ವಿಜಯವಾಣಿ ಸುದ್ದಿಜಾಲ ಬೆಂಗಳೂರು:
"ಬಿಗ್ಬಾಸ್ ಕನ್ನಡ ಸೀಸನ್ 9'ರ ವಿನ್ನರ್ ರೂಪೇಶ್ ಶೆಟ್ಟಿ ನಟಿಸಿ, ನಿರ್ದೇಶಿಸುತ್ತಿರುವ ಸಿನಿಮಾ "ಜೈ'. ತುಳು ಮತ್ತು ಕನ್ನಡ ದ್ವಿಭಾಷೆಯಲ್ಲಿ ಮೂಡಿಬರುತ್ತಿರುವ ಈ ಚಿತ್ರದ "ಲವ್ ಯು' ಎಂದು ಸಾಗುವ ಹಾಡನ್ನು ಇತ್ತಿಚೆಗಷ್ಟೆ ಬಿಡುಗಡೆ ಮಾಡಲಾಯಿತು. ಇದೊಂದು ರೊಮ್ಯಾಂಟಿಕ್ ಸಾಂಗ್ ಆಗಿದ್ದು ನಿಜ ಜೋಡಿಗಳಾದ ಗುರುಕಿರಣ್ & ಪಲ್ಲವಿ, ನಿರಂಜನ್ ದೇಶಪಾಂಡೆ & ಯಶಸ್ವಿನಿ, ವಿನಯ್ ಗೌಡ & ಅಕ್ಷತಾ, ರೂಪೇಶ್ ರಾಜಣ್ಣ & ಶ್ರೀಲಕ್ಷ್ಮೀ, ಆರ್ಯವರ್ಧನ್ ಗುರೂಜಿ & ಸುಚೇತನಾ ದಂಪತಿ ಬಿಡುಗಡೆ ಮಾಡಿದರು.
ಚಿತ್ರದ ಬಗ್ಗೆ ನಾಯಕ, ನಿರ್ದೇಶಕ ರೂಪೇಶ್ ಶೆಟ್ಟಿ, "ಈ ಹಾಡಿನ ಐದು ವರ್ಷನ್ ಕೇಳಿದ ಬಳಿಕ ಆರನೇ ವರ್ಷನ್ ಅಂತಿಮ ಮಾಡಿದೆವು. ಮತ್ತೆ ಮತ್ತೆ ಕೇಳಬೇಕು ಅಂತನ್ನಿಸುವ ಹಾಡು ಕೊಡಬೇಕು ಅಂತ ತುಂಬ ಶ್ರಮ ಹಾಕಿದ್ದೇವೆ. ತುಳುನಲ್ಲಿ ನಾನೇ ಸಾಹಿತ್ಯ ಬರೆದಿದ್ದೇನೆ, ಕನ್ನಡದಲ್ಲಿ ಕೀರ್ತನ್ ಭಂಡಾರಿ ಬರೆದಿದ್ದಾರೆ. ಎರಡೂ ಭಾಷೆಗಳಲ್ಲಿ ರಜತ್ ಹೆಗ್ಡೆ ಹಾಡಿದ್ದಾರೆ. ಹಾಡಿಗೆ ಉತ್ತಮ ಪ್ರತಿಕ್ರಿಯೆ ದೊರೆಯುತ್ತಿದೆ' ಎಂದು ಸಂತಸ ವ್ಯಕ್ತಪಡಿಸುತ್ತಾರೆ. ನಾಯಕಿ ಅದ್ವಿತಿ, "ನನ್ನ ಮಾತೃಭಾಷೆ ತುಳು. "ಜೈ' ನನಗೆ ಮೊದಲ ತುಳು ಚಿತ್ರವಾದ ಕಾರಣ ಸ್ಪೆಷಲ್. ನಾನಿಲ್ಲಿ ಪತ್ರಕತೆರ್ಯ ಪಾತ್ರದಲ್ಲಿ ನಟಿಸಿದ್ದೇನೆ' ಎಂದು ಹೇಳಿಕೊಳ್ಳುತ್ತಾರೆ.
ರಿಲೀಸ್ಗೂ ಮುನ್ನವೇ ಜೈ ಭರ್ಜರಿಯಾಗಿ ಸದ್ದು ಮಾಡುತ್ತಿದೆ. ವಿಭಿನ್ನ ಪ್ರಚಾರದಿಂದ ಗಮನ ಸೆಳೆದಿರುವ ಚಿತ್ರತಂಡ ಇತ್ತೀಚೆಗೆ ನಡೆದ ಅಂತಾರಾಷ್ಟ್ರೀಯ ಪ್ರೀಮಿಯರ್ನಲ್ಲಿ ಅದ್ಭುತ ಪ್ರತಿಕ್ರಿಯೆ ಪಡೆದುಕೊಂಡಿದೆ. ಅ.24ರಂದು ಮಸ್ಕಟ್ನಲ್ಲಿ ಮೊದಲ ಅಂತಾರಾಷ್ಟ್ರೀಯ ಪ್ರೀಮಿಯರ್ ಆಯೋಜಿಸಿದ್ದ ಜೈ ಟೀಮ್ ನಂತರ ಅ. 26ರಂದು ಗೋವಾದಲ್ಲಿ ಭಾರತದ ಮೊದಲ ಪ್ರೀಮಿಯರ್ ಆಯೋಜಿಸಿತ್ತು. ದೇಶ, ವಿದೇಶದಲ್ಲಿ ಪ್ರೀಮಿಯರ್ಗೆ ದೊರೆತ ಉತ್ತಮ ಪ್ರತಿಕ್ರಿಯೆಯಿಂದ ಜೋಷ್ನಲ್ಲಿರುವ ಚಿತ್ರತಂಡ ಇದೀಗ ಬಹರೈನ್, ಕತಾರ್, ದುಬೈನಲ್ಲೂ ಪ್ರೀಮಿಯರ್ ಶೋಗಳನ್ನು ನಡೆಸಲು ಪ್ಲ್ಯಾನ್ ಮಾಡಿಕೊಂಡಿದೆ. ಅಂದಹಾಗೆ ಇದೇ ನ. 14ರಂದು "ಜೈ' ತೆರೆಗೆ ಬರಲಿದೆ.