"ಬಾಬ', "ಗಣೇಶ ಮತ್ತೆ ಬಂದ', "ಕೆಂಚ', "ಮಳೆಬಿಲ್ಲೆ' ಸೇರಿ ಹಲವು ಚಿತ್ರಗಳಲ್ಲಿ ಮಿಂಚಿದ್ದ ನಟಿ ಪ್ರಜ್ಞಾ ಶ್ಯಾಮಪ್ರಸಾದ್ ಕಳೆದ 10 ವರ್ಷಗಳಿಂದ ಯಾವ ಚಿತ್ರದಲ್ಲೂ ಕಾಣಿಸಿಕೊಂಡಿರಲಿಲ್ಲ. ಹಾಗಂತ ಅವರು ಚಿತ್ರರಂಗಕ್ಕೆ ಗುಡ್ಬೈ ಹೇಳಿರಲಿಲ್ಲವಾದರೂ, ತಮ್ಮದೇ ಈವೆಂಟ್ ಮ್ಯಾನೇಜ್ಮೆಂಟ್ ಕಂಪನಿಯಲ್ಲಿ ಬಿಜಿಯಾಗಿದ್ದರು. ಇದೀಗ ದಶಕದ ಬಳಿಕ ಸತೀಶ್ ನೀನಾಸಂ, ರಚಿತಾ ರಾಮ್ ನಟಿಸಿರುವ, ಮಹೇಶ್ ನಿರ್ದೇಶನದ "ಅಯೋಗ್ಯ 2' ಚಿತ್ರದ "ಮಿಲ್ಕಿ ಬ್ಯೂಟಿ' ಪೆಪ್ಪಿ ಸಾಂಗ್ ಮೂಲಕ ಪ್ರಜ್ಞಾ ಕಮ್ಬ್ಯಾಕ್ ಮಾಡಿದ್ದಾರೆ. ಇತ್ತೀಚೆಗಷ್ಟೆ ವಿಜಯವಾಣಿ ಜತೆ ಮಾತಿಗೆ ಸಿಕ್ಕಿದ್ದ ಅವರು, ಇಷ್ಟು ವರ್ಷಗಳ ಬ್ರೇಕ್, ಈಗಿನ ಕಮ್ಬ್ಯಾಕ್, ಮುಂದಿನ ಯೋಜನೆಗಳ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ. "ಯುವದಸರಾ ಸೇರಿ ಹಲವು ಕಾರ್ಯಕ್ರಮಗಳನ್ನು ಆಯೋಜಿಸುತ್ತಿದ್ದ ಕಾರಣ ನಾನು ಸಿನಿಮಾಗಳಲ್ಲಿ ನಟಿಸುತ್ತಿರಲಿಲ್ಲವಾದರೂ, ಚಿತ್ರರಂಗದ ನಂಟು ಕಡಿದುಕೊಂಡಿರಲಿಲ್ಲ. ಸಂಪರ್ಕ ಇದ್ದೇ ಇತ್ತು. ಕೆಲ ದಿನಗಳ ಹಿಂದೆ ನಿರ್ದೇಶಕ ಮಹೇಶ್ ಕರೆ ಮಾಡಿ, ಒಂದು ಹಾಡಿದೆ ಮಾಡುತ್ತೀರಾ? ಅಂತ ಕೇಳಿದರು. ಎನರ್ಜಿಟಿಕ್ ಸಾಂಗ್ ಕೇಳಿದೆ. ಖುಷಿಯಾಯಿತು. ತೆರೆಯ ಮೇಲೆ ಕಾಣಿಸಿಕೊಳ್ಳಬೇಕು ಅಂದರೆ ಅದಕ್ಕೊಂದು ಒಳ್ಳೆ ವೇದಿಕೆ ಬೇಕಲ್ಲವೇ? ಈ ಹಾಡು ಒಳ್ಳೆ ಅವಕಾಶ ಅನ್ನಿಸಿತು. ತುಂಬ ಗ್ಯಾಪ್ ಆಗಿದ್ದ ಕಾರಣ, ನನಗೂ ತರಬೇತಿ ಬೇಕಿತ್ತು. ಹೀಗಾಗಿ ಹರ್ಷ ಮಾಸ್ಟರ್ ಜತೆ 2, 3 ದಿನ ರಿಹರ್ಸಲ್ ಮಾಡಿದೆ. ಎರಡೇ ದಿನಗಳಲ್ಲಿ ತುಂಬ ಗ್ಯಾಪ್ ಆಗಿದ್ದ ಕಾರಣ, ನನಗೂ ತರಬೇತಿ ಬೇಕಿತ್ತು. ಚಿತ್ರೀಕರಣ ಮುಗಿಸಿದೆವು. ಬಳಿಕ ನನಗೆ ಎರಡು ದಿನ ರೆಸ್ಟ್ ಬೇಕಾಯಿತು. ಅಷ್ಟು ಶ್ರಮ ಕೇಳಿದ ಹಾಡಿದು. ನಾನು ಒಳ್ಳೆ ಡಾನ್ಸರ್ ಅಂತ ಅಂತ ತುಂಬ ಜನರಿಗೆ ಗೊತ್ತಿರಲಿಲ್ಲ. ಈಗ ಹಲವಾರು ಮಂದಿ ಕರೆ ಮಾಡಿ ತುಂಬ ಚೆನ್ನಾಗಿ ಡಾನ್ಸ್ ಮಾಡಿದ್ದೀರಾ ಎನ್ನುತ್ತಿದ್ದಾರೆ' ಎಂದು ಸಂತಸ ಹಂಚಿಕೊಳ್ಳುತ್ತಾರೆ.
ಗುಡ್ಬೈ ಹೇಳಿರಲಿಲ್ಲ, ಆದರೂ...
ಇನ್ನು ಸುದೀರ್ 10 ವರ್ಷಗಳ ಬ್ರೇಕ್ ಬಗ್ಗೆ ಪ್ರಜ್ಞಾ, "9ನೇ ತರಗತಿಯಲ್ಲಿದ್ದಾಗ ನಾನು ಚಿತ್ರರಂಗಕ್ಕೆ ಬಂದೆ. ಓದು, ಸಿನಿಮಾ ಬ್ಯಾಲೆನ್ಸ್ ಮಾಡುತ್ತಿದ್ದೆ. ಕೆಲ ವರ್ಷಗಳಲ್ಲೇ ತಂದೆ ತೀರಿಕೊಂಡರು, ವಯಕ್ತಿಕ ಜೀವನದ ಏರುಪೇರಿನಿಂದ ಒಂದು ಬ್ರೇಕ್ ಬೇಕು ಅಂತನ್ನಿಸಿತು. ಕ್ರಮೇಣ ಪ್ರಜ್ಞಾ ಸಿನಿಮಾನೇ ಮಾಡಲ್ಲ ಅನ್ನೋ ಮಾತು ಹಬ್ಬಿತು. ಆಗೊಮ್ಮೆ ಈಗೊಮ್ಮೆ ಆಫರ್ ಬಂದರೂ, ನನಗೆ ಇದು ಸರಿಯಾದ ಸಮಯ ಅಲ್ಲ ಅಂತನ್ನಿಸುತ್ತಿತ್ತು. ಎಲ್ಲದಕ್ಕೂ ಅದರದೇ ಆದ ಸಮಯ ಇರುತ್ತದೆ ಅಂತ ನಂಬುತ್ತೇನೆ. ಈಗ ಒಳ್ಳೆ ಟೈಮ್ ಅನ್ನಿಸಿತು. ಹೀಗಾಗಿ ಈ ಹಾಡಿನಲ್ಲಿ ನಟಿಸಿದೆ. ಕಲಾವಿದರು ಬೇರಾವ ಕ್ಷೇತ್ರದಲ್ಲಿ ಬಿಜಿಯಾಗಿದ್ದರೂ, ಅವರಿಗೆ ಸಿನಿಮಾ ನೀಡುವ ಸಮಾಧಾನವೇ ಬೇರೆ...' ಎನ್ನುತ್ತಾರೆ.
ಫಿಟ್ನೆಸ್ ಜರ್ನಿ
ಕಳೆದ ಮಾರ್ಚ್ನಿಂದ ಫಿಟ್ನೆಸ್ ಪಯಣ ಆರಂಭಿಸಿರುವ ಪ್ರಜ್ಞಾ ಕೇವಲ ನಾಲ್ಕು ತಿಂಗಳಲ್ಲಿ 10 ಕೆಜಿ ತೂಕ ಇಳಿಸಿಕೊಂಡಿದ್ದಾರಂತೆ. "ಸಿನಿಮಾಗೆ ಬರಬೇಕು ಅಂತಲ್ಲ. ಆದರೆ, ಫಿಟ್ ಆಗಿರಬೇಕು ಅಂತ ಮಾರ್ಚ್ನಿಂದ ಡಯಟ್, ವರ್ಕೌಟ್ ಮಾಡತೊಡಗಿದೆ. ಈಗಲೂ ಫಿಟ್ನೆಸ್ ಪಯಣ ಮುಂದುವರಿದಿದೆ. ದಪ್ಪ ಇರುವವರಿಗಷ್ಟೇ ಅನಾರೋಗ್ಯ ಕಾಡುತ್ತದೆ ಅಂತಲ್ಲ. ಇವತ್ತಿನ ಕಲುಷಿತ ಆಹಾರ, ಜಂಕ್ ುಡ್ಸ್ ಎಲ್ಲರಿಗೂ ಆರೋಗ್ಯ ಸಮಸ್ಯೆ ತರುತ್ತಿವೆ. ಹೀಗಾಗಿ ಎಲ್ಲರೂ ಆರೋಗ್ಯದ ಬಗ್ಗೆ ಕಾಳಜಿ ವಹಿಸಲೇಬೇಕು' ಎನ್ನುತ್ತಾರೆ ಪ್ರಜ್ಞಾ.