ಗೀತು ಮೋಹನ್ ದಾಸ್ ಅವರಿಗೆ ನೀಡಲಾಗಿತ್ತು. ವಿಜಯ್ ಅಭಿನಯದ 400 ಕೋಟಿ ರೂ. ಬಜೆಟ್‌ನ 'ಜನನಾಯಗನ್' ಸಿನಿಮಾವನ್ನು ನಿರ್ಮಿಸಿದ್ದ ಹಾಗೂ ಪ್ರಿಯದರ್ಶನ್ ಅವರ ಮುಂಬರುವ 'ಆದಮ್' ರೀಮೆಕ್ ಚಿತ್ರಕ್ಕೂ ಬಂಡವಾಳ ಹೂಡಿರುವ ಪ್ರಮುಖ ನಿರ್ಮಾಪಕರೇ ಈ ಚಿತ್ರಕ್ಕೂ ಹಣ ಹೂಡಿದ್ದಾರೆ ಎಂದು ಅವರು ವಿವರಿಸಿದ್ದಾರೆ.

ಆದರೆ 'ಟಾಕ್ಸಿಕ್' ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ಸೋತಿರುವುದು ಮಾತ್ರವಲ್ಲದೆ, ಕೆಲ ತಮಿಳು ವಿಮರ್ಶಕರು ಸಿನಿಮಾವನ್ನು ಅತಿ ಕಳಪೆಯಾಗಿ ಬಿಂಬಿಸುತ್ತಿದ್ದಾರೆ ಎಂದು ಅಶ್ರಫ್ ಬೇಸರ ವ್ಯಕ್ತಪಡಿಸಿದ್ದಾರೆ. ಯಶ್ ಹಾಗೂ ನಿರ್ಮಾಣ ಸಂಸ್ಥೆಯು ಗೀತು ಮೋಹನ್ ದಾಸ್ ಅವರ ಕಥೆಯನ್ನು ಮೆಚ್ಚಿ ಅವರಿಗೆ ನಿರ್ದೇಶನ ಮಾಡುವ ಜವಾಬ್ದಾರಿಯನ್ನು ಒಪ್ಪಿಸಿದ್ದರು. ಇಷ್ಟು ದೊಡ್ಡ ಅವಕಾಶವನ್ನು ಸಮರ್ಥವಾಗಿ ಬಳಸಿಕೊಳ್ಳುವ ನಿಟ್ಟಿನಲ್ಲಿ ಚಿತ್ರ ತಂಡ ಎಡವಿದ್ದೇಕೆ ಎಂಬ ಚರ್ಚೆಗಳು ಈಗ ಎಲ್ಲೆಡೆ ಮುನ್ನೆಲೆಗೆ ಬಂದಿವೆ.

ಈ ಪ್ರಾಜೆಕ್ಟ್‌ನಲ್ಲಿ ಗೀತು ಮೋಹನ್ ದಾಸ್ ಅವರಿಗೆ ರಾಷ್ಟ್ರೀಯ ಪ್ರಶಸ್ತಿ ವಿಜೇತ ಸಿನಿಮಾಟೋಗ್ರಾಫರ್ ಹಾಗೂ 'ಅನ್ನುಯುಮ್ ರಸೂಲು', 'ಕಮ್ಮಟಿಪಾದಮ್' ಖ್ಯಾತಿಯ ನಿರ್ದೇಶಕ ರಾಜೀವ್ ರವಿ ಅವರು ತಂತ್ರಜ್ಞರಾಗಿ ಸಾಥ್ ನೀಡಿದ್ದರು. ಗೀತು ಅವರ ಜೊತೆಯೇ ಇದ್ದು ಕ್ಯಾಮೆರಾ ಹಾಗೂ ಇತರ ತಾಂತ್ರಿಕ ಕಾರ್ಯಗಳಲ್ಲಿ ರಾಜೀವ್ ರವಿ ಬೆಂಬಲವಾಗಿ ನಿಂತಿದ್ದರು ಎಂಬುದನ್ನು ಅಶ್ರಫ್ ತಮ್ಮ ಮಾತುಗಳಲ್ಲಿ ನೆನಪಿಸಿದ್ದಾರೆ. ಇಂತಹ ಅನುಭವಿಗಳ ತಂಡವಿದ್ದರೂ ಚಿತ್ರವು ನಿರೀಕ್ಷಿತ ಮಟ್ಟದಲ್ಲಿ ಮ್ಯಾಜಿಕ್ ಮಾಡದಿರುವುದು ಚಿತ್ರರಂಗಕ್ಕೆ ದೊಡ್ಡ ಆಘಾತ ತಂದಿದೆ.

ಇದೇ ಸಂದರ್ಭದಲ್ಲಿ ಹಳೆಯ ವಿವಾದವೊಂದನ್ನು ನೆನಪಿಸಿರುವ ಅಲೆಪ್ಪಿ ಅಶ್ರಫ್, ಮೆಗಾಸ್ಟಾರ್ ಮಮ್ಮುಟ್ಟಿ ಅವರ 'ಕಸಬ' ಸಿನಿಮಾದ ವಿರುದ್ಧ ಹಿಂದೆ ನಡೆದ ವಿವಾದವನ್ನು ಉಲ್ಲೇಖಿಸಿದ್ದಾರೆ. ಮಮ್ಮುಟ್ಟಿ ನಟಿಸಿದ ಆ ಚಿತ್ರದಲ್ಲಿ ಮಹಿಳಾ ಪೊಲೀಸ್ ಅಧಿಕಾರಿಯೊಬ್ಬರ ಜೊತೆಗಿನ ದೃಶ್ಯ ಮತ್ತು ಬೆಲ್ಟ್ ಹಿಡಿಯುವ ಸನ್ನಿವೇಶವು ಸ್ತ್ರೀ ವಿರೋಧಿಯಾಗಿದೆ ಎಂದು ನಟಿ ಪಾರ್ವತಿ ತಿರುವೋತ್ ಬಹಿರಂಗವಾಗಿ ಧ್ವನಿ ಎತ್ತಲು ನಿರ್ದೇಶಕಿ ಗೀತು ಮೋಹನ್ ದಾಸ್ ಅವರೇ ಕಾರಣರಾಗಿದ್ದರು ಎಂಬ ವಿಷಯ ಎಲ್ಲರಿಗೂ ತಿಳಿದಿದೆ ಎಂದಿದ್ದಾರೆ.

ಅಂದು ಮಮ್ಮುಟ್ಟಿ ಅವರ 'ಕಸಬ' ಸಿನಿಮಾದ ಸಂಭಾಷಣೆ ಹಾಗೂ ದೃಶ್ಯಗಳ ವಿರುದ್ಧ ಧ್ವನಿ ಎತ್ತಿದ್ದ ನಟಿ ಪಾರ್ವತಿ ತಿರುವೋತ್ ಅವರು ಮಮ್ಮುಟ್ಟಿ ಅಭಿಮಾನಿಗಳಿಂದ ತೀವ್ರ ಸೈಬರ್ ದಾಳಿಗೆ ಗುರಿಯಾಗಿದ್ದರು ಎಂದು ಅಶ್ರಫ್ ನೆನಪಿಸಿದ್ದಾರೆ. ಆ ಸಮಯದಲ್ಲಿ ಮಲಯಾಳಂ ಚಿತ್ರರಂಗದಲ್ಲಿ ಉತ್ತುಂಗದಲ್ಲಿದ್ದ ಪಾರ್ವತಿ ಅವರು ಆ ಟೀಕೆಯಿಂದಾಗಿ ಸಾಕಷ್ಟು ಮಾನಸಿಕ ಹಾಗೂ ವೃತ್ತಿಪರ ನಷ್ಟಗಳನ್ನು ಎದುರಿಸಬೇಕಾಯಿತು. ಆದರೆ, ಅದೆಲ್ಲದರ ನಡುವೆಯೂ ನಟ ಮಮ್ಮುಟ್ಟಿ ಅವರು ಯಾರ ಮೇಲೂ ವೈಯಕ್ತಿಕ ದ್ವೇಷ ಸಾಧಿಸದೆ ಅತ್ಯಂತ ಘನತೆಯಿಂದ ವರ್ತಿಸಿದ್ದರು ಎಂದು ಅಶ್ರಫ್​ ಅವರು ಪ್ರಶಂಸಿಸಿದ್ದಾರೆ.

ಕೊನೆಯದಾಗಿ, ಅಂದು ಮಮ್ಮುಟ್ಟಿ ಅವರನ್ನು ಟೀಕಿಸಿ ವಿವಾದ ಮೈಮೇಲೆಳೆದುಕೊಂಡಿದ್ದವರಿಗೆ ಕಾಲವೇ ತಕ್ಕ ಉತ್ತರ ನೀಡಿದೆ ಎಂಬುದನ್ನು ಅಶ್ರಫ್ ಪರೋಕ್ಷವಾಗಿ ಸೂಚಿಸಿದ್ದಾರೆ. ನೀವು ವಿಮರ್ಶಕರು ಹೇಳುವುದನ್ನು ಕೇಳುತ್ತಾ ಹೋದರೆ ಬದುಕುವುದು ಕಷ್ಟವಾಗುತ್ತದೆ ಎಂದು ಗೀತು ಮೋಹನ್​ದಾಸ್​ ಹೇಳಿಕೆಯನ್ನು ಉಲ್ಲೇಖಿಸಿದ ಅಶ್ರಫ್​, ಅಂದು ಮಮ್ಮುಟ್ಟಿಯನ್ನು ಟೀಕಿಸಿದವರು ಇಂದು ತಮ್ಮ ಕೆಲಸವನ್ನು ತಾವು ನೋಡಿಕೊಳ್ಳಬೇಕಾದ ಪರಿಸ್ಥಿತಿ ಬಂದಿದೆ ಎಂದು ತಿರುಗೇಟು ನೀಡಿದ್ದಾರೆ, (ಏಜೆನ್ಸೀಸ್​).