ಮಂಡ್ಯ ಮೂಲದ ಯುವರೈತ ಚೇತನ್ ಗೌಡ ಮತ್ತು "ಬಿಗ್ಬಾಸ್ ಕನ್ನಡ' ಸೀಸನ್ 11ರ ಖ್ಯಾತಿಯ ನಟಿ ಭವ್ಯಾ ಗೌಡ ಮುಖ್ಯ ಭೂಮಿಕೆಯಲ್ಲಿ ನಟಿಸುತ್ತಿರುವ ಸಿನಿಮಾ "ದೇವಿ'. ಚೇತನ್ ಅವರೇ ಚಿತ್ರಕ್ಕೆ ಕಥೆ, ಚಿತ್ರಕಥೆ ಬರೆದಿದ್ದು, ಪ್ರಕಾಶ್ ಕುಮಾರ್ ನಿರ್ದೇಶಿಸುತ್ತಿದ್ದಾರೆ. ಕಳೆದ ಕೆಲ ದಿನಗಳಿಂದ ಲಗ್ಗೆರೆಯ ಆಕಾಶ್ ಚಿತ್ರಮಂದಿರದ ಮುಂದೆ ನಟ ದರ್ಶನ್ರ 50 ಅಡಿ ಎತ್ತರದ ಕಟೌಟ್ ನಿರ್ಮಿಸಿ, "ದೇವಿ' ಚಿತ್ರದ ಸಾಹಸ ಸನ್ನಿವೇಶಗಳ ಶೂಟಿಂಗ್ ನಡೆಸಲಾಗುತ್ತಿದೆ. ಚೇತನ್ ಜತೆ ಹುಲಿ ಕಾರ್ತಿಕ್, ಕಾರೋಚ್ ಸುಧಿ, ಯಶ್ ಶೆಟ್ಟಿ ಹಾಗೂ ನೂರಕ್ಕೂ ಅಧಿಕ ಸಹ&ಕಲಾವಿದರು ಚಿತ್ರೀಕರಣದಲ್ಲಿ ಭಾಗಿಯಾಗಿದ್ದಾರೆ. ನಾಯಕ ಚೇತನ್, "ಜೀವನದಲ್ಲಿ ಏನಾದರೂ ಸಾಧಿಸಬೇಕು ಅಂತ ಹಳ್ಳಿಯಿಂದ ನಗರಕ್ಕೆ ಬರುವ ಹುಡುಗನೊಬ್ಬ, ಸಂದರ್ಭದ ಕೈಗೊಂಬೆಯಾಗಿ ರೌಡಿಸಂಗೆ ಇಳಿಯುವ ಕಥೆಯಿದು. ಸಿನಿಮಾ ನಾವಂದುಕೊಂಡಂತೆಯೇ ತುಂಬ ಚೆನ್ನಾಗಿ ಮೂಡಿಬರುತ್ತಿದೆ. ನಾನು ನಿಜ ಜೀವನದಲ್ಲಿ ನಟ ದರ್ಶನ್ ಅಭಿಮಾನಿ. ಸಿನಿಮಾದಲ್ಲೂ ಅವರ ಅಭಿಮಾನಿ ಪಾತ್ರದಲ್ಲೇ ನಟಿಸಿದ್ದೇನೆ. ದರ್ಶನ್ರ "ಶಾಸ್ತ್ರಿ' ಸಿನಿಮಾ ರಿ&ರಿಲೀಸ್ ಆದ ಸಮಯದಲ್ಲಿ ನಾಯಕ ಮತ್ತು ವಿಲನ್ಗಳ ನಡುವೆ ಗಲಾಟೆಯಾಗುವ ಸನ್ನಿವೇಶವನ್ನು ಚಿತ್ರೀಕರಿಸುತ್ತಿದ್ದೇವೆ' ಎಂದರು. ನಿರ್ದೇಶಕ ಪ್ರಕಾಶ್, "ಈಗಾಗಲೇ ಎಂಟು ದಿನಗಳ ಚಿತ್ರೀಕರಣ ಮುಗಿದಿದ್ದು, ಇನ್ನೂ 45 ದಿನಗಳ ಶೂಟಿಂಗ್ ಬಾಕಿ ಇದೆ. ಮಂಡ್ಯದಲ್ಲಿ 10 ದಿನ, ಶಿವಮೊಗ್ಗ ಮತ್ತು ಬೆಂಗಳೂರು ಸುತ್ತಮುತ್ತ ಚಿತ್ರೀಕರಣ ನಡೆಸಲಿದ್ದೇವೆ' ಎಂದು ಮಾಹಿತಿ ನೀಡುತ್ತಾರೆ. ಆ್ಯಕ್ಷನ್ ಜತೆಗೆ ತಾಯಿ ಸೆಂಟಿಮೆಂಟ್ ಅಂಶಗಳಿರುವ "ದೇವಿ'ಗೆ ಅಜಿತ್ ಕುಮಾರ್ ಛಾಯಾಗ್ರಹಣ, ಮಾಸ್ತಿ ಸಂಭಾಷಣೆ ಮತ್ತು ಶ್ರೀಧರ್ ವಿ. ಸಂಭ್ರಮ್ ಸಂಗೀತವಿರಲಿದೆ.