ಶುಕ್ರವಾರವಷ್ಟೇ ಸುಶಾಂತ್ ಸಿಂಗ್ ಗೆಳತಿ ರಿಯಾ ಚಕ್ರವರ್ತಿಯ ಒಂದು ವಿಡಿಯೋ ದೊಡ್ಡ ಮಟ್ಟದಲ್ಲಿ ಸುದ್ದಿ ಮಾಡಿತ್ತು. ಈಗಲೂ ಆ ವಿಡಿಯೋ ಬಗ್ಗೆ ಚರ್ಚೆ ನಡೆಯುತ್ತಲೇ ಇದೆ. ಅಷ್ಟೇ ಅಲ್ಲ, ಆ ವಿಡಿಯೋ ನೋಡಿರುವ ಹಲವು ನೆಟ್ಟಿಗರು, ರಿಯಾ ವಿರುದ್ಧ ಕ್ರಮ ಕೈಗೊಳ್ಳಿ ಎಂದು ಹೇಳುತ್ತಿದ್ದಾರೆ. ಹೀಗಿರುವಾಗಲೇ, ರಿಯಾ ಅದೊಂದು ಸುಳ್ಳು ವಿಡಿಯೋ ಎಂದು ಹೇಳಿಕೊಂಡಿದ್ದಾರೆ.
ಸುಶಾಂತ್ ಸಿಂಗ್ ರಜಪೂತ್ ಆತ್ಮಹತ್ಯೆಯ ಕೇಸ್ನಲ್ಲಿ ಈಗ ಎಲ್ಲರ ಗಮನ ರಿಯಾ ಚಕ್ರವರ್ತಿಯತ್ತ ಇದೆ. ಸುಶಾಂತ್ ಅಕೌಂಟ್ನಿಂದ ರಿಯಾ 15 ಕೋಟಿ ತೆಗೆದಿದ್ದರು, ಮಾನಸಿಕ ಹಿಂಸೆ ನೀಡಿದ್ದರು, ಆತ್ಮಹತ್ಯೆಗೆ ದೂಡಿದ್ದರು ಎಂಬ ಹಲವು ಆರೋಪಗಳು ಕೇಳಿ ಬಂದಿದೆ.
ಹೀಗಿರುವಾಗಲೇ ನಿನ್ನೆ ಒಂದು ವಿಡಿಯೋ ಬಿಡುಗಡೆಯಾಗಿತ್ತು. ಆ ವಿಡಿಯೋದಲ್ಲಿ ರಿಯಾ ಬಹಳ ಜಾಲಿಯಾಗಿ ಮಾತನಾಡಿದ್ದಾರೆ. ಅವನು ಗೂಂಡಾ ಆದರೆ, ನಾನು ಅವನಿಗಿಂಥ ದೊಡ್ಡವಳು. ಅವನನ್ನು ಸುಲಭವಾಗಿ ಕಂಟ್ರೋಲ್ ಮಾಡಬಲ್ಲೆ ಎಂಬಂತಹ ಮಾತುಗಳನ್ನು ರಿಯಾ ಆಡಿದ್ದಾರೆ. ಈ ವಿಡಿಯೋ ಸಖತ್ ವೈರಲ್ ಆಗಿದ್ದು, ಒಂದು ದಿನದಲ್ಲಿ ಸಾಕಷ್ಟು ಸುದ್ದಿ ಮಾಡಿದೆ.
ಆದರೆ, ಇದೊಂದು ನಕಲಿ ವಿಡಿಯೋ ಎಂದು ರಿಯಾ ಹೇಳಿಕೊಂಡಿದ್ದಾರೆ. ಈ ಕುರಿತು ಮಾತನಾಡಿರುವ ಅವರು, 'ನಾನು ಇದಕ್ಕೂ ಮುನ್ನ ಕೆಲವೊಮ್ಮೆ ಸ್ಟಾಂಡ್-ಅಪ್ ಕಾಮಿಡಿ ಮಾಡಿದ್ದಿದೆ. ಅದರಲ್ಲಿ ನಾನು ತಾಯ್ ಎಂಬ ಪಾತ್ರ ಮಾಡುತ್ತೇನೆ. ಆ ಪಾತ್ರ ಹೇಳುವ ಡೈಲಾಗ್ ಇದು. ಅದನ್ನು ಯಾವುದೋ ಸಂದರ್ಭದಲ್ಲಿ ಹೇಳಿದ್ದೆ. ನಾನು ಮಾತನಾಡುತ್ತಿರುವುದನ್ನು ವಿಡಿಯೋ ಮಾಡಲಾಗುತ್ತಿದೆ ಎಂಬ ವಿಷಯ ಸಹ ಗೊತ್ತಿರಲಿಲ್ಲ. ಬಹಳ ಜಾಲಿಯಾಗಿ ಆ ಪಾತ್ರದ ಸಂಭಾಷಣೆಗಳನ್ನು ಹೇಳುತ್ತಿದ್ದೆ. ಅದನ್ನು ಈ ಕೇಸ್ಗೆ ಲಿಂಕ್ ಮಾಡಿ ನನ್ನನ್ನು ಸಿಕ್ಕಿಹಾಕಿಸಲಾಗುತ್ತಿದೆ' ಎಂದು ರಿಯಾ ಹೇಳಿಕೊಂಡಿದ್ದಾರೆ.
ಸುಶಾಂತ್ ಮತ್ತು ರಿಯಾ ಇಬ್ಬರೂ ಲಿವ್-ಇನ್ ರಿಲೇಶನ್ಶಿಪ್ನಲ್ಲಿದ್ದವರು. ಆದರೆ, ಕಾರಣಾಂತರಗಳಿಂದ ಇಬ್ಬರ ನಡುವೆ ಜಗಳ ಆಗಿದ್ದು, ಸುಶಾಂತ್ ಮನೆಯಿಂದ ರಿಯಾ ಹೊರಟು ಹೋಗಿದ್ದರು. ಅದಾಗಿ ಒಂದು ವಾರದ ನಂತರ ಸುಶಾಂತ್ ಅತ್ಮಹತ್ಯೆ ಮಾಡಿಕೊಂಡಿದ್ದರು. ಈ ಸಂಬಂಧ ರಿಯಾ ಮೇಲೆ ಸುಶಾಂತ್ ಸಿಂಗ್ ಅವರ ತಂದೆ ಕೆ.ಕೆ. ಸಿಂಗ್ ಕೇಸ್ ಹಾಕಿದ್ದಾರೆ.