ವಿಧಾನ ಪರಿಷತ್ ಉಪ ಸಭಾಪತಿ, ಹಿರಿಯ ನಟಿ ಉಮಾಶ್ರೀ ನೂರಾರು ಸಿನಿಮಾಗಳಲ್ಲಿ ಭಿನ್ನ, ವಿಭಿನ್ನ ಪಾತ್ರಗಳ ಮೂಲಕ ಕನ್ನಡ ಚಿತ್ರರಂಗದಲ್ಲಿ ತಮ್ಮದೇ ಮೂಡಿಸಿದ್ದಾರೆ. ಆದರೆ, ಸಿನಿಮಾ ರಂಗಕ್ಕೆ ಪದಾರ್ಪಣೆ ಮಾಡಿದ ಪ್ರಾರಂಭದಲ್ಲಿ ಹಲವು ವರ್ಷಗಳ ಕಾಲ ಅವರು ದ್ವಂದ್ವಾರ್ಥದ ಸಂಭಾಷಣೆ ಇರುವ ಪಾತ್ರಗಳಲ್ಲೇ ಹೆಚ್ಚು ನಟಿಸಿದ್ದರಂತೆ. ಆ ಡಬಲ್ ಮೀನಿಂಗ್ ಸರಪಳಿಯಿಂದ ಹೊರಬಂದ ಬಗ್ಗೆ ಇತ್ತೀಚೆಗಷ್ಟೆ ಮುಕ್ತವಾಗಿ ಹೇಳಿಕೊಂಡಿದ್ದಾರೆ. "ನಾನು ಮತ್ತು ಎನ್.ಎಸ್. ರಾವ್ ಜತೆಯಾಗಿ ಹಲವು ಸಿನಿಮಾಗಳಲ್ಲಿ ನಟಿಸಿದ್ದೆವು. ನಮ್ಮನ್ನು ನಿಜವಾಗಲೂ ಗಂಡ - ಹೆಂಡತಿ ಅಂತ ಪ್ರೇಕ್ಷಕರು ಅಂದುಕೊಂಡುಬಿಟ್ಟಿದ್ದರು. ನಾಯಕ&ನಾಯಕಿ ಸಮಾನವಾಗಿ ಹೆಸರು ಮಾಡಿದ್ದ, ಬಾಕ್ಸಾಫಿಸಿನಲ್ಲಿ ಹಣ ತಂದುಕೊಟ್ಟ ಹಿಟ್ ಕಾಂಬಿನೇಷನ್ ನಮ್ಮದು. 1989&90ರ ಆಸುಪಾಸಿನಲ್ಲಿ ಎನ್.ಎಸ್. ರಾವ್ ಅವರು ನಿಧನ ಹೊಂದಿದರು. ಬಳಿಕ, ಅವರಿಲ್ಲದೇ ಉಮಾಶ್ರೀ ಕೂಡ ಇಲ್ಲ ಅಂತ ಚಿತ್ರರಂಗ ತೀರ್ಮಾನಿಸಿಬಿಟ್ಟಿತ್ತು. ನಂತರ ನನಗೆ ಸುಮಾರು ಒಂದು ವರ್ಷ ಅವಕಾಶವೇ ಇಲ್ಲದಂತಾಗಿತ್ತು. ಅಲ್ಲಿಯವರೆಗೆ ಹತ್ತು ವರ್ಷಗಳ ಕಾಲ ಡಬಲ್ ಮೀನಿಂಗ್ ಡೈಲಾಗ್ಗಳನ್ನು ಹೇಳಿ ಹೇಳಿ ಅದಕ್ಕೆ ಸೀಮಿತವಾಗಿಬಿಟ್ಟಿದ್ದೆ. ನನ್ನನ್ನು ರಂಗಭೂಮಿಯಲ್ಲಿ ನೋಡಿದವರು, ಎಷ್ಟು ಒಳ್ಳೆಯ ಕಲಾವಿದೆ, ಸಿನಿಮಾದಲ್ಲಿ ಬರೀ ಈ ರೀತಿಯ ಪಾತ್ರಗಳನ್ನೇ ಮಾಡುತ್ತಿದ್ದಾರೆ ಅಂತ ಹೇಳುತ್ತಿದ್ದರು. ಒಂದು ವರ್ಷದ ಬಳಿಕ ನನಗೆ ಓಂಸಾಯಿಪ್ರಕಾಶ್ "ಗೋಲ್ಮಾಲ್ ರಾಧಾಕೃಷ್ಣ'ದಲ್ಲಿ ಮೊದಲ ಅವಕಾಶ ನೀಡಿದರು. ಆಗಲೇ ಅವರಿಗೆ ಡಬಲ್ ಮೀನಿಂಗ್ ಮಾಡಲ್ಲ ಅಂತ ಹೇಳಿದ್ದೆ. ಅವರು ನನಗೆ ಒಂದೂ ದ್ವಂದ್ವಾರ್ಥ ಸಂಭಾಷಣೆ ಇಲ್ಲದೇ, ನೀಟ್ ಕಾಮಿಡಿ ಕೊಟ್ಟರು. ಆ ನಂತರ ನಾನು ಡಬಲ್ ಮೀನಿಂಗ್ ಮಾಡಲಿಲ್ಲ' ಎಂದು ನೆನಪಿನ ಬುತ್ತಿ ತೆರೆದಿಟ್ಟರು. ಅಂದಹಾಗೆ, ಅವರ ಈ ಮಾತಿಗೆ ವೇದಿಕೆಯಾಗಿದ್ದು ಹಿರಿಯ ನಿರ್ದೇಶಕ ಓಂಸಾಯಿ ಪ್ರಕಾಶ್ ಅವರ 106ನೇ ಚಿತ್ರ "ಕಾಮನ್ಮ್ಯಾನ್' ಆಡಿಯೋ ಬಿಡುಗಡೆ ಕಾರ್ಯಕ್ರಮ. "ಬೆಟೊನಾ ಬೆಟೊನಾ' ಎಂದು ಸಾಗುವ ಪೆಪ್ಪಿ ಹಾಡನ್ನು ಬಿಡುಗಡೆ ಮಾಡಿದ ಉಮಾಶ್ರೀ ತಂಡಕ್ಕೆ ಶುಭಹಾರೈಸಿದರು. "ಕೆರೆಬೇಟೆ' ಖ್ಯಾತಿಯ ಗೌರಿಶಂಕರ್, ಶೋನಾ ಲಾದ್ವಾ, ಸಬ್ಬಿ ಸೂರಿ, ಬಲರಾಜವಾಡಿ, ರಮೇಶ್ ಭಟ್, ಸತೀಶ್ ಚಂದ್ರ ಮುಖ್ಯ ಭೂಮಿಕೆಯಲ್ಲಿ ನಟಿಸಿದ್ದಾರೆ. ಎನ್. ನರಸಿಂಹಮೂರ್ತಿ ನಿರ್ಮಿಸಿರುವ ಈ ಸಿನಿಮಾ, ವಿನಯ್ ಚಂದ್ರ ಸಂಗೀತದಲ್ಲಿ ಮೂಡಿಬಂದಿದ್ದು, ಇದೇ 25ರಂದು ರಾಜ್ಯಾದ್ಯಂತ ರಿಲೀಸ್ ಆಗಲಿದೆ.
ತಾರೆಯರಿಂದ ನಾಲ್ಕು ಹಾಡುಗಳ ರಿಲೀಸ್
ಒಂದು ಹಾಡನ್ನು ಉಮಾಶ್ರೀ ಬಿಡುಗಡೆ ಮಾಡಿದರೆ, ಪ್ರಿಯಾಂಕಾ ಉಪೇಂದ್ರ, ವಿನೋದ್ ಪ್ರಭಾಕರ್ ಮತ್ತು ರಮೇಶ್ ಭಟ್ ಉಳಿದ ಮೂರು ಸಾಂಗ್ಗಳನ್ನು ರಿಲೀಸ್ ಮಾಡಿದರು. ಡಾ. ವಿ. ನಾಗೇಂದ್ರ ಪ್ರಸಾದ್ ಮತ್ತು ಸರ್ವೇಶ್ ತಲಾ ಎರಡು ಹಾಡುಗಳನ್ನು ಬರೆದಿದ್ದು, ನಟಿ ಚೈತ್ರಾ ಜೆ. ಆಚಾರ್, ಕೈಲಾಶ್ ಖೇರ್, ಬಾಬಾ ಸೆಹ್ಗಲ್, ಜಾವೆದ್ ಅಲಿ ಧ್ವನಿಯಾಗಿದ್ದಾರೆ. ಒಬ್ಬ ಸಾಮಾನ್ಯ ಪ್ರಜೆ ರಾಜ್ಯದ ಮುಖ್ಯಮಂತ್ರಿಯಾದರೆ, ಏನೆಲ್ಲ ಸುಧಾರಣೆ ಮಾಡಬಹುದು ಎಂಬುದರ ಸುತ್ತ ಈ ಪೊಲಿಟಿಕಲ್ ಆ್ಯಕ್ಷನ್ ಕಾಮಿಡಿ ಕಥೆ ಸಾಗುತ್ತದೆ.