ವಿಜಯವಾಣಿ ಸುದ್ದಿಜಾಲ ಬೆಂಗಳೂರು
ನಾಗರಾಜ್ ಸೋಮಯಾಜಿ ಚೊಚ್ಚಲ ಬಾರಿಗೆ ಆ್ಯಕ್ಷನ್-ಕಟ್ ಹೇಳಿರುವ ಸಿನಿಮಾ ಮರ್ಯಾದೆ ಪ್ರಶ್ನೆ. ಈ ಚಿತ್ರವನ್ನು ಸಕ್ಕತ್ ಸ್ಟುಡಿಯೋ ಬ್ಯಾನರ್ನಲ್ಲಿ ಆರ್ಜೆ ಪ್ರದೀಪಾ ಮೊದಲ ಬಾರಿಗೆ ನಿರ್ಮಿಸಿದ್ದು, ಇತ್ತೀಚೆಗಷ್ಟೆ ಚಿತ್ರದ ಮೊದಲ ಹಾಡು, ಮಿಡಲ್ ಕ್ಲಾಸ್ ಆ್ಯಂತೆಮ್ ರಿಲಿಸ್ ಮಾಡಲಾಗಿದೆ.
ಪ್ರಮೋದ್ ಮರವಂತೆ ಸಾಹಿತ್ಯ, ಅರ್ಜುನ್ ರಾಮು ಸಂಗೀತದಲ್ಲಿ ನಟ ಶರಣ್ ಈ ಹಾಡಿಗೆ ಧ್ವನಿಯಾಗಿದ್ದಾರೆ. ಹಾಡಿನಲ್ಲಿ ಚಿತ್ರದ ಕಲಾವಿದರ ಪಾತ್ರ ಪರಿಚಯ ಮಾಡುವುದರ ಜತೆಗೆ ಅವರ ಮಿಡಲ್ ಕ್ಲಾಸ್ ಜೀವನದ ಝಲಕ್ ನೀಡಲಾಗಿದೆ. ಮರ್ಯಾದೆ ಪ್ರಶ್ನೆಯಲ್ಲಿ ರಾಕೇಶ್ ಅಡಿಗ ಒಬ್ಬ ಸಾಮಾಜಿಕ ಕಾರ್ಯಕರ್ತನಾಗಿ, ಸುನಿಲ್ ರಾವ್ ಡೆಲಿವರಿ ಬಾಯ್ ಪಾತ್ರದಲ್ಲಿ, ಪೂರ್ಣಚಂದ್ರ ಮೈಸೂರು ಕ್ಯಾಬ್ ಡ್ರೈವರ್ ಆಗಿ, ನಟಿ ತೇಜು ಬೆಳವಾಡಿ ಸೇಲ್ಸ್ ಗರ್ಲ್ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ಮಧ್ಯಮ ವರ್ಗದ ಜನರ ಜೀವನದ ಕುರಿತ ಕಥೆಯಿರುವ ಈ ಚಿತ್ರವನ್ನು ನಿರ್ದೇಶಕ ನಾಗರಾಜ ಸೋಮಯಾಜಿ ಹಾಸ್ಯದ ಮೂಲಕ ನಿರೂಪಿಸುವ ಪ್ರಯತ್ನ ಮಾಡಿದ್ದಾರೆ. ಸಿನಿಮಾ ಇದೇ ನ. 22ರಂದು ರಾಜ್ಯಾದ್ಯಂತ ತೆರೆಗೆ ಬರಲಿದೆ.