ಮೂರುಗಂಟಿಗಾಗಿ ಶುಭ ವಿವಾಹ

ಬೆಂಗಳೂರು: ‘ಶುಭ ವಿವಾಹ’ ಎಂದರೆ ಅಲ್ಲಿ ಮೂರುಗಂಟು ಇರುವುದು ಸಂಪ್ರದಾಯ. ಆದರೆ ಮೂರುಗಂಟಿಗಾಗಿಯೇ ಶುಭ ವಿವಾಹ ನಡೆದರೆ ಹೇಗಿರಬಹುದು ಎಂಬುದನ್ನು ಕಣ್ಮುಂದೆ ತರಲಿದೆ ಕಲರ್ಸ್ ಕನ್ನಡ ವಾಹಿನಿ.

ಹೌದು.. ಕಲರ್ಸ್ ಕನ್ನಡದಲ್ಲಿ ಈಚೆಗೆ ಆರಂಭವಾಗಿರುವ ‘ಮೂರುಗಂಟು’ ಧಾರಾವಾಹಿ ಒಂದು ಕುತೂಹಲಕಾರಿ ಘಟ್ಟ ತಲುಪಿದ್ದು, ಈ ಧಾರಾವಾಹಿಯೊಳಗೆ ‘ಶುಭ ವಿವಾಹ’ ಎಂಬ ರಿಯಾಲಿಟಿ ಶೋ ನಡೆಯಲಿದೆ. ಧಾರಾವಾಹಿ ಒಳಗೆ ರಿಯಾಲಿಟಿ ಶೋ, ಅದರಲ್ಲೇ ನಾಯಕ ಮದುವೆ ಆಗುವುದು ಕನ್ನಡ ಕಿರುತೆರೆಯಲ್ಲಿ ಹೊಸ ಪ್ರಯೋಗ. ಯಾವಾಗಲೂ ಹೊಸ ಹೊಸ ಪ್ರಯೋಗಗಳನ್ನು ಮಾಡುತ್ತ ಬಂದಿರುವ ಕಲರ್ಸ್ ಕನ್ನಡ ಈ ಬಾರಿ ಇಂಥ ಹೊಸ ಸಾಹಸಕ್ಕೆ ಮುಂದಾಗಿದೆ. ಧಾರಾವಾಹಿಯ ಆರಂಭದ ಎಪಿಸೋಡ್​ಗಳಿಗೆ ಸಿಕ್ಕಿದ ಭಾರಿ ಜನಪ್ರಿಯತೆ ಈ ‘ಶುಭ ವಿವಾಹ’ದ ಎಪಿಸೋಡ್​ಗಳಲ್ಲಿ ಇನ್ನಷ್ಟು ಮೇಲಕ್ಕೇರಲಿದೆ ಎಂಬುದು ಧಾರಾವಾಹಿ ನಿಮಾಪಕರ ವಿಶ್ವಾಸ.

ಈ ರಿಯಾಲಿಟಿ ಶೋನಲ್ಲಿ ಹತ್ತು ಸ್ಪರ್ಧಿಗಳಿರುತ್ತಾರೆ. ‘ಲಕ್ಷ್ಮೀ ಬಾರಮ್ಮ’ ಧಾರಾವಾಹಿಯಲ್ಲಿನ ಗೊಂಬೆ ಪಾತ್ರ ಖ್ಯಾತಿಯ ನೇಹಾ ಈ ಕಾರ್ಯಕ್ರಮದ ನಿರೂಪಕಿ. ಅಡುಗೆ ಮಾಡುವುದು, ರಂಗೋಲಿ ಬಿಡಿಸುವುದು, ವಿಕ್ರಮಾದಿತ್ಯನ ಬಗ್ಗೆ ವಿವರಿಸುವುದು ಮುಂತಾದ ಸ್ಪರ್ಧೆಗಳು ಇರುತ್ತವೆ. ಪ್ರತಿ ಸುತ್ತಿನ ಕೊನೆಗೂ ಒಬ್ಬರು ಎಲಿಮಿನೇಟ್ ಆಗುತ್ತಾರೆ. ಕೊನೆಗೆ ಉಳಿಯುವವರನ್ನು ವಿಕ್ರಮಾದಿತ್ಯ ಮದುವೆ ಆಗುತ್ತಾನೆ. ಸೂಪರ್​ಸ್ಟಾರ್ ವಿಕ್ರಮಾದಿತ್ಯ ಸಂಕಷ್ಟದಲ್ಲಿ ಇದ್ದಾನೆ. ಆತನ ಚಿತ್ರಗಳು ಓಡುತ್ತಿಲ್ಲ, ಸಾಲಗಾರರು ಮನೆ ಬಳಿ ಸುತ್ತುತ್ತಿರುವ ಪರಿಸ್ಥಿತಿಯಲ್ಲಿ ರಿಯಾಲಿಟಿ ಶೋ ಮೂಲಕ ಹುಡುಗಿಯನ್ನು ವರಿಸಲು ಒಪ್ಪುತ್ತಾನೆ. ಗೆಳತಿ ಜತೆ ಬಾಜಿ ಕಟ್ಟಿ ಈ ಸ್ಪರ್ಧೆಗೆ ಬರುವ ಪಾವನಿ, ತನ್ನ ಅವಳಿ ಸಹೋದರಿ ಶ್ರಾವಣಿಯಂತೆ ನಟಿಸುತ್ತಾಳೆ. ಸ್ಪರ್ಧೆಯಲ್ಲೂ ಒಂದೊಂದೇ ಸುತ್ತನ್ನು ಗೆಲ್ಲುತ್ತಾಳೆ. ಕೊನೆಗೆ ವಿಕ್ರಮಾದಿತ್ಯನನ್ನು ಮದುವೆ ಆಗುವವಳು ಅವಳೇನಾ? ಎಂಬುದು ಧಾರಾವಾಹಿಯ ಕೌತುಕದ ಅಂಶ. ‘ಮೂರುಗಂಟು’ ಸೋಮವಾರದಿಂದ ಶುಕ್ರವಾರದವರೆಗೆ ಪ್ರತಿರಾತ್ರಿ 9ರಿಂದ ಕಲರ್ಸ್ ಕನ್ನಡದಲ್ಲಿ ಪ್ರಸಾರ ಆಗುತ್ತಿದೆ.